RTC EU | అధికార పార్టీ మద్దతున్న కూటమిపై ఇ.యు ఘన విజయం అభినందనీయం : ఏపీ యూనియన్‌

RTC EU | తెలంగాణ రాష్ట్ర రోడ్డు రవాణా సంస్థ గుర్తింపు కార్మిక సంఘం ఎన్నికల్లో ఘనవిజయం సాధించిన ఎంప్లాయీస్ యూనియన్ కూటమి నాయకత్వానికి ఏపీ పీటీడీ (ఆర్టీసీ) ఎంప్లాయీస్ యూనియన్ రాష్ట్ర కమిటీ అభినందనలు తెలిపింది.

హైదరాబాద్‌ : తెలంగాణ రాష్ట్ర రోడ్డు రవాణా సంస్థ ( TS RTC ) గుర్తింపు కార్మిక సంఘం ఎన్నికల్లో అధికార పార్టీ మద్దతున్న కూటమితో తలపడి ఘనవిజయం సాధించిన ఎంప్లాయీస్ యూనియన్ (EU )కూటమి నాయకత్వానికి ఏపీ పీటీడీ (ఆర్టీసీ) ఎంప్లాయీస్ యూనియన్ రాష్ట్ర కమిటీ అభినందనలు ( Congratulates ) తెలిపింది. అధికార బలం కంటే కార్మికుల విశ్వాసమే గొప్పదని తెలంగాణలో ఎన్నికలు నిరూపించాయని ఇ.యు. రాష్ట్ర అధ్యక్షులు పలిశెట్టి దామోదరరావు( Damodara Rao ), రాష్ట్ర ప్రధాన కార్యదర్శి జి.వి. నరసయ్య ( GV Narsaiah ) అన్నారు.

కార్మికుల ప్రయోజనాల కోసం నిజాయితీతో, నిబద్ధతతో సాగించే పోరాటాలకే ఉద్యోగులు పట్టం కడతారని తెలంగాణ ఆర్టీసీ ఎన్నికల ఫలితాలు మరోసారి నిరూపించాయని పేర్కొన్నారు. ఆంధ్రప్రదేశ్‌లో ఎంప్లాయీస్ యూనియన్ గుర్తింపు సంఘంగా ఉన్న సమయంలోనే ఆర్టీసీని ప్రభుత్వంలో విలీనం చేయించడంలో కీలక పాత్ర పోషించామని గుర్తుచేశారు. అదే స్ఫూర్తితో తెలంగాణలోనూ ఆర్టీసీ ప్రభుత్వ విలీన లక్ష్యాన్ని ఇ.యు. నాయకత్వంలో సాధించగలరన్న విశ్వాసాన్ని వ్యక్తం చేశారు.

ఈ విజయం కేవలం ఒక సంఘానిది కాదని, కార్మికుల హక్కులు, ఉద్యోగ భద్రత, ప్రభుత్వ రంగ సంస్థల పరిరక్షణ కోసం సాగుతున్న ఉద్యమాలకు లభించిన విజయమని అభివర్ణించారు. రెండు తెలుగు రాష్ట్రాల్లో ఆర్టీసీ సంస్థల పరిరక్షణకు, ఉద్యోగుల హక్కుల సాధనకు ఎంప్లాయీస్ యూనియన్ల నాయకత్వం పరస్పర సహకారంతో నిరంతరం కృషిచేస్తుందని వారు వెల్లడించారు.