సహజసిద్ధం..ఆరోగ్యం భద్రం

ఫిబ్రవరి మాసాంతం నుంచే ఎండలు మండిపోతున్నాయి. ఉదయం 9గంటలయ్యిందంటే ప్రజలు ఉక్కిరిబిక్కిరి అవుతున్నారు. భానుడి ప్రతాపానికి బయటకు రావాలంటే ఇబ్బందులకు గురవుతున్నారు.

• ఫిబ్రవరి మాసాంతం నుంచే మండుతున్న ఎండలు
• జాగ్రత్తలు పాటించాలంటున్న వైద్య నిపుణులు

ఫిబ్రవరి మాసాంతం నుంచే ఎండలు మండిపోతున్నాయి. ఉదయం 9గంటలయ్యిందంటే ప్రజలు ఉక్కిరిబిక్కిరి అవుతున్నారు. భానుడి ప్రతాపానికి బయటకు రావాలంటే ఇబ్బందులకు గురవుతున్నారు. ఈ క్రమంలో సహజసిద్ధంగా లభించే కొన్ని రకాల పానీయాలు, ఆహార పదార్థాలు తీసుకోవడంతో ఆరోగ్యానికి ఎంతో మేలు చేకూరుతుందని వైద్య నిపుణులు సూచిస్తున్నారు.

ప్రకృతిలో సహజసిద్ధంగా లభించే కొబ్బరిబొండం, చెరుకురసం, వివిధ రకాల పండ్ల రసాలు తీసుకోవడం ద్వారా ఆరోగ్యానికి ఎంతో ఉపశమనంగా ఉంటుందని చెబుతున్నారు. నీటి శాతం ఎక్కువగా లభించే కీరదోసతో ఆరోగ్యానికి ఎన్నో లాభాలున్నందున ప్రజలు శీతలపానీయాలపై మొగ్గు చూపకుండా చెరుకురసం, నిమ్మరసం, కొబ్బరిబొండంతోపాటు ప్రకృతిలో సహజ సిద్ధంగా లభించే వాటిని తీసుకోవటం ఆరోగ్యానికి ఎంతో మేలని వైద్య నిపుణులు సూచిస్తున్నారు.

– ఇబ్రహీంపట్నంరూరల్‌, మార్చి 10

పోషకాల గని.. కొబ్బరిబొండం..

ఎండాకాలంలో వేసవి తాపం నుంచి తక్షణ ఉపశమనం పొందాలన్న, అలసట నుంచి తక్షణ శక్తిని పొందాలన్న తప్పనిసరిగా కొబ్బరి నీళ్లు తాగాల్సిందే. మనిషి అనారోగ్యానికి గురైతే గ్లూకోజ్‌ ఎక్కిస్తారు. గ్లూకోజ్‌లో ఉండే పోషకాల కంటే అధికంగా కొబ్బరిబొండంలో లభిస్తాయని వైద్యులు చెబుతున్నారు. దీంతోపాటు రోగ నిరోధక శక్తి పెరుగుతుంది. రక్తాన్ని శుద్ధి చేసే గుణం కొబ్బరి నీళ్లలో ఉంటాయి. కడుపులో అప్పుడప్పుడు వచ్చే మంటలను తగ్గించడానికి టానిక్‌లా పనిచేస్తుంది. మనిషి శరీరంలో లవణాల శాతాన్ని పెంచడానికి కూడా ఈ నీళ్లు ఎంతో ఉపయోగపడుతాయి.

కొబ్బరినీళ్లను ఎప్పుడైనా ఎవరైనా తాగవచ్చునని డాక్టర్లు సూచిస్తున్నారు. కొబ్బరిబొండంలో సోడియం, పొటాషియం, క్యాల్షియం, ఫాస్ఫరస్‌, ఐరన్‌, సల్ఫర్‌, క్లోరైడ్‌, ప్రొటీన్స్‌, ఇతర ఖనిజాలు పుష్కలంగా ఉంటాయి. పాలలోని ప్రొటీన్ల కంటే కొబ్బరి నీళ్లలో ఎక్కువగా ఉంటాయని.. శరీరంలో లవణాల శాతం పడిపోయినప్పుడు ఈ నీళ్లను ఉపయోగించాలని డాక్టర్లు సూచిస్తున్నారు. మూత్రపిండాల సమస్య ఉంటే కొంతమేరకు తగ్గించాలి. మార్కెట్‌లో దొరికే వివిధ రసాయనాలతో తయారుచేసిన చల్లని పానీయాల కంటే వంద రెట్లు ఆరోగ్యం పంచే కొబ్బరిబొండం మేలని అంటున్నారు.

దివ్యౌషధం.. చెరుకు రసం..

అనాదిగా వస్తున్న చెరుకు రసాన్ని అన్ని కాలాల్లో తయారుచేసి విక్రయిస్తుంటారు. ప్రధానంగా వేసవిలో దీని విక్రయాలు జోరుగా సాగుతుంటాయి. ప్రస్తుతం పల్లె, పట్టణం తేడా లేకుండా చెరుకు రసాన్ని విక్రయిస్తున్నారు. ధర అందుబాటులో ఉండి, ఆరోగ్యాన్ని ఇచ్చే చెరుకు రసంలో పోషకాలు పుష్కలంగా ఉన్నాయని, మండుటెండల నుంచి ఉపశమనం పొందేందుకు చెరుకు రసం ఎంతో ఉపయోగపడుతుందని వైద్యాధికారులు అంటున్నారు.

ఉపయోగాలు..

• చెరుకు రసంతో అలసట తీరడమే కాకుండా మూత్ర సమస్యను నివారిస్తుంది.
• రక్తంలో చక్కెర శాతం తగ్గి, కళ్లు తిరుగుతున్నట్లు అనిపించినప్పుడు చెరుకు రసం తాగితే ఉపశమనం పొందవచ్చు.
• ఇందులో కొద్దిగా నిమ్మ రసం కలిపి తాగితే జీర్ణశక్తి సులువవుతుంది.
• చెరుకు రసంలో ఉత్తమ రకం లోహం లభ్యమవుతుంది. అది త్వరగా రక్తంలో కలిసిపోయి రక్తహీనతను దూరం చేస్తుంది.
• చెరుకు రసాన్ని మరిగించి తాగినట్లయితే మలబద్దకం ఉండదు.
• చెరుకు రసంలో అల్లం కలిపి తాగితే గొంతు గరగర నుంచి ఉపశమనం పొందవచ్చు.
• పచ్చకామెర్లను చాలా వరకు కంట్రోల్‌ చేస్తుంది.
• ఇందులో విటమిన్‌ బి ఉన్నందున దీన్ని సర్వశ్రేష్టమైన సర్వ్‌ టానిక్‌ అని అంటారు.
• వాంతులు అయినప్పుడు దీన్ని తాగితే సమస్యను నివారిస్తుంది.

ఆరోగ్యధార.. కీర..

మనకు ఎల్లవేళలా అందుబాటులో ఉంటూ.. అతి తక్కువ ధరకు లభించే వాటిల్లో కీరదోస ఒకటి. ఇది వేసవితాపం నుంచి ఉపశమనం కలిగించడమే కాకుండా ఆరోగ్యానికి ఎంతో మేలు చేస్తుంది. రోడ్ల పక్కన, తోపుడు బండ్లపై లభించడంతో పాటు కూరగాయల మార్కెట్‌లో కూడా కీర దోసకాయలు విరివిగా లభిస్తాయి. కీరదోసను భోజనంలో తీసుకోవడం ద్వారా కూడాఎన్నో లాభాలున్నాయని వైద్యాధికారులు తెలియజేస్తున్నారు. కీరదోస ఎండ నుంచి ఉపశమనం కలిగిస్తుందని.. కీరను తీసుకోవడం ద్వారా కొన్ని వ్యాధులు దరిచేరవని వైద్యాధికారులుంటున్నారు.

లాభాలు..

• కీరలో 95 శాతం నీళ్లే ఉంటాయి. దీంతో డీహైడ్రేషన్‌ సమస్య రాకుండా ఉంటుంది. శరీరంలో పేరుకున్న వ్యర్థాలు కూడా పోతాయి. సాధ్యమైనంత వరకు పొట్టు తీయకుండా శుభ్రంగా కడిగి తినడం మంచిదంటారు వైద్యులు. ఎందుకంటే కీరదోస పొట్టులో సీ విటమిన్‌ ఉంటుంది. దాన్ని అలాగే తీసుకోవడం వల్ల ఒక రోజులో శరీరానికి అవసరమయ్యే సి విటమిన్‌ పది శాతం అందుతుంది.
• నీటి శాతం ఎక్కువగా ఉండటం.. కేలరీలు తక్కువగా ఉండటం వల్ల బరువు తగ్గాలనుకునేవారికి దీన్ని మించిన ప్రత్యామ్నాయం మరొక్కటిలేదు. కీరదోసలో పీచు కూడా ఎక్కువే. మలబద్దకంతో బాధపడేవారు రోజూ కీరదోసను తీసుకోవడం వల్ల ఆ సమస్య సులువుగా అదుపులోకి వస్తుంది. అదే సమయంలో జీర్ణక్రియ పనితీరు కూడా మెరుగుపడుతుంది.
• కీరదోస కొవ్వును బాగా తగ్గిస్తుంది. ఇందులో పొటాషియం, మెగ్నీషియం, పీచు శాతం ఎక్కువ. ఇవి అధిక రక్తపోటును అదుపులో ఉంచుతాయి. ఒకవేళ తక్కువగా ఉన్నా బ్యాలెన్స్‌ చేస్తాయి. ఇంకా స్పష్టంగా చెప్పాలంటే ఇది అధిక రక్తపోటు ఉన్నవాళ్లకే కాదు.. లోబీపీ ఉన్నవారికీ మేలు చేస్తుంది.
• కీరదోసలో ఉండే సిలికా కీళ్లను పటిష్టంగా ఉంచుతుంది. ఎ, బీ1, బీ6, సి, డి విటమిన్లు, పొలేట్‌, క్యాల్షియం లాంటి పోషకాలు ఇందులో అధికంగా ఉంటాయి. కీరను క్యారెట్‌తో కలిపి జ్యూస్‌లా చేసుకుని తాగడం వల్ల కీళ్ల నొప్పుల్ని తగ్గించుకోవచ్చు. ప్రధానంగా కీరదోసలో బి విటమిన్‌ ఎక్కువ.