Pawan Kalyan | చంద్రబాబును జైల్లో పెట్టినప్పుడు రోడ్లపైకి వచ్చింది జనసైనికులే!.. కూటమిలో జనసేనదే ఎక్కువ త్యాగం.. పవన్ కల్యాణ్ కీలక వ్యాఖ్యలు

Pawan Kalyan | కూటమి కోసం జనసేన, జనసైనికులు ఎన్నో త్యాగాలు చేశారని ఏపీ ఉప ముఖ్యమంత్రి పవన్‌ కల్యాణ్‌ అన్నారు. చంద్రబాబు అరెస్టు సమయంలో రోడ్లపైకి వచ్చి సంఘీభావం తెలిపింది జనసైనికులేనని గుర్తుచేశారు. కూటమిలోని మూడు పార్టీల్లో జనసేన పార్టీనే చాలా త్యాగం చేసిందని తెలిపారు. స్థానిక ఎన్నికల్లో వారికి తగిన ప్రాతినిధ్యం కల్పించాలని కోరారు.

Pawan Kalyan | కూటమిలోని మూడు పార్టీల్లో జనసేన పార్టీ, జనసైనికులే ఎక్కువ త్యాగాలు చేశారని ఆ పార్టీ అధినేత, ఏపీ ఉప ముఖ్యమంత్రి పవన్‌ కల్యాణ్‌ అన్నారు. 2024లో చంద్రబాబు నాయుడిని రాజమండ్రి జైల్లో పెట్టినప్పుడు.. ఎవరూ ముందుకు రాలేదని.. అప్పుడు జనసైనికులు, వీరమహిళలు రోడ్లపైకి వచ్చి సంఘీభావం తెలిపారని గుర్తుచేశారు. కూటమిలోని మూడు పార్టీల్లో జనసేన పార్టీనే చాలా త్యాగం చేసిందని తెలిపారు. కష్టకాలంలో అండగా నిలిచిన వారి త్యాగాలను గుర్తించి, రాబోయే స్థానిక సంస్థల ఎన్నికల్లో జనసైనికులకు తగిన ప్రాతినిధ్యం కల్పించాలని కూటమి నాయకులకు పిలుపునిచ్చారు. కూటమి విజయం కోసం పనిచేసిన ప్రతి కార్యకర్తకు తగిన గుర్తింపు, గౌరవం దక్కాలని స్పష్టం చేశారు.

ఆదివారం పోలవరం జిల్లా రంపచోడవరం నియోజకవర్గం కాకవాడలో ‘అడవితల్లి బాట 2.0’ కార్యక్రమాన్ని ప్రారంభించిన అనంతరం పవన్‌ కల్యాణ్‌ మాట్లాడారు. రాబోయే స్థానిక సంస్థల ఎన్నికల్లో కూటమి అభ్యర్థులను గెలిపించేందుకు అన్ని పార్టీల నాయకులు, జనసైనికులు, వీరమహిళలు సమన్వయంతో పనిచేయాలని కోరారు.

చంద్రబాబును జైల్లో పెట్టినప్పుడు ఎవరూ రోడ్ల మీదకు రాలేదు.. కానీ మా జనసైనికులు వచ్చారు

కూటమిలోని మూడు పార్టీల్లో జనసేనే చాలా త్యాగం చేసింది

దానికి తగిన ప్రాతినిధ్యం ఇచ్చేలా ప్రతి నాయకుడు అండగా ఉండాలి

– డిప్యూటీ సీఎం పవన్ కళ్యాణ్ https://t.co/G8p7fvNpGG

— Telugu Scribe (@TeluguScribe) October 11, 2026

2014లో కూటమికి మద్దతుగా నిలిచినప్పుడు జనసైనికులు పదవులు ఆశించలేదని పవన్‌ కల్యాణ్‌ పేర్కొన్నారు. రాష్ట్ర ప్రయోజనాలే ముఖ్యమని భావించి నిస్వార్థంగా పనిచేశారని చెప్పారు. పార్టీ, కూటమి కోసం వ్యక్తిగత ప్రయోజనాలను పక్కనపెట్టి ఎన్నో త్యాగాలు చేశారన్నారు. చంద్రబాబు అరెస్టు సమయంలోనూ జనసైనికులు, వీరమహిళలు రోడ్లపైకి వచ్చి తమ సంఘీభావాన్ని చాటారని గుర్తుచేశారు. అలాంటి కార్యకర్తల నమ్మకాన్ని నిలబెట్టుకోవాల్సిన బాధ్యత కూటమి నాయకులపై ఉందన్నారు.

రాబోయే స్థానిక సంస్థల ఎన్నికలు జనసైనికుల భవిష్యత్తుకు భరోసా కల్పించేలా ఉండాలని పవన్‌ కల్యాణ్‌ ఆకాంక్షించారు. పొత్తు ధర్మాన్ని గౌరవిస్తూ జనసేన కార్యకర్తలు, వీరమహిళలకు తగిన ప్రాతినిధ్యం కల్పించాలని కోరారు. పార్టీ కోసం, కూటమి విజయం కోసం కష్టపడిన ప్రతి ఒక్కరికీ తగిన గుర్తింపు లభించేలా కూటమిలోని నాయకులు అండగా నిలవాలని సూచించారు.

గిరిజన గ్రామాలకు రహదారి సదుపాయాలు కల్పించి, వాటిని అభివృద్ధి పథంలోకి తీసుకురావడమే ‘అడవితల్లి బాట’ కార్యక్రమం లక్ష్యమని పవన్‌ కల్యాణ్‌ తెలిపారు. రహదారుల నిర్మాణంతో విద్య, వైద్యం, ఉపాధి, రవాణా, మార్కెట్‌ సదుపాయాలను మెరుగుపరిచేందుకు చర్యలు తీసుకుంటున్నట్లు చెప్పారు. ప్రధాని నరేంద్ర మోదీ సహకారంతో, సీఎం చంద్రబాబు నాయకత్వంలో పీఎం-జన్మన్‌, పీఎంజీఎస్‌వై-4, ఉపాధి హామీ పథకాలను సమన్వయం చేస్తూ ఈ కార్యక్రమాన్ని అమలు చేస్తున్నట్లు వివరించారు.

అడవితల్లి బాట 2.0 కింద రూ.2,052 కోట్లతో 2,569 పనులకు శ్రీకారం చుట్టినట్లు వెల్లడించారు. 1,341 గిరిజన ఆవాసాలకు 1,976 కిలోమీటర్ల మేర రహదారులతోపాటు 45 వంతెనలను నిర్మించనున్నట్లు తెలిపారు. గతంలో గిరిజన ప్రాంతాల్లో పర్యటించినప్పుడు రహదారులు లేక ప్రజలు ఎదుర్కొంటున్న ఇబ్బందులను ప్రత్యక్షంగా చూశానని చెప్పారు. కొండ ప్రాంతాల్లో రహదారుల నిర్మాణం సవాళ్లతో కూడుకున్నదని, అయినప్పటికీ గిరిజన ప్రాంతాలకు మెరుగైన రవాణా సదుపాయాలు కల్పించేందుకు ప్రభుత్వం కృషి చేస్తోందని పవన్‌ కల్యాణ్‌ వివరించారు.