Ravichandran Ashwin: స్పిన్న‌ర్ ర‌విచంద్ర‌న్ అశ్విన్ ఖాతాలో మ‌రో రికార్డు

Ravichandran Ashwin : అశ్విన్ ఇర‌గ‌దీస్తున్నాడు. త‌న ఖాతాలో మ‌రో రికార్డును వేసుకున్నాడు. విండీస్‌తో జ‌రిగిన తొలి టెస్టులో అత‌ను 12 వికెట్లు తీసుకున్నాడు. తొలి ఇన్నింగ్స్‌లో 5, రెండో ఇన్నింగ్స్‌లో ఏడు వికెట్లు తీశాడు. టెస్టుల్లో 10 క‌న్నా ఎక్కువ వికెట్లు తీయ‌డం అశ్విన్‌కు ఇది ఎనిమిదోసారి.

హైద‌రాబాద్‌: ర‌విచంద్ర‌న్ అశ్విన్(Ravichandran Ashwin) త‌న మాయాజాలాన్ని మ‌రోసారి ప్ర‌ద‌ర్శించాడు. విండీస్‌తో జ‌రిగిన తొలి టెస్టులో అత‌ను ఏకంగా 12 వికెట్లు తీసుకున్నాడు. ఆ టెస్టు మ్యాచ్‌లో ఇన్నింగ్స్ 141 ర‌న్స్ తేడాతో ఇండియా నెగ్గింది. తొలి ఇన్నింగ్స్‌లో అయిదు వికెట్లు తీసుకున్న అశ్విన్‌.. రెండో ఇన్నింగ్స్‌లో ఏడు వికెట్ల‌ను ఖాతాలో వేసుకున్నాడు. పేస్ బౌల‌ర్ల‌కు అనుకూలించే విండీస్ పిచ్‌ల‌పై స్పిన్ బౌల‌ర్ అశ్విన్ త‌న స‌త్తా చాటాడు. టెస్టు క్రికెట్‌లో అశ్విన్ రికార్డులు ఏంటో ఓసారి చూద్దాం.

టెస్టుల్లో అశ్విన్ మొత్తం 8 సార్లు 10 వికెట్లు తీసుకున్నాడు. మాజీ క్రికెట‌ర్ అనిల్ కుంబ్లే కూడా 8 సార్లు టెస్టుల్లో ప‌దేసి వికెట్లు ప‌డగొట్టాడు. మ‌రో న‌లుగురు ఇత‌ర దేశాల క్రికెట‌ర్లు కూడా ఇద్ద‌రు ఇండియ‌న్ల త‌ర‌హాలో టెస్టుల్లో 10 వికెట్లు తీసుకున్నారు.

https://twitter.com/ICC/status/1680049748336680960?s=20

అశ్విన్ టెస్టుల్లో 34 సార్లు అయిదేసి వికెట్లు తీసుకున్నాడు. మాజీ స్పిన్న‌ర్ అనిల్ కుంబ్లే 35 సార్లు ఆ ఘ‌న‌త‌ను అందుకున్నాడు. టెస్టుల్లో అయిదేసి వికెట్లు తీసిన జాబితాలో అశ్విన్ ఇప్పుడు అయిదో స్థానంలో నిలిచాడు. రంగ‌న హీర‌త్‌తో క‌లిసి అత‌ను ఆ స్థానాన్ని పంచుకున్నాడు.

రెండు ఇన్నింగ్స్‌లో అయిదు లేదా అంత‌క‌న్నా ఎక్కువ వికెట్లు అశ్విన్ ఆరు సార్లు తీసుకున్నాడు. లంక బౌల‌ర్ ముత్త‌య్య ముర‌ళీధ‌ర‌న్ 11 సార్లు, హీర‌త్ 8 సార్లు ఆ ఘ‌న‌త‌ను సాధించారు. వెస్టిండీస్‌లో 2016 ప‌ర్య‌ట‌న స‌మ‌యంలో యాంటిగ్వా టెస్టులో 83 ర‌న్స్ ఇచ్చి ఏడు వికెట్లు తీసుకున్నాడు. 2011లో బ్రిడ్జ్‌టౌన్ టెస్టులో ఇశాంత్ శ‌ర్మ 108 ర‌న్స్ ఇచ్చి 10 వికెట్లు త‌న ఖాతాలో వేసుకున్నాడు.

క‌రీబియ‌న్ పిచ్‌ల‌పై ఉత్త‌మ బౌలింగ్ ప్ర‌ద‌ర్శించిన రెండో స్పిన్న‌ర్‌గా అశ్విన్ నిలిచాడు. 1973లో పోర్ట్ ఆఫ్ స్పెయిన్‌లో జ‌రిగిన మ్యాచ్‌లో టోనీ గ్రేగ్ 156 ర‌న్స్ ఇచ్చి 13 వికెట్లు తీసుకున్నాడు. అశ్విన్ క‌న్నా ఇదే బెట‌ర్ రికార్డు.