Visit:
Tejaswini | నటసింహం నందమూరి బాలకృష్ణ కుటుంబం నుంచి మరొకరు ఇండస్ట్రీలోకి అడుగుపెట్టనున్నారనే వార్తలు ఫిలింనగర్లో జోరుగా వినిపిస్తున్నాయి. బాలకృష్ణ చిన్న కుమార్తె తేజస్విని నందమూరి త్వరలోనే వెండితెరపై కనిపించనున్నారనే ప్రచారం ప్రస్తుతం సినీ వర్గాల్లో హాట్ టాపిక్గా మారింది. ఒక మంచి సామాజిక సందేశాన్ని అందించే స్పోర్ట్స్ డ్రామా ద్వారా ఆమె నటిగా పరిచయం కానున్నట్లు సమాచారం. ఈ ప్రాజెక్ట్కు సంబంధించిన కథా చర్చలు ప్రస్తుతం జరుగుతున్నాయని టాక్ వినిపిస్తోంది. అయితే దీనిపై ఇప్పటివరకు ఎలాంటి అధికారిక ప్రకటన వెలువడలేదు.వ్యక్తిగత జీవితంలో తేజస్విని, విశాఖపట్నం ఎంపీ మరియు గీతం విద్యాసంస్థల అధినేత ఎం. శ్రీభరత్ను వివాహం చేసుకున్నారు. కుటుంబ బాధ్యతలను సమర్థంగా నిర్వహిస్తూనే సినీ రంగానికి సంబంధించిన పలు కీలక వ్యవహారాల్లో కూడా ఆమె చురుకుగా పాల్గొంటున్నారు.
ముఖ్యంగా ప్రముఖ ఓటీటీ వేదిక ఆహాలో బాలకృష్ణ హోస్ట్గా చేసిన సూపర్హిట్ టాక్ షో ‘అన్స్టాపబుల్’ విజయానికి తేజస్విని క్రియేటివ్ కన్సల్టెంట్గా కీలక పాత్ర పోషించారు. అలాగే బాలయ్య సినిమాల నిర్మాణ వ్యవహారాలతో పాటు మోక్షజ్ఞ సినీ అరంగేట్రానికి సంబంధించిన పనులను కూడా ఆమె దగ్గరుండి పర్యవేక్షిస్తున్నట్లు తెలిసిందే.సోషల్ మీడియాలో కూడా తేజస్విని తన డ్యాన్స్ వీడియోలతో మంచి గుర్తింపు సంపాదించారు. ప్రముఖ కొరియోగ్రాఫర్ భాను మాస్టర్తో కలిసి చేసిన డ్యాన్స్లు వైరల్గా మారగా, ముఖ్యంగా ‘సారంగ దరియా’ పాటకు ఆమె చేసిన ప్రదర్శన అభిమానులను ఆకట్టుకుంది. ఆమె డ్యాన్స్లో కనిపించిన ఎనర్జీ, గ్రేస్ను చూసి కొందరు అభిమానులు ఎన్టీఆర్ స్టైల్తో పోలుస్తూ ప్రశంసలు కురిపించారు.
ఇటీవల సిద్ధార్థ్ ఫైన్ జ్యువెలర్స్ ప్రకటనలో బ్రాండ్ అంబాసిడర్గా కెమెరా ముందుకు వచ్చిన తేజస్విని, తన ఆత్మవిశ్వాసం మరియు స్క్రీన్ ప్రెజెన్స్తో ఆకట్టుకున్నారు. దీంతో ఆమె త్వరలోనే నటిగా ఎంట్రీ ఇవ్వబోతున్నారనే వార్తలకు మరింత బలం చేకూరింది. అయితే ప్రస్తుతం ఈ సమాచారం మొత్తం సినీ వర్గాల్లో జరుగుతున్న ప్రచారం మాత్రమే. తేజస్విని నటిగా అరంగేట్రం చేస్తారా? చేస్తే ఏ సినిమా ద్వారా ప్రేక్షకుల ముందుకు వస్తారు? అనే విషయాలపై స్పష్టత రావాలంటే అధికారిక ప్రకటన వచ్చే వరకు వేచి చూడాల్సిందే.
