పోలీసుల ఆత్మహత్యలను ఇలా ఆపవచ్చు

నేను ఐపీఎస్‌ అధికారిని అయినా, నాదీ మీ అందరి లాంటి నేపథ్యమే. మారుమూల ప్రాంతాల్లో చదవడం, మంచి అవకాశాల కోసం నగరాలకు రావడం, ఎన్ని ఇబ్బందులు ఎదురైనా ఏదో సాధించాలనే పట్టుదలతో రాత్రింబవళ్లు చదవడం, చివరికి విజయం సాధించడం... తర్వాత పోలీసు అకాడమీలో ట్రైనింగ్‌ ఒక గొప్ప అనుభూతి .

తెలంగాణలో గత ముప్పై రోజుల్లోనే ఆరుగురు పోలీసులు తమ విలువైన ప్రాణాలను చేజేతులా నాశనం చేసుకున్నారు. మొన్న కూడా ఒక కానిస్టేబుల్‌ ఆత్మహత్య చేసుకున్నారు. ఈ పరంపర ఇంతటితో ఆగాలి. ప్రియమైన పోలీసు మిత్రులారా…: గత ముప్పై ఏండ్లుగా నేనూ ఆయుధాల మధ్యనే బతుకుతున్నా. సర్వీసులో ఎన్నో చెప్పుకోలేని అవమానాలు, నిరాశలు, సహచరుల అకాల మరణాల వంటి ఎన్నో బాధలు ఎదురయ్యాయి. కొన్ని నెలల తరబడి పోస్టింగ్‌ ఇవ్వకుండా నన్ను ఇంట్లో కూర్చోబెట్టారు కూడా. అయినా నేను ఎన్నడూ మద్యానికి బానిస కాలేదు. నాకెన్నడూ ఆత్మహత్య చేసుకోవాలనిపించలేదు. భవిష్యత్తులో కూడా నాకు ఆ ఆలోచన రాదు. ఆ రహస్యం ఏమిటో మీకు చెప్పాలని ఉంది. దీనివల్ల మీరు, మీ కుటుంబాలు సజీవంగా, సంతోషంగా ఉంటాయనే చిన్న ఆశ, నమ్మకం నాకున్నది.

నేను ఐపీఎస్‌ అధికారిని అయినా, నాదీ మీ అందరి లాంటి నేపథ్యమే. మారుమూల ప్రాంతాల్లో చదవడం, మంచి అవకాశాల కోసం నగరాలకు రావడం, ఎన్ని ఇబ్బందులు ఎదురైనా ఏదో సాధించాలనే పట్టుదలతో రాత్రింబవళ్లు చదవడం, చివరికి విజయం సాధించడం… తర్వాత పోలీసు అకాడమీలో ట్రైనింగ్‌ ఒక గొప్ప అనుభూతి . అది జీవితానికి ఒక గొప్ప క్రమశిక్షణను అలవాటు చేసింది. మూడు దశాబ్దాలుగా నాకు వచ్చిన ఈ అరుదైన అవకాశాన్ని (పోలీసు ఉద్యోగం) చేతనైనంత మేర ప్రజలకు మేలు చేయడానికే ఉపయోగించాను. మీరు కూడా అలాగే వాడాలి. ఈ విషయాన్ని చాలారోజుల తర్వాత విక్టర్‌ ఫ్రాంకెల్‌ రాసిన ‘అర్థం కోసం అన్వేషణ’ పుస్తకంలో చదివాను. మీరు కూడా చదవండి.

మీకు ఆత్మహత్య చేసుకోవాలనిపించదు. నేను పోలీసు ఉన్నతాధికారి కావడం వల్ల నేను పుట్టి పెరిగిన ఊరు చివరలో ఉన్న మా కాలనీ ప్రజలకు, నా స్నేహితులకు, ఒక గుర్తింపు వచ్చింది. నేను పోలీసు వాహనంలో మా ఊరికి పోయినప్పుడు మా బస్తీ ప్రజల ఆనందానికి అవధుల్లేవు. మీ అందరికీ ఇలాంటి అనుభవాలే ఎదురై ఉంటయి. మీరందరూ, మీ మీ సమూహాల్లో సెలబ్రిటీలు. మీ తల్లిదండ్రులు మీకు తెలవకుండా మీ గురించి చాలా గొప్పగా ఊర్లో చెప్పుకుంటరు. ఒక్క మాటలో చెప్పాలంటే మీరు మీ కుటుంబాలకు, మీ సమాజానికి, సమూహానికి ఒక గొప్ప బలం. మనంతటికి మనం ఆత్మహత్యలు చేసుకుంటే వాళ్ల పరిస్థితి ఏమిటి? ఆలోచించండి. అసలు ప్రతిరోజు చావులను ఎఫ్‌ఐఆర్‌లు, పంచనామాలు, పోస్టుమార్టంల రూపంలో చూసే మనకు చావాలన్న ఆలోచన రావడమే విడ్డూరంగా ఉన్నది! అయినా, మనుషుల ప్రాణాలను కాపాడటానికి జీతం తీసుకునే మనం, మన ప్రాణాలు మనమే తీసుకోవడం ఏమిటి?

మీకు తెలుసా?: ప్రతిరోజూ మన వల్ల మనకు తెలియకుండా ఎన్నో జీవితాలు సురక్షితంగా ఉంటాయి. గొప్ప విలువ ఉన్న ఇలాంటి జీవితాన్ని, ఒక పిరికి ఆలోచనతో, క్షణికావేశంలో నాశనం చేసుకోవద్దు. మనం చేసే చిన్న చిన్న తప్పుల గురించి రోజుల తరబడి ఆలోచించే సమయం ఎవరికీ లేదు. తప్పులను డిలీట్‌ చేసుకొని మనం ముందుకు సాగాల్సిందే. నిజం చెప్పాలంటే ఎవరి బతుకుల్లో వారు బిజీగా ఉన్నారు. ఆరోగ్యం బాగా లేకపోతే డాక్టర్‌ దగ్గరికి పోవాలి. మరో మహిళనో/ మరో పురుషుడో మన జీవితాల్లోకి అక్రమంగా ప్రవేశిస్తే వెంటనే మన జీవిత భాగస్వామితో ఆ విషయాన్ని నిర్మొహమాటంగా పంచుకోవాలి, పరిష్కారం కనుక్కోవాలి. అంతేకానీ, అందరికీ తెలుస్తుందని భయపడి ప్రాణాలు తీసుకుంటే మీ పిల్లలు, తల్లిదండ్రులు రోడ్డు మీద పడుతారు కదా?

నా అనుభవంతో పాటు కొంతమంది నిపుణులు, పోలీసు అధికారులతో మాట్లాడి కింది సలహాలు ఇస్తున్నా ను. దయచేసి చదివి, పాటించండి.

• జీవిత భాగస్వామి ఎంపికలో వీలైనంత జాగ్ర త్త పడండి. డేటింగ్‌ చేయడం చెడ్డదేం కాదు. కుదిరితే ట్రై చేయండి. వరకట్నం తీసుకోవడం ఆపండి. పెండ్లి అనేది ఒక వ్యాపారం కాదు. మీ కుటుంబం ఫొటోను మీరు పనిచేస్తున్న ప్రదేశంలో ఉంచుకోండి. మీ సెల్‌ఫోన్‌ వాల్‌పేపర్‌గా మార్చుకోండి. lమీరు డ్యూటీలు బాగా చేయం డి, డ్యూటీ అయిపోయిన తర్వాత మాత్రం కుటుంబంతో గడపండి, సెల్‌ఫోన్‌తో కాదు.
• వీలైనప్పుడల్లా కనీసం రోజుకు గంటసేపు వ్యాయామం చేయండి. పోలీసు అకాడమీ రోజులను గుర్తుచేసుకోండి. బిజీగా ఉన్నామని మా త్రం తప్పించుకోకండి.
• బందోబస్తులో ఉన్నపుడు ఖాళీ సమయాన్ని ఫోన్‌లో బెట్టింగ్‌, ఈజీ లోన్‌, చాటింగ్‌ యాప్‌లకు కేటాయించకుండా మంచి పుస్తకాలు చదువండి. lదయచేసి ఏదైనా ఒక గేమ్‌ను (ఆన్‌లైన్‌ కాదు) అలవాటు చేసుకోండి. క్రీడాకారులు ఆత్మహత్యలు చేసుకో రు గమనించండి.
• బెట్టింగ్‌, సట్టా, మట్కా, చీప్‌ లోన్‌, ఫేక్‌ క్రిప్టో కరెన్సీ ఇవన్నీ గంజాయి లాంటి వ్యసనాలు. వీటికి దూరంగా ఉండండి.
• పోలీసులకు ప్రత్యేకంగా అపరిచిత వ్యక్తులతో చాటింగ్‌ బెడద ఉంటుంది. అలాగే మన దగ్గరికి నిస్సహాయ పరిస్థితిలో వచ్చిన వ్యక్తుల బాధను అర్థం చేసుకోవాలి, సహాయం చేయాలి. కానీ, వాళ్లతో వ్యక్తిగత సంబంధాలు కొనసాగించకూడ దు.
• పై అధికారులు ఎవరైనా ఇబ్బంది పడితే సెలవు పెట్టి వెళ్లండి లేదా వేరే ప్రాంతానికి బదిలీ చేయించుకోండి. తప్పనిసరి పరిస్థితుల్లో ఉన్నతాధికారులకు ఫిర్యాదు చేయండి.
• మానసిక ఒత్తిడి ఉన్నపుడు కౌన్సెలర్ల వద్దకు వెళ్లి మీ సమస్యలు వారికి చెప్పుకోండి. ఉపశమనం కలుగుతుంది.
• డబ్బు సంపాదించే ఆలోచన ఉండ టం తప్పు కాదు. మీ కుటుంబసభ్యులతో ఉద్యో గం లేదా వ్యాపారం చేయించండి. వాళ్లకు మీ రోజువారీ ఉద్యోగంతో, నేరస్థులతో సంబంధం లేకుండా చూసుకోండి.
• ఏడాదికోసారి విపాసన (మెడిటేషన్‌) లేదా విహారయాత్రలకు కుటుంబంతో వెళ్లండి. మీరు పది రోజులు డ్యూటీలో లేకపోతే కొంపలేం మునిగిపోవు. lపక్క పోలీసు/ ఇతర విభాగాల ఉద్యోగస్థులతో పోల్చుకోకండి. మనశ్శాంతి ఉండదు. కనిపించేదంతా బంగారం కాదు. ఎవరి బాధలు వాళ్లకుంటయి. lమీకు ఇష్టమైన వ్యక్తుల పేరు మీద స్వచ్ఛంద సంస్థలు ఏర్పాటుచేసి పేద ప్రజలకు సేవ చేయండి.
• మీకు ఇష్టమైన మంచి పేరున్న పై అధికారులను (సర్వింగ్‌/రిటైర్డు) మార్గదర్శులుగా తీసుకోండి. వారిని తరచుగా కలవండి.
  (వ్యాసకర్త: ఐపీఎస్‌)

పోలీసు ఉన్నతాధికారులకు విన్నపం

• పోలీసు ట్రైనింగ్‌లో ఏదో తీవ్రమైన లోపం ఉన్నది. ఔట్‌ డోర్‌ను కొంత కఠినతరం చేయండి. చాలామందికి సెల్యూట్‌ కూడా సరిగా రావడం లేదు.
• పోలీసు కుటుంబాలకు ఉచిత కౌన్సెలర్‌ సౌకర్యం కల్పించండి. సఖీ సెంటర్లు మన కుటుంబాలకు కూడా అవసరం.
• తరచుగా పండుగల తర్వాత పోలీసు కుటుంబాలతో బఢాఖానా (గెట్‌ టు గెదర్‌)లు నిర్వహించండి. వాటిని నామ్‌కే వాస్తేగా పెట్టవద్దు.
• చిన్న చిన్న తప్పులకు ఛార్జ్‌ మెమోలు, సస్పెన్షన్‌లతో ఇబ్బంది పెట్టకండి. దయచేసి కౌన్సెలింగ్‌ ఇవ్వండి.
• బెట్టింగ్‌, లోన్లు, మద్యం, చాటింగ్‌, అక్రమ సంబంధాలకు బానిసలైన ఉద్యోగుల కోసం జిల్లాలో/ బెటాలియన్లలో ‘డీ అడిక్షన్‌ సెంటర్లను’ ఓపెన్‌ చేయండి.
• ఆదర్శంగా బతుకుతున్న కుటుంబాలకు గుడ్‌ సర్వీసు ఎంట్రీ, కమెండేషన్‌ లెటర్‌, బెస్ట్‌ ఫ్యామిలీ ఆఫ్‌ ద వీక్‌, మెడల్స్‌ ఇవ్వొచ్చేమో ఆలోచించండి.
• ప్రతి పోలీస్‌స్టేషన్‌లో క్రీడలకు వెసులుబాటు కల్పించండి. ఆరోగ్య భద్రత బిల్స్‌ రెగ్యులర్‌గా వచ్చేట్టు చూడండి. సరెండర్‌ లీవ్‌లు టీఏలు రెగ్యులర్‌గా చెల్లించండి.
• పోలీసు ఫైనాన్స్‌ కార్పొరేషన్‌ లేదా కో-ఆపరేటివ్‌ క్రెడిట్‌ సొసైటీ ఏర్పాటుచేస్తే ఈజీ లోన్‌ల బారిన పడరు.

-డాక్టర్‌ ఆర్‌.ఎస్‌.ప్రవీణ్‌కుమార్‌