చలికాలం..నారుమడి జాగ్రత్త..!

ఈ సంవత్సరం రాష్ట్రవ్యాప్తంగా విస్తారంగా వర్షాలు కురవడంతో భూగర్భ జలమట్టం పెరిగింది.

• యాసంగి సాగులో యాజమాన్య పద్ధతి మేలు
• రైతులకు శాస్త్రవేత్తలు, వ్యవసాయాధికారుల సూచన

మాక్లూర్‌, నవంబర్‌ 24: ఈ సంవత్సరం రాష్ట్రవ్యాప్తంగా విస్తారంగా వర్షాలు కురవడంతో భూగర్భ జలమట్టం పెరిగింది. దీంతో యాసంగిలో రైతులు వరి సాగుకు మొగ్గుచూపుతున్నారు. కానీ వరి తర్వాత వరిని సాగు చేస్తే ఇబ్బందులు ఎదురవుతాయని వ్యవసాయ శాస్త్రవేత్తలు, అధికారులు చెబుతున్నారు. యాసంగిలో ముఖ్యంగా బావులు,బోర్ల కింద ఆరుతడి పంటలను సాగు చేయాలని, కాలువలు, పెద్ద చెరువుల కింద వీలైన చోట్ల వరిని తగ్గించి మెట్ట పంటలు వేసుకోవాలని సూచిస్తున్నారు. మరోవైపు యాసంగి సాగు నేపథ్యంలో వరి నారుమడిలో యాజమాన్య పద్ధతులు పాటించాలని చెబుతున్నారు. చలి ప్రభావం నారుమడిపై పడకుండా జాగ్రత్తలు తీసుకోవాలని సూచిస్తున్నారు.

నారు పోసుకునే సమయం:
యాసంగి వరి సాగులో భాగంగా నారు పోసుకునేందుకు నవంబర్‌ 15 నుంచి డిసెంబర్‌ 20 వరకు శాస్త్రవేత్తలు సిఫారసు చేశారు. ఇప్పుడున్న ప్రత్యేక పరిస్థితుల దృష్ట్యా నవంబర్‌ చివరి వరకు మాత్రమే నార్లు పోసుకోవాలి. కొద్దిమంది రైతులు ముందుగా (నవంబర్‌ మొదటివారం) నార్లు పోసుకుంటే, త్వరగా కోతలు పూర్తి చేసుకోవచ్చనే ఆలోచనలో ఉన్నారు. కానీ తెలంగాణలో ఉండే చలి వాతావరణం దృష్ట్యా గింజ తాలుపోయే ప్రమాదముంటుంది. వరిపూత దశలో 22 డిగ్రీల సెం.గ్రే కన్నా ఉష్ణోగ్రతలు (డిసెంబర్‌ 20 తర్వాత) వరి గింజ కట్టే దశలో ఉండే అధిక ఉష్ణోగ్రతలతో గింజలపై పగుళ్లు ఏర్పడి నూక అధికంగా వస్తుంది. ఏప్రిల్‌ మొదటి వారం వరకు వరి కోతలు పూర్తయ్యేలా జాగ్రత్త వహించాలి.

నారుమడి యాజమాన్యం

• యాసంగిలో నారుమడికి ప్రత్యేక శ్రద్ధ అవసరం.
• నారుమడిని బాగా దున్ని రెండు గుంటల నారుమడికి 2 క్వింటాళ్ల మాగిన కోళ్ల ఎరువు లేదా గొర్రెల ఎరువు వేసి కలియదున్నాలి.
• 2-3 సార్లు దమ్ము చేసి చదును చేయాలి.
• నీరు పెట్టడానికి, తీయడానికి వీలుగా కాలువలను ఏర్పాటు చేసి ఎత్తు నారు మళ్లను తయారుచేయాలి.
• రెండు గుంటల నారుమడికి (5 సెంట్లు) 2 కిలోల నత్రజని (కిలో విత్తనం చల్లే ముందు, మరొక కిలో విత్తిన 12-14 రోజులకు), 2 కిలోల భాస్వరం, కిలో పొటాష్‌నిచ్చే ఎరువులను దుక్కిలో వేయాలి.
• చలి సమస్యను అధిగమించడానికి నారుమళ్లపై ఇనుప చువ్వలు/వెదురు కర్రలతో ఊతం ఇచ్చి పైన పలుచని పాలిథిన్‌ షీట్‌ లేదా ఖాళీ ఎరువుల సంచులతో తయారుచేసిన పట్టాలతో సాయంత్రం వేళ్లల్లో కప్పి ఉంచి మరుసటి రోజు ఉదయాన్నే తీసివేయాలి.
• రాత్రి ఉష్ణోగ్రతలు 10 డిగ్రీల కన్నా తగ్గినప్పుడు చలి తీవ్రత పెరిగి నారు ఎర్రబడడం, సరిగ్గా ఎదగక పోవడం, పంటకాలం పెరిగిపోవడం, పోషకలోపాలు ముఖ్యంగా జింక్‌ లోప లక్షణాలు కనిపించే అవకాశం ఉన్నది.
• జింక్‌లోపం సవరణకు లీటరు నీటికి 2 గ్రాముల జింక్‌ సల్ఫేట్‌ కలిపిన ద్రావణాన్ని పిచికారీ చేయాలి.
• నారు ఆరోగ్యంగా పెరగడానికి పైపాటుగా యూరియా వేసినప్పుడు కిలో యూరియాకు 2గ్రాముల కార్బండాజిమ్‌ 25 శాతం + మ్యాంకోజెబ్‌ 50 శాతం డబ్ల్యూఎస్‌ మిశ్రమ మందును కలిపి వేసుకోవాలి.
• మొలక కట్టిన విత్తనాన్ని చల్లి, మొదట్లో (వారం రోజులు) ఆరుతడులు ఇచ్చి ఆ తర్వాత మొక్కదశలో పలుచగా (2-3 సెం.మీ.) నీరు ఉంచాలి.
• రాత్రివేళల్లో నీరు నిండుగా ఉంచి తెల్లవారుజామున తీసివేసి కొత్తనీరు పెట్టాలి.
• నారుమడిలో కూడా కలుపు, సస్యరక్షణ చర్యలు చేపట్టాలి.
• కాండం తొలిచే పురుగు బారినుంచి నారును కాపాడుకునేందుకు, నారు తీయడానికి వారం రోజుల ముందు, 5 సెంట్ల నారుమడికి 800 గ్రాముల కార్భోప్యూరాన్‌ 3జీ గుళికలు వేయాలి.
• చలి తీవ్రత ఎక్కువగా ఉంటే అగ్గితెగులు ఆశించే అవకాశం ఉన్నది. ముందు జాగ్రత్తగా లీటరు నీటికి 0.6 గ్రాముల ట్రైసైక్లోజోల్‌ను కలిపి పిచికారీ చేయాలి.