Arctic Ocean | ప్రమాదపుటంచున ఆర్కిటిక్‌.. ప్రపంచ ఉష్ణోగ్రతలపై ప్రభావం!

ఆర్కిటిక్‌ మహాసముద్రం ఎకోసిస్టమ్‌లో వేగంగా మార్పులు జరుగుతున్నాయి. గతంలో ఎన్నడూ లేని విధంగా ఆర్కిటిక్‌ ప్రాంతంలో 20 డిగ్రీల సెల్సియస్‌ మేర ఉష్ణోగ్రతలు పెరిగాయి. ఫిబ్రవరి చివరి నాటికి ఆర్కిటిక్‌ మంచు కనిష్ఠ స్థాయిలో నమోదైంది.

• వేగంగా కరుగుతున్న మంచు
• వరుసగా మూడో నెల కనిష్ఠ స్థాయికి సముద్రపు మంచు

Arctic Ocean | న్యూయార్క్‌, మార్చి 12 : ఆర్కిటిక్‌ మహాసముద్రం ఎకోసిస్టమ్‌లో వేగంగా మార్పులు జరుగుతున్నాయి. గతంలో ఎన్నడూ లేని విధంగా ఆర్కిటిక్‌ ప్రాంతంలో 20 డిగ్రీల సెల్సియస్‌ మేర ఉష్ణోగ్రతలు పెరిగాయి. ఫిబ్రవరి చివరి నాటికి ఆర్కిటిక్‌ మంచు కనిష్ఠ స్థాయిలో నమోదైంది. ఇలా వరుసగా మూడోసారి జరగడం ఆందోళన కలిగిస్తున్నది.

2050 నాటికి మంచు రహిత వేసవి…

ప్రపంచ వాతావరణంలో, ఉష్ణోగ్రతలను అదుపులో ఉంచడంలో ఆర్కిటిక్‌ కీలకపాత్ర పోషిస్తున్నది. దీన్ని భూగ్రహ ఎయిర్‌ కండిషనర్‌గా శాస్త్రవేత్తలు పిలుస్తుంటారు. భూతాపం పెరుగుదలకు ఆర్కిటిక్‌లో మంచు కరగడం ముందస్తు ప్రమాద సూచికగా భావించవచ్చు. సాధారణంగా ఈ సమయానికి ఆర్కిటిక్‌లో మంచు గరిష్ఠ స్థాయిలో నమోదవ్వాలి. కానీ, అందుకు విరుద్ధంగా ఇప్పుడు కనిష్ఠ స్థాయి నమోదవుతున్నాయి. ఆర్కిటిక్‌లో సెప్టెంబర్‌ చివరికి వేసవి ముగుస్తుంది. ఆ సమయంలో మంచు కరగడం సాధారణం. కానీ, ఇప్పుడు వేసవి ముగిసినా మంచు ఎక్కువగా కరిగి కనిష్ఠ స్థాయికి చేరుకుంటున్నది. ఇది ఇలాగే కొనసాగితే 2050 నాటికి మంచు రహితంగా ఆర్కిటిక్‌ను చూడాల్సి వస్తుందని శాస్త్రవేత్తలు ఆందోళన వ్యక్తంచేస్తున్నారు.

• ఈ ఫిబ్రవరిలో సముద్రపు మంచు 5.3 మిలియన్‌ చదరపు అడుగుల మైళ్లుగా నమోదైంది.
• 1991-2020 మధ్యకాలంలో ఫిబ్రవరి నెలల సగటుతో పోలిస్తే ఇది 8 శాతం తక్కువ.
• 2024 డిసెంబర్‌ నుంచి ప్రతి నెల కనిష్ఠ స్థాయి నమోదవుతూ రికార్డు బద్దలవుతున్నాయి.

మంచు కరిగితే జరిగే అనర్థాలు…

• ఆర్కిటిక్‌ మంచు కరిగితే అక్కడి జీవవైవిధ్యం, 40 లక్షల మంది ప్రజలు, జంతుజాలంతో పాటు యావత్‌ ప్రపంచంపై దాని ప్రభావం పడుతుంది.
• ప్రపంచ సగటు కంటే నాలుగు రెట్లు వేగంతో ఆర్కిటిక్‌ మంచు కరుగుతున్నది.
• మహాసముద్రాల్లోని మంచు అద్దంలా పనిచేస్తుంది. తద్వారా భూమిపై ఉష్ణోగ్రతలు తక్కువగా నమోదవుతాయి.
• అదే మంచు లేకపోతే భూమిపై ఉష్ణోగ్రతలు విపరీతంగా పెరుగుతాయి.
• ట్టి, రాళ్లు, ఇతర అవక్షేపాల మిశ్రమమైన మంచు కరిగితే కార్బన్‌ డై ఆక్సైడ్‌, మీథేన్‌ వాయువులు విడుదల అవుతాయి.
• సముద్రమట్టాలు పెరిగి నగరాలు కనుమరుగవుతాయి.

ఎందుకు కరుగుతున్నట్టు..

• గ్రీన్‌ల్యాండ్‌లోని ఐస్‌ ఏటా 280 బిలియన్‌ టన్నుల చొప్పున కరుగుతున్నది.
• ఆర్కిటిక్‌ సమీప ప్రాంతాల్లో గత ఐదేండ్లుగా కార్చిచ్చులు ఎక్కువవుతున్నాయి.
• ఫ్రాన్స్‌ ఒప్పందాన్ని మొదటి నుంచి వ్యతిరేకిస్తున్న ట్రంప్‌.. అమెరికా నూతన అధ్యక్షుడిగా ఎన్నికైన తర్వాత వాతావరణ విభాగాన్ని నిర్వీర్యం చేశారు. అందులో పనిచేసే చాలామంది ఉద్యో గులకు ఉద్వాసన పలికారు.