సినిమాలలో ఫైట్లు స్టంట్ డైరెక్టర్స్ చూసుకుంటారు. డ్యాన్సులు, స్టెప్పులు కొరియోగ్రాఫర్ బాధ్యత. ఇలా ఒక్కో పనికి ఓ నిపుణుడు ఉంటారు. ఆయా విభాగాల్లో బెస్ట్ అవుట్పుట్ ఇవ్వడం వారి బాధ్యత. మరి, శృంగార సన్నివేశాల మాటేమిటి? ఆ దృశ్యాల్ని సజావుగా షూట్ చేయడానికే ‘ఇంటిమసీ కొరియోగ్రాఫర్లు’ తెరపైకి వచ్చారు. ఈ రంగంలో తనదైన ముద్ర వేస్తున్నారు ‘ఇంటిమసీ డైరెక్టర్’ ఆస్తా ఖన్నా.
Aastha khanna
డైరెక్టర్ చెప్పినట్టుగా, కెమెరాపర్సన్ సూచించినట్టుగా నటీనటులు శృంగారాన్ని పండించడం ఇప్పటివరకూ చూశాం. ఇప్పుడు పరిధులు దాటుతున్న ప్రణయ సన్నివేశాల్లో మరింతగా రక్తి కట్టించడానికి ఇంటిమసీ కొరియోగ్రాఫర్లు తెరపైకి వచ్చారు. ఆలింగనాలు, చుంబనాలు శ్రుతిమించినా ఆయా సన్నివేశాల్లో పాలు పంచుకున్న నటీనటుల మనసు గాయపడకుండా, అందుకు తగ్గ వాతావరణం కల్పించడం తమ పని అని చెబుతారు ముంబయికి చెందిన ఇంటిమసీ డైరెక్టర్ ఆస్తా ఖన్నా. పాశ్చాత్య చిత్ర పరిశ్రమలో ఇంటిమసీ విభాగం 2018లోనే పరిచయమైంది. మన దేశంలోనూ ఇటీవలి కాలంలో దీనికి ప్రాధాన్యం పెరిగింది.
ముందస్తు శిక్షణ
ఓటీటీ వేదికల్లో పరిధులు దాటుతున్న శృంగార సన్నివేశాలపై వీక్షకులు పెదవి విరిచినా, ఆయా సన్నివేశాల్లో నటించే సమయంలో పాత్రధారుల మానసిక సంఘర్షణ అందరూ ఊహించినట్టుగా మాత్రం ఉండదు. ‘శృంగార సన్నివేశాల్లో నటీనటులు లేని ప్రేమను ఒలకబోయాల్సి వస్తుంది. లేనిది ఉన్నట్టుగా ప్రేక్షకులను భ్రమింప జేయాల్సి ఉంటుంది. ఆయా సన్నివేశాల్లో నటీనటులమధ్య సాన్నిహిత్యం కృతకంగా ఉండకూడదంటే ముందస్తుగానే వారిని సిద్ధం చేయాల్సి ఉంటుంది. ఆ బాధ్యత ఇంటిమసీ డైరెక్టర్ల పని’ అని వివరిస్తారు ఆస్తా ఖన్నా. ఇంటిమసీ ప్రొఫెషనల్స్ అసోసియేషన్లో 16 వారాలు శిక్షణ తీసుకున్న ఆమె ఈ రంగంలో భారత్లో తొలితరం నిపుణురాలుగా గుర్తింపు పొందారు. కథానుగుణంగా శృంగార సన్నివేశాల విషయంలో దర్శకుడికి ఒక ఆలోచన ఉంటుంది. అయితే, ఆ దృక్పథం ఎంతవరకు సబబైందో, ఆ సన్నివేశ చిత్రీకరణలో నటీనటులకు ఎలాంటి సమస్యలు ఎదురవుతాయో దర్శకుడికి సూచనలు చేస్తారు ఇంటిమసీ నిపుణులు. ‘నటీనటులమధ్య అన్యోన్యత ఉట్టి పడేందుకు ముందునుంచే వారిని ప్రిపేర్ చేస్తాం. ఇంటిమసీ పెరిగేలా శిక్షణ ఇస్తాం. ఇద్దరూ ఒక అవగాహనకు వచ్చినప్పుడే అభద్రతకు తావుండదు. సన్నివేశాలూ సహజంగా వస్తాయి. వారిద్దరి మధ్యా కెమిస్ట్రీ పండేలా మేం క్యాటలిస్ట్ పాత్ర పోషిస్తాం. అలాగే వారి భద్రతకు అధిక ప్రాధాన్యం ఇస్తాం’ అని చెప్పుకొచ్చారు ఆస్తా.
నమ్మకం కలిగించడమే పని
కథ, పాత్రల తీరుతెన్నులు, సీన్ డిమాండ్ ఆధారంగా సన్నివేశాలను చిత్రీకరిస్తామని చెబుతారు ఆస్తా. అది సినిమా అయినా, వెబ్సిరీస్ అయినా శృంగారం పాళ్లు ఎక్కువగా ఉంటే మాత్రం షూటింగ్కు ముందే వర్క్షాప్లు నిర్వహిస్తారు ఇంటిమసీ ఎక్స్పర్ట్స్. ముఖ్యంగా నటీనటులకు ప్రత్యేక సెషన్స్ తీసుకుంటారు. వారి కంఫర్ట్ లెవల్స్, షూటింగ్ విధానం, ఆయా సన్నివేశాల్లో ధరించే కాస్ట్యూమ్స్, తీసుకోవాల్సిన రక్షణ చర్యలు అన్నిటినీ సూచిస్తూ సన్నివేశాన్ని డిజైన్ చేస్తారు. ‘షూటింగ్కు ముందే పక్కా గ్రౌండ్వర్క్ చేస్తాం. దీంతో ఆడవాళ్లకు ఒక నమ్మకం ఏర్పడుతుంది. తను భద్రంగానే ఉన్నానన్న నమ్మకం కలిగినప్పుడే సహజంగా నటించగలరు’ అంటారు ఆస్తా. ఈ కెరీర్ను ఎంచుకోదలచిన వాళ్లు శృంగారం ఒక పవిత్రమైన భావవ్యక్తీకరణగా గుర్తించగలిగితేనే రాణించగలరని చెబుతున్నారామె.