NEET | జేఈఈ, నీట్‌ పరీక్షల షెడ్యూల్‌ విడుదల.. 2024 క్యాలెండర్‌ ప్రకటించిన ఎన్టీఏ

NEET | 2024 -25 విద్యాసంవత్సరానికి సంబంధించి పలు జాతీయ స్థాయి ప్రవేశ పరీక్షల క్యాలెండర్‌ను నేషనల్‌ టెస్టింగ్‌ ఏజెన్సీ విడుదల చేసింది. జేఈఈ మెయిన్‌, నీట్‌, సీయూఈటీ, నెట్‌ వంటి పరీక్షల తేదీలను వెల్లడించింది.

NEET | హైదరాబాద్‌, సెప్టెంబర్‌ 19 (నమస్తే తెలంగాణ) : 2024 -25 విద్యాసంవత్సరానికి సంబంధించి పలు జాతీయ స్థాయి ప్రవేశ పరీక్షల క్యాలెండర్‌ను నేషనల్‌ టెస్టింగ్‌ ఏజెన్సీ విడుదల చేసింది. జేఈఈ మెయిన్‌, నీట్‌, సీయూఈటీ, నెట్‌ వంటి పరీక్షల తేదీలను వెల్లడించింది. జేఈఈ మెయిన్‌ను ఏటా రెండుసార్లు నిర్వహించనుండగా, మెయిన్‌-1 సెషన్‌ను జనవరి, ఫిబ్రవరి మాసాల్లో, మెయిన్‌ -2 సెషన్‌ను ఏప్రిల్‌లో నిర్వహిస్తామని ఎన్టీఏ తెలిపింది.

• జేఈఈ మెయిన్‌-1 సెషన్‌ పరీక్షలను 2024 జనవరి 24 నుంచి ఫిబ్రవరి 1 మధ్య నిర్వహిస్తారు. మెయిన్‌-2 సెష న్‌ పరీక్షలు ఏప్రిల్‌ 1 నుంచి 15 మధ్య జరుగుతాయి. ఈ పరీక్షలు కంప్యూటర్‌ ఆధారిత విధానంలో ఉంటాయి.
• ఎంబీబీఎస్‌, బీడీఎస్‌ వంటి కోర్సుల్లో ప్రవేశాలకు నిర్వహించే నీట్‌ -యూజీ పరీక్షను 2024 మే 5న దేశవ్యాప్తంగా నిర్వహిస్తారు. ఇది పెన్‌ పేపర్‌, ఓఎమ్మార్‌ విధానంలో నిర్వహిస్తారు.
• సెంట్రల్‌ వర్సిటీల్లోని అండర్‌ గ్రాడ్యుయేట్‌ కోర్సుల్లో ప్రవేశాలకు నిర్వహించే కామన్‌ యూనివర్సిటీ ఎంట్రెన్స్‌ టెస్ట్‌ -యూజీ పరీక్షలను 2024 మే 15 నుంచి 31 వరకు సీబీటీ పద్ధతిలో నిర్వహిస్తారు.
• సెంట్రల్‌ యూనివర్సిటీల్లోని పీజీ కోర్సుల్లో ప్రవేశాలకు నిర్వహించే కామన్‌ యూనివర్సిటీ ఎంట్రెన్స్‌ టెస్ట్‌ -పీజీ పరీక్షలను 2024 మార్చి 11 నుంచి 28 వరకు నిర్వహిస్తారు.
• అసిస్టెంట్‌ ప్రొఫెసర్‌షిప్‌, పీహెచ్‌డీ సీట్ల భర్తీకి నిర్వహించే యూజీసీ -నెట్‌ ఎగ్జామ్‌ను 2024 జూన్‌ 10 నుంచి 21 వరకు నిర్వహిస్తారు. ఈ పరీక్ష సైతం సీబీటీ పద్ధతిలోనే జరగనుంది.

మార్చి..ఏప్రిల్లోనే ఎంసెట్‌
రాష్ట్రంలో ఎంసెట్‌ను మార్చి, ఏప్రిల్‌ మాసాల్లో నిర్వహించే అవకాశాలున్నాయి. మార్చిలో ఇంటర్‌ వార్షిక పరీక్షలు జరగనున్నాయి. ఏప్రిల్‌లో జేఈఈ మెయిన్‌ -2పరీక్షలున్నాయి. ఈ రెండు పరీక్షల మధ్య నిర్వహించేలా షెడ్యూల్‌ రూపొందించే యోచనలో అధికారులు ఉన్నారు.