పంటల మార్పిడితో.. భూసారానికి మేలు

మరికొన్ని రోజుల్లో వర్షాకాలం పంటల సాగు ప్రారంభమయ్యే నేపథ్యంలో రైతులు ఒకేరకం పంటల సాగుపై దృష్టి సారించకుండా పంటల మార్పిడి విధానంపై దృష్టి సారించాలని వ్యవసాయాధికారులు, వ్యవసాయ నిపుణులు సూచిస్తున్నారు.

• రోగకారక జీవుల కట్టడికి దోహదం
• ప్రత్యేక సూచనలిస్తున్న వ్యవసాయాధికారులు

ఇబ్రహీంపట్నం, మే 8 : మరికొన్ని రోజుల్లో వర్షాకాలం పంటల సాగు ప్రారంభమయ్యే నేపథ్యంలో రైతులు ఒకేరకం పంటల సాగుపై దృష్టి సారించకుండా పంటల మార్పిడి విధానంపై దృష్టి సారించాలని వ్యవసాయాధికారులు, వ్యవసాయ నిపుణులు సూచిస్తున్నారు. ఒకేరకమైన పంటలను సాగుచేయటం వలన భూమిలోని సారం తగ్గిపోవటంతో పాటు క్రిమికీటకాలు ఇంకా వృద్ధి చెందే అవకాశమున్నది. దీని నివారణకు రైతులు ఒకేరకమైన పంటలను సాగుచేయటం విధానానికి స్వస్తి చెప్పి పంటల మార్పిడి విధానాన్ని చేపట్టాలని వ్యవసాయాధికారులు సూచిస్తున్నారు. ఒకేరకమైన పంటలను సాగుచేయటం వల్ల పొలాల్లో భూసారం తగ్గుతుంది. రోగాలను కలిగించే పురుగుల సంఖ్య బాగా పెరిగి దిగుబడి తగ్గుతుంది. పంటల మార్పిడి వల్ల భూమిలోని పోషకాలు సంవృద్ధిగా అందుతాయి. పంటల మార్పిడితో కలిగే

ప్రయోజనాలపై ప్రత్యేక కథనం..

• ఒకేపొలంలో ఒక పంటను వరుసగా పండించటం వల్ల చీడపీల ఉధృతి అధికంగా కావడానికి అనుకూల పరిస్థితులు ఏర్పడుతాయి.
• పురుగు జీవితచక్రం పూర్తి చేసుకుని తీవ్రమైన హాని కలిగించే స్థితికి చేరుకుంటుంది.
• పంట మార్పిడి చేసినప్పుడు పురుగు జీవితచక్రం ఛేదించబడుతుంది. ఎందుకంటే ఒక పంటపై ఆశించే పురుగులు మరొక్క పంటపై ఆశించడం సాధారణంగా జరుగదు.
• వేగంగా వృద్ధి చెందే కొన్ని రకాల పురుగులను పంట మార్పిడి వల్ల అదుపులో పెట్టవచ్చు.
• ఒకే లోతు వ్యవస్థ కలిగిన పంటలను ఉదాహరణకు పత్తి, మిరప మొదలైన పంటలను మార్పిడి చేయకుండా సాగుచేయటం వల్ల ఒకే లోతు పొరల నుంచి పోషకాలు తీసుకోవడంతో నేల నిస్సారమవుతుంది.
• వరి, వేరుశెనక, జొన్న, మొక్కజొన్న వంటి పైర్లు నేలపై పొరల నుంచి పోషకాలను తీసుకుంటాయి. నేల భౌతిక లక్షణాలు, స్వభావం దెబ్బతినకుండా ఉండటానికి, చీడపీడల అభివృద్ధిని నిరోధించడానికి పంట మార్పిడి తప్పక చేయాలి.
• అప్పుడప్పుడు అవసరాన్ని బట్టి పశుగ్రాసం కోసం గడ్డిజాతిపైర్లు, భూసారాన్ని పెంచడానికి పచ్చిరొట్ట పైర్లు వేసుకోవాలి.

పంటలు సాగుచేయాల్సిన విధానం..

• వరి తర్వాత మినుము, పెసర, శనగ వేయటం వల్ల సుడిదోమ, టుంగ్రో వైరస్‌ను నివారించవచ్చు.
• చెరకు తర్వాత వరి వేయటం వల్ల వేరు పురుగును తగ్గించొచ్చు. అలాగే, వరిలో దోమపోటు నివారించవచ్చును.
• పత్తివేసిన పొలంలో జొన్న, మొక్కజొన్న, నువ్వులు, మినుములు వేస్తే లద్దె పురుగు, పచ్చ పురుగులను నివారించవచ్చు.
• జొన్న, మొక్కజొన్న తర్వాత కందిని సాగుచేస్తే కాయ తొలుచు పురుగు ఉధృత్తి తగ్గుతుంది.
• వరిని సాగుచేసే పొలంలో ముందుగా పప్పుధాన్యాలను సాగుచేయడం వల్ల నేల సారవంతమవుతుంది.
• వేరుశనగలో ఆకుముడతను నివారించేందుకు పప్పుజాతికి చెందిన పైర్లు వేయాలి.
• కంది, మిరప పంటల్లో ఎండు తెగులు నివారణకు జొన్న, మొక్కజొన్న పంటలు సాగుచేయాలి.
• నులి పురుగు సమస్య అధికంగా ఉన్న ప్రాంతాల్లో వేరుశెనగ, మిరప, పొగాకు, వంగపైర్ల సాగును కొన్ని పంట కాలాల వరకు ఆపాలి.
• ఆహార పంటలైన వరి, జొన్న, మొక్కజొన్న, సజ్జ పంటలను పప్పుజాతి పంటలైన పెసర, మినుము, వేరుశనగ సాగుతో మార్పిడి చేయాలి.
• ఆహార వాణిజ్య పంటలను పశుగ్రాస పైర్లతో మరోసారి మార్పిడి చేయడం లాభదాయకం.

ఒకే రకమైన పంటలకు స్వస్తి పలకాలి

రైతులు ఒకేరకమైన పంటలు సాగుచేయడం ద్వారా ఆ పంట మొక్కలకు అవసరమైన పోషకాలు తక్కువవుతాయి. రోగకారక పురుగుల ఉధృతి పెరిగి దిగుబడి తగ్గుతుంది. వరుసగా ఒకే పంటను కాకుండా వివిధ రకాల పంటల సాగుతో పురుగుల జీవిత చక్రాన్ని నిలిపివేయవచ్చు. దాంతో రైతులు మంచి లాభాలను పొందగలుగుతారు. రైతులు ఒకేరకమైన పంటల సాగుకు పూర్తిగా స్వస్తి చెప్పి పంటల మార్పిడి విధానానికి శ్రీకారం చుట్టడం ద్వారా మంచి లాభాలు గడించే వీలుంటుంది.

-శ్రవణ్‌కుమార్‌, ఏఈవో