Reliance | ముంచిన రిలయన్స్‌.. కుప్పకూలిన దేశీయ స్టాక్‌ మార్కెట్లు

దేశీయ స్టాక్‌ మార్కెట్లు కుప్పకూలాయి. బ్లూచిప్‌ సంస్థల షేర్ల అత్యధికంగా అమ్మకాలు జరగడంతోపాటు విదేశీ సంస్థాగత పెట్టుబడిదారులు భారీగా నిధులను తరలించుకుపోవడంతో సెన్సెక్స్‌ మూడు నెలల కనిష్ఠ స్థాయికి జారుకున్నది.

• ఒక్క శాతానికి పైగా పడిపోయిన సూచీలు
• ఒక్కరోజే 6 లక్షల కోట్ల సంపద ఆవిరి

Reliance | ముంబై, నవంబర్‌ 4: దేశీయ స్టాక్‌ మార్కెట్లు కుప్పకూలాయి. బ్లూచిప్‌ సంస్థల షేర్ల అత్యధికంగా అమ్మకాలు జరగడంతోపాటు విదేశీ సంస్థాగత పెట్టుబడిదారులు భారీగా నిధులను తరలించుకుపోవడంతో సెన్సెక్స్‌ మూడు నెలల కనిష్ఠ స్థాయికి జారుకున్నది. అమెరికా అధ్యక్ష ఎన్నికలు హోరాహోరిగా సాగనున్నట్లు వచ్చిన సంకేతాలకు తోడు చైనా మరోసారి ఉద్దీపన ప్యాకేజీ ప్రకటించే అవకాశాలుంటడంతో దలాల్‌స్ట్రీట్‌ వర్గాల్లో ఆందోళన పెంచింది. ఫలితంగా సంవత్‌ 2081కు ఆరంభరోజు లాభపడిన సూచీలు ఆ మరుసటి రోజే భారీ నష్టాలను మూటగట్టుకున్నది. నష్టాల్లో ప్రారంభమైన సూచీలు మధ్యాహ్నాం తర్వాత అంతర్జాతీయ మార్కెట్ల నుంచి వచ్చిన ప్రతికూల సంకేతాలు నష్టాలకు ఆజ్యంపోశాయి. దీంతో ఒక దశలో 1,500 పాయింట్ల వరకు నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరకు 941.88 పాయింట్లు(1.18 శాతం) నష్టపోయి 78 వేల పాయింట్ల దిగువకు పడిపోయింది. చివరకు 78,7812.24 వద్ద స్థిరపడింది.

ఆగస్టు 6 తర్వాత సూచీకి ఇదే కనిష్ఠ స్థాయి ముగింపు. మరో సూచీ నిఫ్టీ ఒక్క శాతానికి పైగా నష్టపోయింది. ఇంట్రాడేలో 488 పాయింట్లు నష్టపోయిన సూచీ చివరకు 309 పాయింట్లు(1.27 శాతం) కోల్పోయి 23,995.35 స్థాయికి జారుకున్నది. స్టాక్‌ మార్కెట్ల భారీ పతనంతో మదుపరులు ఆరు లక్షల కోట్ల సంపదను కోల్పోయారు. దీంతో బీఎస్‌ఈలో లిైస్టెన సంస్థల విలువ రూ.5,99,539.5 కోట్లు కరిగిపోయి రూ.4,42,11,068 కోట్లు(5.26 ట్రిలియన్‌ డాలర్లు)కు పడిపోయింది. అగ్రరాజ్యం అమెరికా అధ్యక్ష ఎన్నికల్లో అనిశ్చిత పరిస్థితి కొనసాగే అవకాశం ఉండటం, చైనా మరోసారి ఉద్దీపన ప్యాకేజీ ప్రకటించనున్నట్లు వచ్చిన సంకేతాలు మదుపరులను అమ్మకాల వైపు నడిపించాయని దలాల్‌ స్ట్రీట్‌ వర్గాలు వెల్లడించాయి. కార్పొరేట్ల నిరుత్సాహ ఫలితాలు, ఈవారంలోనే ఫెడరల్‌ రిజర్వు వడ్డీరేట్లను మరో పావు శాతం తగ్గించే అవకాశాలుండటం కూడా మదుపరుల్లో ఆందోళనను పెంచింది.

• అదానీ పోర్ట్స్‌, రిలయన్స్‌, సన్‌ఫార్మా, ఎన్‌టీపీసీ, యాక్సిస్‌ బ్యాంక్‌, టాటా మోటర్స్‌ టైటాన్‌ షేర్లు రెండు శాతానికి పైగా నష్టపోయాయి.
• వీటితోపాటు ఎయిర్‌టెల్‌, ఎల్‌అండ్‌టీ, హెచ్‌డీఎఫ్‌సీ బ్యాంక్‌, ఐసీఐసీఐ బ్యాంక్‌, అల్ట్రాటెక్‌ సిమెంట్‌, ఐటీసీ, బజాజ్‌ ఫైనాన్స్‌, కొటక్‌ బ్యాంక్‌, టీసీఎస్‌, మారుతి, హెచ్‌యూఎల్‌లు దిగువముఖం పట్టాయి.
• మహీంద్రా, టెక్‌ మహీంద్రా, ఎస్బీఐ, హెచ్‌సీఎల్‌ టెక్నాలజీ, ఇన్ఫోసిస్‌, ఇండస్‌ఇండ్‌ బ్యాంకుల షేర్లు మూడు శాతం వరకు లాభపడ్డాయి.
• రంగాలవారీగా చూస్తే రియల్టీ అత్యధికంగా 3 శాతం వరకు నష్టపోయింది. దీంతోపాటు ఆయిల్‌ అండ్‌ గ్యాస్‌ 2.54 శాతం, ఎనర్జీ 2.51 శాతం, టెలికం 2.11 శాతం, పవర్‌ 2.06 శాతం, ఇండస్ట్రీయల్స్‌ 1.72 శాతం, కమోడిటీస్‌ 1.69 శాతం తగ్గాయి.
• గత నెలలో విదేశీ సంస్థాగత పెట్టుబడిదారులు దేశీయ ఈక్విటీ మార్కెట్ల నుంచి రూ.94 వేల కోట్లు(11.2 బిలియన్‌ డాలర్లు) పెట్టుబడులను తరలించుకుపోయారు.

ఆర్‌ఐఎల్‌ షేరు 3% డౌన్‌
రిలయన్స్‌ ఇండస్ట్రీస్‌ షేరు కుప్పకూలింది. ఇంట్రాడేలో నాలుగు శాతానికి పైగా నష్టపోయిన కంపెనీ షేరు ధర చివరకు 2.77 శాతం నష్టపోయి రూ.1,302 వద్ద ముగిసింది. అటు ఎన్‌ఎస్‌ఈలోనూ 2.72 శాతం తగ్గి రూ.1,302.15 వద్ద స్థిరపడింది. దీంతో కంపెనీ మార్కెట్‌ విలువ రూ.50,205.1 కోట్లు కరిగిపోయి రూ.17,61,914. 95 కోట్ల వద్దకు జారుకున్నది.

పతనానికి కారణాలు

• ఒక్కసారిగా ఇంధన ధరలు భగ్గుమనడం
• అమెరికా అధ్యక్ష ఎన్నికల్లో హోరాహోరీ పోటీ ఉంటుందన్న అంచనా
• బ్లూచిప్‌ సంస్థల షేర్లలో భారీగా క్రయవిక్రయాలు జరగడం
• ఎఫ్‌ఐఐల నిధులు వెనక్కి తీసుకోవడం
• మరోసారి చైనా ఉద్దీపన ప్యాకేజీ ప్రకటించే అవకాశాలుండటం