రంగుల కేళీ.. హోలీ

కులమతాలకతీతంగా అందరూ జరుపుకొనే పండుగ హోలీ. వేడుకల కోసం నగర శివారుల్లోలని పలు రిసార్టులు, ఫామ్‌హౌస్‌లు, గేటెడ్‌ కమ్యూనిటీల్లో ఏర్పాట్లు ముమ్మరంగా జరుగుతున్నాయి. అంతా కలిసి ఒకే చోట హోలీ ఆడేందుకు సిద్ధమవుతున్నారు. ఖర్చు ఎక్కువయినా వెనుకాడటంలేదు. రెయిన్‌ డ్యాన్సులు, డీజేలు తప్పనిసరిగా చేసుకుంటున్నారు. గేటెడ్‌ కమ్యూనిటీల్లో ప్రత్యేకంగా ఫుడ్‌ స్టాళ్లను ఏర్పాటు చేయిస్తున్నారు.

• రసాయన రంగులు ప్రమాదకరం.. సంప్రదాయ రంగులే సేఫ్‌..
• పండుగ నిర్వహణకు రిసార్టులు, గేటెడ్‌ కమ్యూనిటీల్లో జోరుగా ఏర్పాట్లు
• రంగులు చల్లుకునే సమయంలో జాగ్రత్తలు పాటించాలంటున్న వైద్య నిపుణులు

కులమతాలకతీతంగా అందరూ జరుపుకొనే పండుగ హోలీ. వేడుకల కోసం నగర శివారుల్లోలని పలు రిసార్టులు, ఫామ్‌హౌస్‌లు, గేటెడ్‌ కమ్యూనిటీల్లో ఏర్పాట్లు ముమ్మరంగా జరుగుతున్నాయి. అంతా కలిసి ఒకే చోట హోలీ ఆడేందుకు సిద్ధమవుతున్నారు. ఖర్చు ఎక్కువయినా వెనుకాడటంలేదు. రెయిన్‌ డ్యాన్సులు, డీజేలు తప్పనిసరిగా చేసుకుంటున్నారు. గేటెడ్‌ కమ్యూనిటీల్లో ప్రత్యేకంగా ఫుడ్‌ స్టాళ్లను ఏర్పాటు చేయిస్తున్నారు. ఈ పండుగపూట రసాయన రంగులు వాడి రోగాలు కొనితెచ్చుకోకుండా సహజసిద్ధంగా లభించే మందులను వాడాలని వైద్య నిపుణులు సూచిస్తున్నారు. రంగులు చల్లుకునే సమయంలో కండ్లు, ముక్కు, నోట్లోకి వెళ్లకుండా జాగ్రత్తలు పాటించాలంటున్నారు.
– ఇబ్రహీంపట్నం/పెద్దఅంబర్‌పేట, మార్చి 13

పసుపుతో చేసిన రంగులు వ్యాధి నిరోధక శక్తిని పెంపొందిస్తాయి. తులసి ఆకులతో చేసిన రంగులు మానసికోల్లాసానికి తోడ్పడతాయి. శ్వాసక్రియ శక్తిని పెంచుతాయి. కలబంద, వేపాకులు చర్మ వ్యాధులను తగ్గిస్తాయి. దురదల నివారణకు ఉపయోగపడతాయి. గోరింటాకు శరీర పగుళ్లను నివారిస్తుంది. గంధంపొడి మనసుకు ప్రశాంతత కలిగించడంతో పాటు సువాసన వెదజల్లుతుంది.

రసాయన రంగులతో చర్మ వ్యాధులు
వసంతకాలం వాతావరణంలో చోటుచేసుకునే మార్పులతో వ్యాధులు ప్రబలుతాయి. ఈ సమయంలో సహజసిద్ధమైన రంగులు శరీరానికి ఔషధంలా పనిచేస్తాయి. పూర్వం నిమ్మ, కుంకుమపువ్వు, పసుపు, బిల్వాలతో సహజ రంగులను తయారుచేసి హోలీ ఆడేవారు. కాలక్రమేణా రసాయనాలతో తయారుచేసిన రంగుల వాడకం పెరిగి సహజ రంగుల వాడకం తగ్గింది. రసాయన రంగులతో ఈ పండుగ ఎంత ఉల్లాసాన్ని నింపుతుందో.. అంతే విషాదాన్ని మిగుల్చుతుంది.

రంగుల్లో వాడే రసాయన పదార్థాలతో శరీరానికి హాని కలిగే అవకాశాలు ఎక్కువగా ఉంటాయి. కళ్లమంటలు, ఆస్తమా, చర్మ వ్యాధులు సంభవిస్తాయని వైద్య నిపుణులు చెబుతున్నారు. నలుపు రంగులో లెడ్‌ ఆక్సైడ్‌ ఉంటుందని, ఇది మూత్రపిండాలను పాడు చేస్తుందని, వెండి రంగులో ఉండే మెర్క్యూరీ సల్ఫేట్‌తో క్యాన్సర్‌ సోకే అవకాశముందని హెచ్చరిస్తున్నారు. ఆకుపచ్చ రంగుల్లో ఉండే కాపర్‌ సల్ఫేట్‌ ద్వారా ఎలర్జీతో పాటు శాశ్వత అంధత్వం వచ్చే అవకాశం ఉంది. పొడిగా ఉండే రంగుల్లో జిలెటిన్‌పైలట్‌ కలవడం వల్ల మైకంతో పాటు ఆస్తమా, అంధత్వం వచ్చే అవకాశం ఉందని శాస్త్రవేత్తల పరిశోధనల్లో తేలింది. అందువల్ల హోలీ పండుగలో రసాయన రంగులకు బదులు సహజ రంగులు వాడటం ఎంతో శ్రేయస్కరం.

సహజ రంగుల తయారీ విధానం

• పసుపు, కుంకుమ, పూలు, పండ్లు వివిధ రకాల పిండిని నీటిలో కలిపి ఉపయోగించుకోవచ్చు.
• మోదుగు పూలను ఉడకబెట్టి సహజసిద్ధమైన రంగు తయారు చేసుకుని వాడవచ్చు.
• గంధం, ఎర్ర మందారం, గోగుపూలు, దానిమ్మతొక్క, టమాట, క్యారెట్‌, పసుపు, సున్నం, మిశ్రమం కలిస్తే ఎరుపురంగు వస్తుంది.
• శనగపిండి, పసుపు మిశ్రమం, బంతి, చామంతిపూల మిశ్రమంతో పసుపు రంగు వస్తుంది.
• గోరింటాకు, గుల్‌మొహర్‌ ఆకులు, గోధుమ మొలకలు, పాలకూర, కొత్తిమీర, పుదీనాతో ఆకుపచ్చ రంగు తయారుచేసుకోవచ్చు.
• ఇండిగో ప్లాంట్‌ (సిరాచెట్టు) కాయలతో నీలి రంగు తయారుచేసుకోవచ్చు.
• బీట్‌రూట్‌, ఉల్లిపాయ తొక్కల మిశ్రమంతో ముదురుకెంపు రంగు వస్తుంది. పారిజాత పూల కాండాలను ఎండబెట్టి నానబెడితే సింధూరం రంగు వస్తుంది.
• బ్రౌన్‌ కలర్‌ కోసం కాఫీ లేడా టీ పొడి కలిపి వడపోసిన నీళ్లు లేదా మరగబెట్టిన నీళ్లు ఉపయోగించుకోవచ్చు.
• నల్ల ద్రాక్ష రసం లేదా ఎండబెట్టిన పెద్ద ఉసిరికాయలను ఉడికించి రాత్రంతా అలా వదిలేసి మరునాడు నీటిలో కలిపితే నలుపురంగు తయారవుతుంది. ఎర్ర చందనాన్ని నీటిలో కలిపి ఎరుపు రంగు పొందవచ్చును. గోరింటాకును రుబ్బి పిండిలో కలిపితే ఆకుపచ్చ రంగును తయారు చేసుకోవచ్చు.
• రెండు చెంచాల గంధపు పొడిని లీటర్‌ నీటిలో కలిపి మరగబెడితే ఎరుపురంగు ద్రావణం తయారు చేసుకోవచ్చు.
• నీలి మందును నీటిలో కలిపితే నీలి రంగు వస్తుంది.
• తులసి, వేప, కలబంద కలిపి నూరి నీటిలో కలిపితే ముదురు ఆకుపచ్చ వర్ణం వస్తుంది.

తీసుకోవాల్సిన జాగ్రత్తలు

• రసాయన మందులతో కళ్లకు హాని కలగకుండా సన్‌గ్లాసెస్‌ వాడాలి. దంతాలపై రంగులు పడకుండా డెంటల్‌ క్యాప్స్‌ వేసుకోవాలి.
• హోలీ వేడుకల్లో మందపాటి పాత దుస్తులు ధరించాలి.
• ముదురు రంగు దుస్తులు మంచిది. పుల్‌హ్యాండ్స్‌ షర్ట్‌, చేతులకు గ్లౌజ్‌లు, కాళ్లకు సాక్సులు వేసుకోవాలి.
• కళ్లల్లో రంగు పడితే వెంటనే చల్లని నీటితో శుభ్రం చేసుకోవాలి. మంట అనిపిస్తే వైద్యుడిని సంప్రదించాలి.
• తలపై రంగులు పడకుండా క్యాప్‌ పెట్టుకోవాలి. రంగులు చల్లుకోవడం పూర్తయ్యాక గోరువెచ్చని నీటితో స్నానం చేయాలి.