Parigi : రేషన్‌ బియ్యం ఎక్కడైన తీసుకోవచ్చు.. డీఎస్ఓ రాజేశ్వర్‌

పరిగి టౌన్‌ : రేషన్‌ బియ్యం ఎక్కడైన తీసుకోవచ్చని జిల్లా సివిల్‌ సప్లై అధికారి రాజేశ్వర్‌ సూచించారు. జన్‌సాహాస్ స్వచ్ఛంద సంస్థ ఆధ్వర్యంలో బుధవారం పరిగి మున్సిపల్‌ పరిధిలోని తుంకులగడ్డలో వన్‌నేషన్‌ వన్‌ రేషన్‌పై వలస కూలీలకు అవగాహన సదస్సు నిర్వహించారు. ఈ సందర్భంగా ఆయన మాట్లాడుతూ వివిధ రాష్ట్రాలకు చెందిన వలస కూలీల కోసం వన్‌ నేషన్‌ వన్‌ రేషన్‌ పథకాన్ని కేంద్రం ప్రవేశపెట్టిందని ఏ రాష్ట్రానికి చెందిన వారైన వలస కూలీలు తాము పనిచేసే చోట రేషన్‌ సరుకులు పొందవచ్చని చెప్పారు. రాష్ట్ర ప్రభుత్వం పోర్టేబుల్టీ ప్రవేశపెట్టిన తర్వాత ఏ జిల్లా వారైన వారు పనిచేసే చోట రేషన్‌కార్డు కలిగిన వారు రేషన్‌ సరుకులు పొందే వెసులుబాటు కల్పించిందన్నారు.

రేషన్‌ సరుకుల పంపిణీలో డీలర్లు ఇబ్బందులకు గురిచేస్తే నేరుగా తనకు ఫోన్‌ చేయాలని ఆయన సూచించారు. కార్యక్రమంలో ఎన్‌ఫోర్స్​‍మెంట్‌ డీటీ సురేష్‌, డిప్యూటీ తాసీల్దార్‌ నర్సింహారెడ్డి, ఆర్‌ఐలు నరేందర్‌, వెంకటరమణారెడ్డి, జన్‌సహాస్ జిల్లా కో-ఆర్డినేటర్‌ ప్రకాశ్‌కుమార్‌, మండల కో-ఆర్డినేటర్‌ రవీందర్‌, వాలంటీర్లు వంశీ, అశోక్‌, అసద్‌, మండల రేషన్‌డీలర్ల సంఘం అధ్యక్షుడు రాజు, డీలర్లు వేముల సత్యనారాయణగుప్తా, నాగేశ్‌ పాల్గొన్నారు.