వరి ఇలా సాగితే సరి!

• విత్తన శుద్ధితో తెగుళ్ల నివారణ
• వరి నారుమడిలో సరైన విధానాలు అనుసరించాలి
• 25-30 రోజుల లేత నారు నాటడం శ్రేయస్కరం
• భూసార వృద్ధికి సేంద్రియ, జీవన ఎరువులు వాడాలి
• పొలంలో కాలిబాటలతో అనేక ఉపయోగాలు

వరిలో విత్తనం ఎంపిక దగ్గర నుంచి నారుమడి తయారీ, విత్తనం చల్లడం, సరైన సమయంలో నాటుకోవడం, ప్రధాన పొలంలో యాజమాన్య పద్ధతులను పాటించడం ద్వారా మంచి దిగుబడులు సాధించవచ్చని నిపుణులు సూచిస్తున్నారు. వరిలో విత్తనం ఎంపిక చేయడం, నారుపోత నుంచి కోతకోసే వరకు అనుసరించాల్సిన విధానాలు ఇవి.

ప్రధాన పొలంలో యాజమాన్య పద్ధతులు

• సమగ్ర పంట యాజమాన్యంలో భాగంగా భూసార వృద్ధి, చీడపీడలను అదుపులో పెట్టేందుకు, పంట సాగులో ఖర్చు తగ్గించేందుకు సేంద్రియ, రసాయనిక ఎరువులు వాడాలి.
• పచ్చరొట్ట పైర్లు అయిన జీలుగు, జనుము, పెసర మొదలైనవి ప్రధాన పంట సాగుకు ముందు పొలంలో చల్లుకుని పూతదశకు ముందు భూమిలో కలియదున్నాలి. ఎకరాకు 20 కిలోల వరకు విత్తనం వాడితే శ్రేయస్కరం. పచ్చిరొట్ట పైరు వయస్సు 20-25 రోజులప్పుడు ఎకరాకు 20 కిలోల యూరియా పైపాటుగా తేమ ఉన్నప్పుడు చల్లాలి. పచ్చిరొట్ట భూమిలో కలియదున్నేటప్పుడు ఎకరాకు 50 కిలోల సూపర్‌ ఫాస్ఫేట్‌ దమ్ములో వేసి కలియదున్నితే పచ్చిరొట్ట త్వరగా చీకుతుంది. నాటు వేసే ముందు వరినారు కట్టల కొనలు తుంచినట్లయితే కాండం తొలుచు పురుగు, ఆకుచుట్టు పురుగు పెట్టిన గుడ్లను నాశనం చేయవచ్చు.
• జీవన ఎరువులైన పాస్పో బ్యాక్టీరియా రెండు కిలోలు, అజోస్పైరిల్లమ్‌ రెండు కిలోలు ఎకరాకు మొత్తం 4 కిలోలు నాటు రోజున నారుమడిలో ఒక మూలన గుంత తీసి నీటితో నింపి నాలుగు కిలోల జీవన ఎరువు నీటిలో బాగా కలిపి నారు వేర్లను ఈ ద్రావణంలో ముంచి నాటితే ఎకరాకు 10-15 కిలోల నత్రజని, భాస్వరం ఆదా చేసుకోవచ్చు.
• నాట్లు వేసేటప్పుడు పొలంలో చిలపచిలపగా నీరు ఉండాలి. నాట్లు పైపైన నాటాలి. నాటేటప్పుడు నారు లేత ఆకుపచ్చ రంగులో ఉంటే తొందరగా మూన తిరిగి పిలకలు తొడుగుతుంది.
• నత్రజని ఎరువులు నారు తీసేటప్పుడు వేయరాదు. వరి వంగడాల కాలపరిమితి, భూసారాన్ని బట్టి కుదుళ్లు లేదా మొక్కల సంఖ్య నిర్ధారించాలి. దీర్ఘకాలిక రకాలకు చదరపు మీటరుకు 33 మొక్కలు, మధ్యకాలిక రకాలకు 44 మొక్కలు, స్వల్పకాలిక రకాలను 66 మొక్కలు నాటాలి.
• ముదురు నారుమళ్లు నాటాల్సి వస్తే కుదుళ్ల సంఖ్యను పెంచి దగ్గరదగ్గర నాటాలి. నత్రజని ఎరువులను మూడు దఫాలుగా కాకుండా రెండు దఫాలుగా నాటినప్పుడు సగభాగం, మిగతా సగభాగం చిరుపొట్ట దశలో వేయాలి.
• నాటిన తర్వాత ప్రతి 2 లేదా 3 మీటర్లకు ఖాళీ బాటలు తీయాలి. ఈ బాటలు తూర్పు, పడమర దిక్కులో ఉన్నట్లయితే గాలి, వెలుతురు బాగా సోకుతాయి.
• నాటిన 5 లేదా 6 రోజుల వరకు ఎక్కువ నీరు పొలంలో ఉంచాలి. పిలక దశలో 2.5 సెంటీమీటర్ల చిరుపొట్ట దశ నుంచి కోతకు వారం రోజుల ముందు వరకు 5 సెంటీమీటర్లు నీరు పెడుతూ ఆరబెట్టాలి.
• రసాయనిక ఎరువులు పొలంలో వేసే ముందు పొలంలో నీరు తక్కువగా ఉండాలి. ఆ ఎరువును పశువుల పెంట, వేపపిండి, వర్మీకంపోస్ట్‌, మెత్తటి మట్టి ఏదైనా ఒకదానితో కలిపి చల్లినైట్లెయితే వేసిన రసాయనిక ఎరువులు సమర్థవంతంగా పనిచేస్తాయి.

నారుమడిలో పాటించాల్సిన విధానాలు

• నారుమడిలో మొదటిసారి నీరుపెట్టి దమ్ము చేయడానికి ముందు ఒక బండి (250-300 కిలోలు) మాగిన పశువుల ఎరువు లేదా 100 కిలోల వర్మీకంపోస్ట్‌ సమానంగా చల్లాలి. మొదటి దమ్ముకు ముందు 5 సెంట్లు నారుమడికి రెండు కిలోల జింక్‌ సల్ఫేట్‌ వేయాలి. దీనివల్ల నారుమడిలో జింక్‌లోపం తక్కువగా కన్పిస్తుంది. చివరి దమ్ములో 5 సెంట్ల నారుమడికి 9 కిలోల సూపర్‌ ఫాస్ఫేట్‌ లేదా 4 కిలోల డీఏపీ, 3 కిలోల మ్యూరేట్‌ ఆఫ్‌ పొటాష్‌ చల్లి నారుమడిని చదును చేసుకోవాలి.
• నీటినారు అయితే మొలకెత్తిన విత్తనం ముందుగా తయారు చేసిన బెడ్లలో సమానంగా జల్లాలి. రెండు బెడ్ల మధ్య ఒక అడుగు బాట వదలాలి.
• నారుమడిలో నారుచల్లిన వారం రోజలు వరకు నీరు పెడుతూ తీసివేయాలి. వారం తర్వాత నారుమడిలో రెండు సెంటీమీటర్ల వరకు నీరు నిల్వ కట్టాలి.
• ఈ విధంగా చేసినైట్లెతే కలుపు సమస్య తగ్గుతుంది. నారు ఆరోగ్యంగా పెరుగుతుంది.
• నారు వయస్సు 10-12 రోజులు ఉన్నసప్పుడు అవసరాన్ని బట్టి 5 సెంట్ల నారుమడికి 2.5 కిలోల యూరియా పైపాటుగా పశువుల ఎరువు లేదా వేప పిండితో కలిపి చల్లాలి. ఈ విధంగా చేసినట్లయితే నారు పిలకలు బాగా తొడుగుతాయి. యూరియా వేసేందుకు ముందు నారుమడిలో నీరు తీసివేయాలి.
• నారు వయస్సు 18-20 రోజులు ఉన్నప్పుడు నారు తీసేందుకు 7-10 రోజులుముందు 5 సెంట్ల నారుమడికి 800 గ్రాముల ప్యూరడాన్‌ 3జీ గుళికలు 3 రెట్లు ఇసుకతో కలిపి నారుమడిలో 2.5 సెంటీమీటర్ల నీరు నిల్వకట్టి సమానంగా చల్లాలి. ఈ విధంగా చేయడం వల్ల నాటిన తర్వాత 20-25 రోజుల వరకు పంటను చీడపురుగుల బారి నుంచి కాపాడుకోవచ్చు.

విత్తన శుద్ధి

• సమగ్ర సస్యరక్షణలో విత్తన శుద్ధి ఒక ప్రధాన అంశం. దీని వల్ల తక్కువ ఖర్చుతో ఎక్కువ ఫలితం పొందవచ్చు.
• విత్తనం ద్వారా శిలీంద్రపు తెగులు, బ్యాక్టీరియా తెగులు సంక్రమించి పంట దిగుబడి తగ్గడమేగాక విత్తన నాణ్యత చెడిపోతుంది. ఈ నష్టాలను అధిగమించేందుకు విత్తన శుద్ధి తప్పనిసరి.
• విత్తన శుద్ధి చేసేందుకు ప్రత్యేక పరిజ్ఞానం అవసరం లేదు. గోతాలు, కుండలు, డ్రమ్ములు, గాబులు వంటి సాధారణ పరికరాలే వాడవచ్చు.
• మెట్ట నారుమళ్లు అయితే కిలో వరి విత్తనానికి రెండు లేదా మూడు గ్రాముల కార్బండిజమ్‌ మందును, పొడి విత్తనం చల్లేందుకు 24 గంటల ముందు విత్తనాలకు పట్టించి మెట్ట నారుమళ్లలో జల్లుకోవచ్చు. నీటి నారు అయితే విత్తన పరిమాణాన్ని బట్టి అంతే పరిమాణంలో టిని పైన తెలిపిన ఏదో పరికరంలో తీసుకుని లీటర్‌ నీటికి 1 లేదా 2 గ్రాములు కార్బండిజమ్‌ చొప్పున కలిపి ఈ ద్రావణంలో వరి విత్తనం 24 గంటలు నానబెట్టాలి. దీనిలో పైన తేలిన తాలు విత్తనం తీసివేయాలి. 24 గంటల తర్వాత విత్తనాన్ని మందు ద్రావణం నుంచి వేరు చేసి 36 నుంచి 48 గంటలు మండెకట్టి మొలకెత్తిన విత్తనాన్ని నీటి నారుమడిలో జల్లితే నారు మొక్కలు ఆరోగ్యంగా పెరుగుతాయి.
• ఎకరా పొలం నాటుకు 15 నుంచి 20 కిలోల వరి విత్తనం సరిపోతుంది. 15-20 కిలోల విత్తనం నారు పెంచేందుకు 5 సెంట్లు నారు మడి అవసరం.

యాజమాన్య పద్ధతులతో ఆశించిన ఫలితాలు

వరిలో విత్తనం ఎంపిక చేసిన దగ్గర నుంచి పంట కోతకు వచ్చే వరకు సరైన యాజమాన్య పద్దతులను పాటిస్తే మంచి ఫలితాలు సాధించొచ్చు. అనువైన విత్తనం ఎంపిక చేసుకుని తప్పక విత్తన శుద్ధి సుకోవాలి. తదుపరి నారుమడిని తయారు చేసుకుని విత్తనాలను చల్లుకోవాలి. వ్యవసాయ అధికారుల సూచనలు, సలహాలు తీసుకొని అధిగ దిగుబడులు పొందాలి.
-డి.నరేశ్‌. కేవీకే శాస్త్రవేత్త, గడ్డిపల్లి