ఎస్బీఐ లాభం 6,068 కోట్లు

దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) నిరాశాజనక ఆర్థిక ఫలితాలు ప్రకటించింది. ప్రస్తుత ఆర్థిక సంవత్సరం తొలి త్రైమాసికానికిగాను రూ.6,068 కోట్ల స్టాండ్‌లోన్‌ నికర లాభాన్ని గడించింది.

• క్యూ1లో 7 శాతం తగ్గిన ప్రాఫిట్‌

న్యూఢిల్లీ, ఆగస్టు 6: దేశీయ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా(ఎస్బీఐ) నిరాశాజనక ఆర్థిక ఫలితాలు ప్రకటించింది. ప్రస్తుత ఆర్థిక సంవత్సరం తొలి త్రైమాసికానికిగాను రూ.6,068 కోట్ల స్టాండ్‌లోన్‌ నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.6,504 కోట్ల లాభంతో పోలిస్తే 7 శాతం తగ్గిందని పేర్కొంది. ఆదాయం తగ్గడం ఇందుకు కారణమని బ్యాంక్‌ వర్గాలు వెల్లడించాయి. ఏడాది క్రితం రూ.77,347.17 కోట్లుగా ఉన్న బ్యాంక్‌ స్టాండ్‌లోన్‌ మొత్తం ఆదాయం గత త్రైమాసికానికిగాను రూ.74,998.57 కోట్లకు దిగొచ్చినట్లు బ్యాంక్‌ బీఎస్‌ఈకి సమాచారం అందించింది.

• బ్యాంక్‌ ఆపరేటింగ్‌ ప్రాఫిట్‌ ఏడాది ప్రాతిపదికన 33 శాతం తగ్గి రూ.12,753 కోట్లకు పరిమితమయ్యాయి. ఏడాది క్రితం ఇది రూ.18,975 కోట్లుగా ఉన్నది.
• బ్యాంక్‌కు వడ్డీల మీద వచ్చే ఆదాయం రూ.65,564 కోట్ల నుంచి రూ.72,676 కోట్లకు చేరుకున్నది. అలాగే నికర వడ్డీ ఆదాయం కూడా రూ.27,638 కోట్ల నుంచి రూ.31,196 కోట్లకు పెరిగింది.
• నికర వడ్డీ మార్జిన్‌ 3.15 శాతం నుంచి 3.23 శాతానికి చేరుకున్నది.

  బ్యాంక్‌ స్థూల నిరర్థక ఆస్తుల విలువ 5.32 శాతం నుంచి 3.91 శాతానికి దిగిరాగా, నికర ఎన్‌పీఏ కూడా 1.7 శాతం నుంచి 1.02 శాతానికి తగ్గింది.

• మొండి బకాయిలను పూడ్చుకోవడానికి బ్యాంక్‌ రూ.4,268 కోట్ల నిధులను వెచ్చించింది. ఏడాది క్రితం ఇది రూ.5,030 కోట్లుగా ఉన్నది.

  గత త్రైమాసికంలో కొత్తగా రూ.9,740 కోట్ల బకాయిలు మొండి బకాయిల జాబితాలోకి చేరాయి.

• బ్యాంక్‌ ప్రొవిజనింగ్‌ కవరేజ్‌ రేషియో(పీసీఆర్‌) 719 బేసిస్‌ పాయింట్లు ఎగబాకి 75.05 శాతానికి చేరుకున్నాయి.
• ఏకీకృత విషయానికి వస్తే రూ.94,524.30 కోట్ల ఆదాయంపై రూ.7,325.11 కోట్ల నికర లాభాన్ని గడించింది.
• బ్యాంక్‌ బ్యాలెన్స్‌ షీట్‌ రూ.50 లక్షల కోట్ల మార్క్‌ను దాటింది. అడ్వాన్స్‌లు 14.93 శాతం ఎగబాకగా, డిపాజిట్లు 8.73 శాతం పెరిగాయి.
• క్యాపిటల్‌ అడెక్యూ రేషియో 13.43 శాతంగా ఉన్నది.
• బ్యాంక్‌కు మార్క్‌-టూ-మార్కెట్‌(ఎంటీఎం) రూపంలో రూ.6,549 కోట్ల నష్టం వాటిళ్లింది.
• ఎంటీఎం అంటే: కొనుగోలు చేసినప్పుడు ఉన్న ఆస్తుల విలువ కంటే ప్రస్తుతం ఉన్న విలువ తక్కువగా ఉండటం. దీంతో బ్యాంక్‌కు భారీ నష్టం సంభవించింది.

‘ఎంటీఎం నష్టంతో నికర, ఆపరేటింగ్‌ లాభాలపై ప్రతికూల ప్రభావం చూపింది. స్థూల ఆదాయం ఆశించిన స్థాయిలో వృద్ధిని కనబరిచింది.

– దీనేశ్‌ ఖారా, ఎస్బీఐ చైర్మన్‌