Visit:
హైదరాబాద్జూన్31 (నమస్తే తెలంగాణ) : తెలంగాణ సచివాలయంలో పనిచేస్తున్న ఓ మహిళా అసిస్టెంట్ సెక్షన్ ఆఫీసర్ కు అక్కడే పనిచేసే మరో అధికారి నుంచి లైంగిక వేధింపులు ఎదురైనట్టు ఆరోపణలొచ్చాయి. ఓ కీలక విభాగంలో సెక్షన్ ఆఫీసర్గా పనిచేస్తున్న ఉద్యోగి ఒకరు తనను లైంగికంగా వేధిస్తున్నాడంటూ ఆ మహిళా అధికారి.. నేరుగా చీఫ్ సెక్రటరీకి ఫిర్యాదు చేసినట్టు సమాచారం.
దీనిని చీఫ్ సెక్రటరీ తీవ్రంగా పరిగణించినట్టు తెలిసింది. వేధింపులకు పాల్పడిన ఆ అధికారిపై ఇప్పటికే కోర్టు ధికరణతోపాటు ఇతర ఆరోపణలు కూడా ఉన్నట్టు గుర్తించినట్టు తెలిసింది. బాధ్యుడైన సదరు ఆఫీసర్ను వెంటనే ఆ శాఖ నుంచి తప్పించి జనరల్ అడ్మినిస్ట్రేషన్ డిపార్ట్మెంట్ (జీఏడీ)కు సరెండర్ చేస్తూ ఉత్తర్వులు జారీ చేసినట్టు అధికార వర్గాలు తెలిపాయి. విచారణ నివేదిక ఆధారంగా తదుపరి చర్యలు తీసుకొనే అవకాశం ఉన్నదని తెలుస్తున్నది.
