హామిల్టన్(న్యూజిలాండ్): దక్షిణాఫ్రికా, న్యూజిలాండ్ మధ్య రెండో టెస్టు రసవత్తరంగా సాగుతున్నది. సఫారీ స్పీడ్స్టర్ డేన్ పీడ్(5/89) ఐదు వికెట్ల విజృంభణతో న్యూజిలాండ్ తొలి ఇన్నింగ్స్లో 211 పరుగులకు కుప్పకూలింది. డేన్ బౌలింగ్ ధాటికి కివీస్ వరుస విరామాల్లో వికెట్లు కోల్పోయింది. పిచ్ పరిస్థితులను సద్వినియోగం చేసుకుంటూ డేన్ తన కెరీర్ బెస్ట్ను ఖాతాలో వేసుకున్నాడు. డేన్కు తోడు పాటర్సన్(3/39) జత కలువడంతో కివీస్ ఒకానొక దశలో 183 పరుగులకే 9 వికెట్లు కోల్పోయింది. ఆఖర్లో నీల్ వాగ్నర్(33) బ్యాటు ఝులిపించడంతో కివీస్ రెండు వందల మార్క్ దాటింది.
విలియమ్సన్(43), టామ్ లాథమ్(40) ఫర్వాలేదనిపించారు. అంతకుముందు ఓవర్నైట్ స్కోరు 220/6 రెండో రోజు తొలి ఇన్నింగ్స్ కొనసాగించిన దక్షిణాఫ్రికా 242 పరుగులకు ఆలౌటైంది. 22 పరుగుల తేడాతో సఫారీలు మిగిలిన నాలుగు వికెట్లు కోల్పోయారు. రూర్కీ(4/59), రచిన్(3/33) ఆకట్టుకున్నారు. దక్షిణాఫ్రికా ప్రస్తుతం 31 పరుగుల ఆధిక్యంలో ఉన్నది.