Debit Card Charges | డెబిట్‌ కార్డులపై దబిడి దిబిడే.. ఏప్రిల్‌ 1 నుంచి చార్జీలను పెంచనున్న ఎస్బీఐ

ప్రభుత్వ రంగ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా (ఎస్బీఐ).. వివిధ డెబిట్‌ కార్డుల వార్షిక మెయింటేనెన్స్‌ చార్జీలను పెంచింది. ఏప్రిల్‌ 1 నుంచి పెరిగిన చార్జీలు అమల్లోకి రానున్నాయి.

•  ఆయా రకాల కార్డులపై అదనంగా రూ.75 వడ్డన

Debit Card Charges | ముంబై, మార్చి 27: ప్రభుత్వ రంగ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా (ఎస్బీఐ).. వివిధ డెబిట్‌ కార్డుల వార్షిక మెయింటేనెన్స్‌ చార్జీలను పెంచింది. ఏప్రిల్‌ 1 నుంచి పెరిగిన చార్జీలు అమల్లోకి రానున్నాయి. ఆయా రకాల డెబిట్‌ కార్డులను ప్రస్తుతం తమ కస్టమర్లకు ఎస్బీఐ అందిస్తుండగా, వీటిపై చార్జీని మరో రూ.75 పెంచుతూ తాజాగా నిర్ణయం తీసుకున్నది. వస్తు, సేవల పన్ను (జీఎస్టీ) అదనం. బ్యాంక్‌ వెబ్‌సైట్‌లోని వివరాల ప్రకారం క్లాసిక్‌, సిల్వర్‌, గ్లోబల్‌, కాంటాక్ట్‌లెస్‌, యువ, గోల్డ్‌, కాంబో, ప్లాటినమ్‌ తదితర డెబిట్‌ కార్డుల చార్జీలు వచ్చే నెల 1 నుంచి పెరుగబోతున్నాయి. కాగా, కొత్త కార్డుల జారీతోపాటు ఇప్పటికే ఉన్న డెబిట్‌ కార్డుల స్థానంలో మరో డెబిట్‌ కార్డు ఇచ్చేందుకున్న చార్జీలనూ బ్యాంక్‌ పెంచుతున్నది.

కొత్త చార్జీలు ఇలా..

• క్లాసిక్‌, సిల్వర్‌, గ్లోబల్‌, కాంటాక్ట్‌లెస్‌ డెబి ట్‌ కార్డుల వార్షిక మెయింటేనెన్స్‌ చార్జీలు రూ.200కు పెరుగుతున్నాయి. దీనిపై జీఎస్టీ అదనం. ప్రస్తుతం ఈ కార్డులకుగాను ఏటా ఖాతాదారుల నుంచి బ్యాంక్‌ రూ.125, జీఎస్టీ వసూలు చేస్తున్నది.
• యువ, గోల్డ్‌, కాంబో డెబిట్‌ కార్డ్‌, మై కార్డ్‌ (ఇమేజ్‌ కార్డ్‌) చార్జీలూ పెరుగుతాయి. ప్రస్తుత చార్జీ రూ.175గా ఉన్నది. అయితే ఇకపై రూ.250గా ఉంటుంది. జీఎస్టీ అదనం.
• ప్లాటినమ్‌ డెబిట్‌ కార్డు వార్షిక మెయింటేనెన్స్‌ చార్జీ రూ.250 నుంచి రూ.325కు వెళ్లనున్నది. జీఎస్టీ అదనం.
• ప్రైడ్‌ ప్రీమియం బిజినెస్‌ డెబిట్‌ కార్డుల వంటి వాటిపై వార్షిక మెయెంటేనెన్స్‌ చార్జీ రూ.425గా ఉండబోతున్నది. దీనిపై జీఎస్టీ మరికొంత చెల్లించాల్సి ఉంటుంది. ప్రస్తుతం ఇది రూ. 350, జీఎస్టీగా ఉన్నది.

క్రెడిట్‌ కార్డులపై..
కొన్ని క్రెడిట్‌ కార్డులతో చేసే అద్దె చెల్లింపులపై అక్రూవల్‌ రివార్డ్‌ పాయింట్లను తొలగిస్తున్నట్టు ఎస్బీఐ ఈ సందర్భంగా ప్రకటించింది. ఏప్రిల్‌ 1 నుంచి ఈ నిర్ణయం అమల్లోకి రానున్నది. అలాగే ఆయా క్రెడిట్‌ కార్డులతో చేసే అద్దె చెల్లింపులపై ఇప్పటిదాకా ఉన్న అక్యుములేషన్‌ రివార్డ్‌ పాయింట్లనూ తీసేస్తున్నట్టు బ్యాంక్‌ తెలిపింది. ఏప్రిల్‌ 15 నుంచి ఈ నిర్ణయం వర్తిస్తుంది.