ఎస్బీఐ రికార్డు లాభం

• క్యూ4లో రూ.9,111 కోట్లు
• దన్నుగా నిలిచిన ఎన్‌ఐఐ
• తగ్గిన మొండి బకాయిలు
• 710 శాతం డివిడెండ్‌

‘అన్ని విభాగాల్లో బ్యాంక్‌ సరైన వృద్ధిని సాధించింది. వ్యాపార, లాభాలు, ఆస్తుల నాణ్యత ప్రమాణాలు పాటించింది. భవిష్యత్తులో వచ్చే షాక్‌లను తట్టుకునే స్థితికి బ్యాంక్‌ చేరుకున్నదని, బ్యాంక్‌ పనితీరు మెరుగుపడేదానిపై ఆశావాద దృక్పథంతో ఉన్నాను.
– దినేశ్‌ ఖారా, ఎస్బీఐ చైర్మన్‌

ముంబై, మే 13: దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) రికార్డు స్థాయి లాభాలను ఆర్జించింది. గడిచిన ఆర్థిక సంవత్సరం చివరి త్రైమాసికానికిగాను రూ.9,114 కోట్ల స్టాండ్‌లోన్‌ నికర లాభాన్ని గడించింది. ఒక త్రైమాసికంలో ఇంతటి స్థాయి లాభాలను ఆర్జించడం ఇదే తొలిసారి. వడ్డీల మీద వచ్చే ఆదాయం పుంజుకోవడం, మొండి బకాయిలు తగ్గుముఖం పట్టడం బ్యాంక్‌కు కలిసొచ్చింది. అంతక్రితం ఏడాది ఇదే త్రైమాసికంలో బ్యాంక్‌ రూ.6,451 కోట్ల నికర లాభాన్ని గడించింది. సమీక్షకాలంలో బ్యాంక్‌ ఆదాయం రూ.81,327 కోట్ల నుంచి రూ.82,613 కోట్లకు చేరుకున్నట్లు బీఎస్‌ఈకి సమాచారం అందించింది.

ఆర్థిక ఫలితాల్లో ముఖ్య అంశాలు..

• 2021-22 ఆర్థిక సంవత్సరానికిగాను బ్యాంక్‌ నికర లాభం ఏడాది ప్రాతిపదికన 55.19 శాతం ఎగబాకి రూ.31,676 కోట్లకు చేరుకున్నది. అంతక్రితం ఇది రూ.20,410 కోట్లుగా ఉన్నది.
• నికర వడ్డీ ఆదాయం 15.26 శాతం పెరిగి రూ.27,067 కోట్ల నుంచి రూ.31,198 కోట్లకు చేరింది.
• దేశీయ నికర వడ్డీ మార్జిన్‌(ఎన్‌ఐఎం) 29 బేసిస్‌ పాయింట్లు పెరిగి 3.11 శాతం నుంచి 3.40 శాతానికి ఎగబాకింది.
• బ్యాంక్‌ స్థూల నిరర్థక ఆస్తుల విలువ 4.98 శాతం నుంచి 3.97 శాతానికి దిగిరాగా, నికర ఎన్‌పీఏ కూడా 1.50 శాతం నుంచి 1.02 శాతానికి దిగొచ్చింది.
• ఫ్యూచర్‌ గ్రూపు, శ్రేయ గ్రూపులకు ఇచ్చిన రుణాలపై ఎలాంటి భయం లేదని, తాకట్టు పెట్టుకొని రుణాలు ఇచ్చినట్లు బ్యాంక్‌ వర్గాలు వెల్లడించాయి.
• గత త్రైమాసికంలో కొత్తగా రూ.2,845 కోట్ల రుణాలు మొండి బకాయిల జాబితాలోకి చేరాయి. అలాగే రూ.6,756 కోట్ల రుణాలను రికవరి చేసింది బ్యాంక్‌.
• మొండి బకాయిలను పూడ్చుకోవడానికి బ్యాంక్‌ నిధుల కేటాయింపులు రూ.13,249 కోట్ల నుంచి రూ.10,603 కోట్లకు తగ్గాయి.
• కన్సాలిడేటెడ్‌ ఆధారంగా బ్యాంక్‌ నికర లాభం 56 శాతం అధికమై రూ.9,549 కోట్లుగా నమోదైంది.
• దేశీయ అడ్వాన్స్‌లు 10.27 శాతం చొప్పున అధికమవగా, రిటైల్‌ పర్సనల్‌ అడ్వాన్స్‌లు 15.11 శాతం పెరిగాయి.
• విదేశీ ఆఫీస్‌ అడ్వాన్స్‌లు 15.42 శాతం పెరుగగా, బ్యాంక్‌ రిటైల్‌ పోర్ట్‌ఫోలియో రూ.10 లక్షల కోట్లు దాటింది.
• బ్యాంక్‌ దేశీయ అడ్వాన్స్‌ల్లో గృహ రుణాల వాటా 23 శాతంగా ఉన్నది. అంతక్రితం ఏడాదితో పోలిస్తే 11.49 శాతం పెరిగింది.
• బ్యాంక్‌ మొత్తం డిపాజిట్లు 10 శాతం అధికమవగా, పొదుపు బ్యాంక్‌ డిపాజిట్లు 10.45 శాతం చొప్పున పెరిగాయి.
• రూపాయి ముఖ విలువ కలిగిన ప్రతిషేరుకు రూ.7.10 లేదా 710 శాతం డివిడెండ్‌ను బ్యాంక్‌ బోర్డ్‌ డైరెక్టర్లు ప్రతిపాదించారు.
• బ్యాంక్‌ షేరు ధర 3.76 శాతం తగ్గి రూ.445.05 వద్ద నిలిచింది.