పంట మారుద్దాం.. దిగుబడి పెంచుదాం

పంటమార్పిడి విధానంతో పురుగుల ఉధృతి తగ్గడమే కాకుండా భూసార సంరక్షణ, పోషక లోపాల నివారణ జరిగి దిగుబడులు పెరిగే అవకాశం ఉంటుందని వ్యవసాయ అధికారులు, శాస్త్రవేత్తలు చెబుతున్నారు.

• రోగ కారక పురుగుల కట్టడికి మార్గం
• పంటల మార్పిడితే భూసార వృద్ధి

ఎప్పుడూ ఒకేరకమైన పంటలు వేస్తూ ఉంటే దిగుబడులు తగ్గుతూ ఉంటాయి. చాలా మంది రైతులు నేటికీ ఒకే రకమైన పంటలను పండిస్తూ సరైన దిగుబడులు రాక ఆర్థికంగా చితికిపోతున్నారు. పొలాల్లో భూసారం తగ్గి రోగాలను కలిగించే పురుగుల సంఖ్య పెరుగుతుంది. ఏటేటా పంట మార్పిడి చేస్తే నాణ్యమైన ఉత్పత్తులు వచ్చి దిగుబడులు రెట్టింపయ్యే వీలుంటుంది. భూమిలోని పోషకాలు సమృద్ధిగా అందుతాయి. పంట మార్పిడితో కలిగే ప్రయోజనాలు ఇవే…

ఎల్లారెడ్డి రూరల్‌, మే 7: పంటమార్పిడి విధానంతో పురుగుల ఉధృతి తగ్గడమే కాకుండా భూసార సంరక్షణ, పోషక లోపాల నివారణ జరిగి దిగుబడులు పెరిగే అవకాశం ఉంటుందని వ్యవసాయ అధికారులు, శాస్త్రవేత్తలు చెబుతున్నారు. ఎప్పుడూ ఒకే పంటను పండించడంతో పురుగులకు నిరంతరం ఆహారం లభ్యమై వాటి జీవితచక్రం పునరావృతమవుతూ వాటి సంతతి పెరుగుతుంది. దీంతో పంటలకు చీడపీడల బెడద ఎక్కువవుతుంది. ఒకే పంట పండించడంతో ఆ పంట వేర్లు నేలలో వ్యాపించి పోషకాలను గ్రహించడంతో కొన్ని రోజులకు ఆ మట్టి పొరలు నిస్సారమవుతాయి. ఆ నేలలో వేసే పంటల దిగుబడులు తగ్గిపోతాయి. అందువల్ల వివిధ వేరు వ్యవస్థ కలిగిన పత్తి, కంది వంటి పంటలను మామూలు వేరు వ్యవస్థ గల (స్వల్ప లోతుకు చొచ్చుకుపోయే) వరి, వేరుశనగ వంటి పంటలతో మార్పిడి చేయాలి. నీటి వసతి సరిగ్గా లేని ప్రాంతాల్లో ఒక పంటను పూర్తి నీటి వసతితో పండించి, రెండో పంటను వర్షాధారంగా వేసుకుంటే నీటి వినియోగం సమర్థవంతంగా జరుగుతుంది. మిరప, టమాట, వేరుశనగ పంటలను ఆశించే లద్దెపురుగు నివారణకు జొన్న, వరి, సజ్జ, రాగి పంటలతో మార్పిడి చేయాలి. పంట మార్పిడి చేయడంతో పొలంలో పురుగులు, ప్రాణాంతక తెగుళ్లు వృద్ధి చెందడానికి ప్రతికూల పరిస్థితులు ఏర్పడతాయి. పంట మార్పిడి చేయడంతో మట్టి సారవంతమవుతుంది. మట్టి ఉత్పాదకత స్థిరంగా కాపాడవచ్చు.

ఏ పంట తర్వాత ఏ పంట వేయాలంటే..

• ధాన్యం పంటలైన వరిని అశించే కాండం తొలుచు పురుగు, ఆకుమచ్చ తెగులు నివారణకు అపరాలతో పంట మార్పిడి చేయాలి. దీంతో పురుగుల ఉధృతి తగ్గడమే కాకుండా నత్రజని స్థిరీకరించబడి తర్వాత వేసే పంటకు పనికొస్తుంది.
• నులిపురుగుల బెడద ఉన్నప్పుడు నువ్వు, బంతి, ఆవాలతో పంట మార్పిడి చేస్తే వాటి ఉధృతి తగ్గుతుంది.
• జొన్నలో కాండం తొలుచు పురుగు నివారణకు పొద్దు తిరుగుడు, వేరుశనగలతో పంట మార్పిడి చేయాలి.
• టమాటలో వడతెగులు, లద్దెపురుగుల నివారణకు పెసర, జొన్న, వరి, సజ్జ పంటలను వేసుకోవాలి.
• పత్తిలో గులాబీరంగు కాయతొలుచు పురుగు, లద్దెపురుగు వంటి వాటి నివారణకు అపరాలు, జొన్న, మక్కజొన్నలో ఎర్రకుళ్లు, వడలు తెగులు నివారణకు జొన్నతో పంట మార్పిడి చేయాలి.
• నేలసారాన్ని కాపాడుకొని చీడపీడలను తగ్గించుకోవడానికి రైతులు తప్పనిసరిగా పంట మార్పిడి విధానాన్ని అవలంబించాల్సిన అవసరం ఎంతైనా ఉన్నది.
• పంట మార్పిడిలో నేల ఉపరితలాన్ని పూర్తిగా కప్పే పంటల్ని ఎంపిక చేసుకోవాలి.
• శనగ, బొబ్బెర, పెసర, మినుము వంటి పంటల్ని వేసుకోవడంతో నేలను పూర్తిగా కప్పి ఉంచుతాయి. దీంతో కలుపు మొక్కలను నివారించవచ్చు.

పంట మార్పిడితో ప్రయోజనం..

• నేల భౌతికస్థితి మెరుగుపడుతుంది.
• భూమిలో నీరు నిల్వ ఉండే శక్తి కలిగి భూసారం వృద్ధి చెందుతుంది.
• చీడపీడలు దూరమవుతాయి.
• సస్యరక్షణకు వినియోగించే మందుల వినియోగం, ఖర్చు తగ్గుతుంది.
• శిలీంధ్ర వ్యాధులను దూరం చేయవచ్చు.
• బీజాలు వాటి అవశేషాలు, వానపాముల అభివృద్ధి కూడా ఎక్కువగానే ఉంటుంది.
• కీటకాల గుడ్లు వృద్ధి చెందకుండా చేసుకోవచ్చు.
• పంటలో నాణ్యత పెరిగి దిగుబడి ఎక్కువగా పొందే అవకాశం ఉంది.
  ఇలా చేయొద్దు..
• జొన్నపంట సాగుచేసిన పొలంలో మిరప పంట వేయొద్దు.
• వేరుశనగ సాగు చేసిన తర్వాత మళ్లీ ఆదే పంట వేయొద్దు. దీంతో ఎర్రగొంగళి పురుగు, శనగపచ్చ
  పురుగు ఆశించవచ్చు.
• నులిపురుగులు ఉన్న ప్రాంతాల్లో వంగ, బెండ, టమాట, ఉలవలు, మినుము, పెసర పంటలు వేస్తే అవి వాటిని మరింత వృద్ధి చేస్తాయి. అందువల్ల వాటిని వేయొద్దు.

పంట మార్పిడి తప్పనిసరి…

ఏటా పంట మార్పిడితో అధిక దిగుబడులు పొందవచ్చు. వివిధ రకాల తెగుళ్ల బెడద నుంచి రైతులు విముక్తి పొందుతారు. రైతులు మూస పద్ధతిలో ఒకే రకమైన పంటల్ని సాగు చేయకుండా పంట మార్పిడి విధిగా మార్చుకుంటే రైతులకు ఎంతో ప్రయోజనం కలుగుతుంది. తప్పనిసరిగా రైతులు పంట మార్పిడి చేయాలి.
– నాగ వెంకటరత్న, ఎల్లారెడ్డి డివిజన్‌ సహాయ వ్యవసాయ సంచాలకులు