పేసర్లు సత్తాచాటలేక పోయిన చోట.. మిడిలార్డర్ బ్యాట్స్మెన్ రాణించినా.. ఓపెనర్లు విఫలమవడంతో సన్ రైజర్స్ హైదరాబాద్ ఓటమితో సీజన్ను ఆరంభించింది. యువ ఆటగాళ్లు దంచికొట్టడంతో మొదట భారీ స్కోరు చేసిన కోల్కతా నైట్రైడర్స్.. అనంతరం బౌలింగ్లో దుమ్మురేపి రైజర్స్ను కట్టడి చేసింది. ఎస్ఆర్హెచ్ కెప్టెన్ వార్నర్, సాహా విఫలం కాగా.. మనీశ్ పాండే, జానీ బెయిర్స్టో అర్ధశతకాలు ఓటమి అంతరాన్ని తగ్గించేందుకే పరిమితమయ్యాయి.
చెన్నై: ఆల్రౌండ్ ప్రదర్శనతో అదరగొట్టిన కోల్కతా నైట్రైడర్స్ ఇండియన్ ప్రీమియర్ లీగ్ (ఐపీఎల్) 14వ సీజన్ను గెలుపుతో ఆరంభించగా.. సన్రైజర్స్ హైదరాబాద్కు తొలి పోరులో నిరాశ ఎదురైంది. ఆదివారం ఇక్కడ జరిగిన మ్యాచ్లో హైదరాబాద్పై కోల్కతా 10 పరుగుల తేడాతో విజయం సాధించింది. మొదట బ్యాటింగ్ చేసిన కోల్కతా నిర్ణీత 20 ఓవర్లలో 6 వికెట్లకు 187 పరుగులు చేసింది. యువ ఓపెనర్ నితీశ్ రాణా (56 బంతుల్లో 80; 9 ఫోర్లు, 4 సిక్సర్లు), రాహుల్ త్రిపాఠి (29 బంతుల్లో 53; 5 ఫోర్లు, 2 సిక్సర్లు) అర్ధశతకాలు సాధించగా.. చివర్లో దినేశ్ కార్తీక్ (9 బంతుల్లో 22 నాటౌట్; 2 ఫోర్లు, ఒక సిక్సర్) వేగంగా ఆడాడు. హైదరాబాద్ బౌలర్లలో రషీద్ ఖాన్, మహమ్మద్ నబీ చెరో 2 వికెట్లు పడగొట్టారు. అనంతరం లక్ష్యఛేదనలో సన్రైజర్స్ 20 ఓవర్లలో 5 వికెట్లు కోల్పోయి 177 పరుగులకు పరిమితమైంది. మనీశ్ పాండే (44 బంతుల్లో 61 నాటౌట్; 2 ఫోర్లు, 3 సిక్సర్లు), బెయిర్స్టో (40 బంతుల్లో 55; 5 ఫోర్లు, 3 సిక్సర్లు) హాఫ్ సెంచరీలు బాదినా ఫలితం లేకపోయింది. కోల్కతా బౌలర్లలో ప్రసిద్ధ్ కృష్ణ 2 వికెట్లు పడగొట్టాడు. నితీశ్ రాణాకు ‘మ్యాన్ ఆఫ్ ది మ్యాచ్’ అవార్డు దక్కింది.
చెపాక్ స్టేడియంలో టాస్ ఓడి మొదట బ్యాటింగ్కు దిగిన కోల్కతా నైట్రైడర్స్కు శుభారంభం దక్కింది. శుభ్మన్ గిల్ (15) ఫర్వాలేదనిపించగా.. నితీశ్ రాణా ఆరంభం నుంచి దూకుడుగా ఆడాడు. సందీప్ వేసిన రెండో ఓవర్లో రెండు ఫోర్లు కొట్టిన రాణా.. అతడి తదుపరి ఓవర్లో హ్యాట్రిక్ ఫోర్లు అరుసుకున్నాడు. ఫలితంగా పవర్ ప్లే ముగిసే సరికి కోల్కతా వికెట్ నష్టపోకుండా 50 పరుగులు చేసింది. ఈ దశలో వార్నర్.. రషీద్ ఖాన్కు బంతినివ్వడం ఫలితాన్నిచ్చింది. మిస్టరీ స్పిన్నర్ రషీద్ తొలి ఓవర్ చివరి బంతికి గిల్ను క్లీన్ బౌల్డ్ చేశాడు. అయితే నితీశ్ రాణాకు రాహుల్ త్రిపాఠి జత కలవడంతో కోల్కతా ఇన్నింగ్స్ సజావుగా సాగింది. ఈ క్రమంలో రాణా 37 బంతుల్లో అర్ధశతకం పూర్తి చేసుకున్నాడు. మరో ఎండ్ నుంచి దంచికొట్టిన త్రిపాఠి కూడా 28 బంతుల్లోనే హాఫ్సెంచరీ పూర్తి చేసుకోవడంతో కోల్కతా మరింత భారీ స్కోరు చేసేలా కనిపించింది. 16వ ఓవర్లో త్రిపాఠిని నటరాజన్ ఔట్ చేయగా.. మరుసటి ఓవర్లో డేంజర్ మ్యాన్ రస్సెల్ (5)ను రషీద్ వెనక్కి పంపాడు. 18వ ఓవర్లో 3 పరుగులే ఇచ్చిన నబీ.. రాణా, మోర్గాన్ (2) ఔట్ చేసి నైట్ రైడర్స్ను దెబ్బకొట్టాడు. ఆఖర్లో దినేశ్ కార్తీక్ వేగంగా ఆడటంతో కోల్కతా మంచి స్కోరు చేయగలిగింది.
టార్గెట్ ఛేజింగ్లో సన్రైజర్స్ హైదరాబాద్కు మంచి ఆరంభం దక్కలేదు. కెప్టెన్ డేవిడ్ వార్నర్ (3)ను ప్రసిద్ధ్ కృష్ణ ఔట్ చేయగా.. తదుపరి ఓవర్లో వృద్ధిమాన్ సాహా (7) పెవిలియన్ బాటపట్టాడు. దీంతో 10 పరుగులకే హైదరాబాద్ రెండు కీలక వికెట్లు కోల్పోయింది. ఈ దశలో మనీశ్ పాండే, జానీ బెయిర్స్టో ఇన్నింగ్స్ను నిలబెట్టారు. ఈ జోడీ కొన్ని చక్కటి షాట్లు ఆడటంతో అర్ధభాగం ముగిసేసరికి సన్రైజర్స్ 77/2తో నిలిచింది. ఈ క్రమంలో బెయిర్స్టో 32 బంతుల్లో అర్ధశతకం పూర్తి చేసుకున్న అనంతరం ఔట్ కాగా.. నబీ (14)ను కృష్ణ పెవిలియన్ బాట పట్టించాడు. ఆఖర్లో సమద్ (8 బంతుల్లో 19 నాటౌట్; 2 సిక్సర్లు) ఆశలు రేపినా.. సాధించాల్సిన రన్రేట్ భారీగా పెరగడంతో హైదరాబాద్కు ఓటమి తప్పలేదు.
కోల్కతా: రాణా (సి) శంకర్ (బి) నబి 80, గిల్ (బి) రషీద్ 15, రాహుల్ త్రిపాఠి (సి) సాహా (బి) నటరాజన్ 53, రస్సెల్ (సి) పాండే (బి) రషీద్ 5, మోర్గాన్ (సి) సమద్ (బి) నబి 2, కార్తీక్ (నాటౌట్) 22, షకీబ్ (సి) సమద్ (బి) భువనేశ్వర్ 3, ఎక్స్ట్రాలు: 7, మొత్తం: 20 ఓవర్లలో 187/6. వికెట్ల పతనం: 1-53, 2-146, 3-157, 4-160, 5-160, 6-187, బౌలింగ్: భువనేశ్వర్ 4-0-45-1, సందీప్ 3-0-35-0, నటరాజన్ 4-0-37-1, నబి 4-0-32-2, రషీద్ 4-0-24-2, శంకర్ 1-0-14-0.
హైదరాబాద్: సాహా (బి) షకీబ్ 7, వార్నర్ (సి) కార్తీక్ (బి) కృష్ణ 3, పాండే (నాటౌట్) 61, బెయిర్స్టో (సి) రాణా (బి) కమిన్స్ 55, నబీ (సి) మోర్గాన్ (బి) కృష్ణ 14, శంకర్ (సి) మోర్గాన్ (బి) రస్సెల్ 11, సమద్ (నాటౌట్) 19, ఎక్స్ట్రాలు: 7, మొత్తం: 20 ఓవర్లలో 177/5. వికెట్ల పతనం: 1-10, 2-10, 3-102, 4-131, 5-150, బౌలింగ్: హర్భజన్ 1-0-8-0, ప్రసిద్ధ్ కృష్ణ 4-0-35-2, షకీబ్ 4-0-34-1, కమిన్స్ 4-0-30-1, రస్సెల్ 3-0-32-1, వరుణ్ 4-0-36-0.