అస్తమాతో.. జాగ్రత్త

అస్తమా(ఉబ్బసం) వ్యాధి దీర్ఘకాలం పాటు విడువకుండా వేధించే క్రానిక్‌ డీసిజ్‌. ఈ సమస్యతో ఊపిరితిత్తులోకి ప్రాణవాయువును తీసుకువెళ్లే శ్వాసకోశ నాళాలు, లోపాల గోడలు ఉబ్బిపోతాయి. ఫలితంగా శ్వాస తీసుకోవడం కష్టంగా మారుతుంది.

• ఏటా పెరుగుతున్న వ్యాధిగ్రస్తులు
• చలికాలంలో సమస్య తీవ్రం
• చిన్నారులపై తీవ్ర ప్రభావం
• దీర్ఘకాలికం గాకుండా జాగ్రత్తలు మేలు

అస్తమా(ఉబ్బసం) వ్యాధి దీర్ఘకాలం పాటు విడువకుండా వేధించే క్రానిక్‌ డీసిజ్‌. ఈ సమస్యతో ఊపిరితిత్తులోకి ప్రాణవాయువును తీసుకువెళ్లే శ్వాసకోశ నాళాలు, లోపాల గోడలు ఉబ్బిపోతాయి. ఫలితంగా శ్వాస తీసుకోవడం కష్టంగా మారుతుంది. ప్రత్యేకించి పెద్దవారి కంటే ఈ వ్యాధి వల్ల పిల్లల్లోనే ముప్పు ఎక్కువ. ఎందుకంటే వారి శ్వాసకోశ నాళాలు చాలా చిన్నవిగా ఉంటాయి. అస్తమాతో చిన్నారులకు ఎక్కువగా ప్రాణాపాయం ఉంటుంది. మారుతున్న వాతావరణ పరిస్థితులు, కాలుష్యంతో రెండు దశాబ్దాలుగా అస్తమా వ్యాధిగ్రస్తుల సంఖ్య ఏడాదికేడాది పెరుగుతున్నది. ఈ పరిస్థితుల్లో తల్లిదండ్రులు చిన్నారులపై ప్రత్యేక జాగ్రత్తలు తీసుకోవాల్సిన అవసరముంది. లేదంటే వ్యాధి తీవ్రత పెరిగి దీర్ఘకాలిక వ్యాధిగా సంక్రమించే అవకాశం ఉంది.

ఆధునిక వైద్య విధానాలు

ప్రాథమిక స్థాయిలోనే అస్తమాను గుర్తిస్తే త్వరగా నయం చేయవచ్చు. వ్యాధి ముదిరితే దీర్ఘకాలిక చికిత్స అవసరం అవుతుంది. గతంలో ఈ వ్యాధి నివారణ కోసం ట్యాబ్లెట్లు, ఇంజక్షన్లు వాడేవారు. దీంతో కొన్ని దుష్పరిణామాలు చోటు చేసుకునేవి. చేతులు, కాళ్లు వణకడం, షుగర్‌, బీపీ వంటి సమస్యలు ఎదురయ్యేవి. ఇటీవల కాలంలో పీల్చే మందులు అందుబాటులోకి వచ్చాయి. వీటిని స్వల్ప, దీర్ఘకాలిక కోర్సులుగా వాడుతున్నారు.

పెరుగుతున్న పట్టణీకరణ, వాతావరణ కాలుష్యంతో అస్తమా బాధితులు ఎక్కువవుతున్నారు. పరిశ్రమలు విస్తరించడం, వాహనాల కాలుష్యం మరో కారణం. నివాస గృహాలతో పాటు పరిసరాల పరిశుభ్రత లేకపోవడం, ఇంట్లో వాడే దిండ్లు, పరుపుల్లో పేరుకున్న దుమ్ము వల్ల అస్తమా బారినపడే ప్రమాదముంది. తడి గోడల వల్ల డస్ట్‌ మైట్స్‌ సూక్ష్మ క్రిములు చేరి వ్యాధి కారకాలుగా మారే అవకాశముంది. మరోవైపు పెరుగుతున్న పరిశ్రమల వల్ల భవిష్యత్‌లో అస్తమా వ్యాధిగ్రస్తులు పెరిగే అవకాశముందని వైద్యవర్గాలు హెచ్చరిస్తున్నాయి.
తీసుకోవాల్సిన జాగ్రత్తలు

• అలర్జీ కారకాలకు సాధ్యమైనంత దూరంగా ఉండాలి
• దుప్పట్లు, దిండు కవర్లు తరచూ వేడి నీటిలో శుభ్రంగా ఉతికి వాడుకోవాలి
• ధుమ్ము, ధూళి ఉన్న చోటికి వెళ్లకుండా ఉండడం మంచిది.
• ఇల్లు ఊడవడానికి బదులుగా తడి గుడ్డతో తుడవడం వల్ల దుమ్మ నుంచి ఉపశమనం కలుగుతుంది.
• పెంపుడు జంతువులకు సాధ్యమైనంత వరకు దూరంగా ఉండాలి.
• పుప్పొడి రేణువులు గాలిలో ఎక్కువగా ఉండే సీజన్లలో తగిన జాగ్రత్తలు తీసుకోవాలి.
• శీతల పానీయాలు, ఐస్‌క్రీంలు, ఫ్రిజ్‌ వాటర్‌కు వీలైనంత దూరంగా ఉండాలి.

అస్తమాకు చికిత్స

• అస్తమా వ్యాధిగ్రస్తులు ప్రాథమిక దశలోనే వైద్యులను సంప్రదించి చికిత్స చేయించుకోవాలి.
• ఊపిరితిత్తుల పరీక్షలు చేసి అస్తమాకు చికిత్సలు పొందవచ్చు.
• యోగా, వ్యాయామంతో అస్తమాను నియంత్రణలో ఉంచుకోవచ్చు.
• ప్రస్తుతం ఎన్నో రకాల మందులు వ్యాధి నియంత్రణకు అందుబాటులో ఉన్నాయి.

వ్యాధి లక్షణాలు

• దగ్గు
• రాత్రి వేళల్లో సరిగా నిద్ర పట్టకపోవడం
• శ్వాస తీసుకోవడంలో ఇబ్బందులు పడడం వ్యాధికి కారణాలు
• కాలుష్యం ప్రధాన కారణం
• వంశపారపర్యంగా వచ్చే అస్తమా
• ధూమపానం అధికం కావడం
• ఆస్సిరిన్‌, బీటా బ్లాకర్స్‌ వంటి మందుల వల్ల
• పారిశ్రామిక వాడల్లో వెదజల్లే రసాయనాల కాలుష్యం వల్ల