మూడు నెలల తర్వాత ప్రజావాణి.. ఫిర్యాదుల వెల్లువ

మూడు నెలలుగా రాష్ట్రంలో పార్లమెంట్‌ ఎన్నికల కోడ్‌ కారణంగా ప్రజావాణి నిలిచిపోయింది. ఈ నెల 6న కోడ్‌ ముగియడంతో సోమవారం రంగారెడ్డి, వికారాబాద్‌ జిల్లాల్లో ప్రజావాణి ప్రారంభం కాగా, ఫిర్యాదులు వెల్లువెత్తాయి.

• పెండింగ్‌ పనులు పూర్తి చేయాలి : వికారాబాద్‌ కలెక్టర్‌ నారాయణరెడ్డి

వికారాబాద్‌, జూన్‌ 10 : మూడు నెలలుగా రాష్ట్రంలో పార్లమెంట్‌ ఎన్నికల కోడ్‌ కారణంగా ప్రజావాణి నిలిచిపోయింది. ఈ నెల 6న కోడ్‌ ముగియడంతో సోమవారం రంగారెడ్డి, వికారాబాద్‌ జిల్లాల్లో ప్రజావాణి ప్రారంభం కాగా, ఫిర్యాదులు వెల్లువెత్తాయి. ఈ సందర్భంగా వికారాబాద్‌ కలెక్టర్‌ నారాయణరెడ్డి అదనపు కలెక్టర్‌ లింగ్యానాయక్‌తో కలిసి ప్రజల నుంచి 96 దరఖాస్తులను స్వీకరించారు. ఈ సందర్భంగా కలెక్టర్‌ మాట్లాడుతూ శాఖలవారీగా పెండింగ్‌లో ఉన్న వివిధ పనులు త్వరగా పూర్తి అయ్యేలా చర్యలు తీసుకోవాలని అధికారులను ఆదేశించారు. వివిధ శాఖల్లో జరుగుతున్న పనులను అధికారులు క్షేత్రస్థాయిలో పర్యవేక్షించి పూర్తయ్యేలా చూడాలన్నారు.

ఈ నెల 12 నుంచి పాఠశాలలు పునః ప్రారంభం కానున్న నేపథ్యంలో విద్యార్థులకు ఎటువంటి అసౌకర్యం కలుగకుండా మెరుగైన వసతులు కల్పించాలన్నా రు. పాఠ్య, నోట్‌ పుస్తకాలతోపాటు యూనిఫామ్‌ను అందించాలని అధికారులకు సూచించారు. పాఠశాలల మరమ్మతుల నిమిత్తం రూ.50 కోట్లు మంజూరు చేసినట్లు గుర్తు చేశారు. బడిబాటలో భాగంగా అధిక సంఖ్యలో బడీడు పిల్లలను ప్రభుత్వ బడుల్లో చేర్పించేందుకు చర్యలు తీసుకోవాలని, అదేవిధంగా బడిబాటలో మహిళా సంఘాలు భాగస్వాములు అయ్యేలా చొరవ చూపాలన్నారు. జిల్లాలోని పాఠశాలలు, వసతిగృహాల్లో మౌలిక వసతులు కల్పించడంతోపాటు ఏమైనా మరమ్మతులుంటే పూర్తి చేయాలన్నారు.

• ప్రభుత్వ ఉద్యోగులందరూ అటెండెన్స్‌ యాప్‌లో తమ హాజరును తప్పనిసరిగా నమోదు చేసుకోవాలని కలెక్టర్‌ సూచించారు. హాజరు నమోదులో ఎలాంటి నిర్లక్ష్యం తగదన్నారు.
• జిల్లాలో ఎరువులు, విత్తనాలు రైతులకు అందుబాటులో ఉండేలా చర్యలు తీసుకోవాలన్నారు. ప్రభుత్వం నిర్దేశించిన ధరకే వాటిని విక్రయించేలా చూడాలని సంబంధిత అధికారులకు సూచించారు. నకిలీ విత్తనాలు విక్రయించకుండా పకడ్బందీ చర్యలు తీసుకోవాలన్నారు.
• జిల్లాలో మిల్లర్లకు నిర్దేశించిన లక్ష్యాలకు అనుగుణంగా సీఎంఆర్‌ (మిల్లులు పట్టిన బియ్యం) వచ్చేలా చర్యలు తీసుకోవాలని కలెక్టర్‌ సూచించారు. మిల్లర్ల సామర్థ్యాన్ని బట్టి సీఎంఆర్‌ వచ్చేలా దృష్టి సారించాలన్నారు.
• ప్రజావాణిలో వచ్చిన అర్జీలను సంబంధిత శాఖల అధికారులు క్షుణ్ణంగా పరిశీలించి ప్రజా సమస్యలను పరిష్కరించాలని కలెక్టర్‌ సూచించారు. ప్రతి సోమవారం కలెక్టరేట్‌లో నిర్వహించే ప్రజావాణికి జిల్లా అధికారులందరూ తప్పనిసరిగా హాజరు కావాలని అదనపు కలెక్టర్‌ రాహుల్‌శర్మ అన్నారు. జిల్లా అధికారులు క్షేత్రస్థాయిలో పర్యవేక్షించడం లేదా అత్యవసరమైన పనులుంటే కలెక్టర్‌కు సమాచారమిచ్చి అనుమతి తీసుకోవాలన్నారు. సమాచారం లేకుండా ప్రజావాణికి గైర్హాజరైన అధికారులకు షోకాజ్‌ నోటీసులు ఇస్తామని హెచ్చరించారు. ప్రజావాణిలో వివిధ శాఖల జిల్లా అధికారులు పాల్గొన్నారు.