టీఎంసీ జాతీయ ప్ర‌ధాన కార్య‌ద‌ర్శిగా మ‌మ‌త మేన‌ల్లుడు

పార్టీ అధినేత, ముఖ్యమంత్రి మమతా బెనర్జీ తన మేనల్లుడు ఎంపీ అభిషేక్ బెనర్జీ స్థాయిని మ‌రింత పెంచుతూ నిర్ణ‌యం తీసుకున్నారు. అభిషేక్ బెన‌ర్జీని పార్టీ జాతీయ ప్రధాన కార్యదర్శిగా నియమించడం ద్వారా అతనికి పెద్ద బాధ్యత అప్పగించారు.

June 5, 2021 / 09:04 PM IST

టీఎంసీ జాతీయ ప్ర‌ధాన కార్య‌ద‌ర్శిగా మ‌మ‌త మేన‌ల్లుడు

కోల్‌కతా : బెంగాల్ అసెంబ్లీ ఎన్నికల్లో ఘన విజయం తర్వాత‌ తృణమూల్ కాంగ్రెస్ (టీఎంసీ) ఇప్పుడు పార్టీపై దృష్టి పెట్టింది. పార్టీ అధినేత, ముఖ్యమంత్రి మమతా బెనర్జీ తన మేనల్లుడు ఎంపీ అభిషేక్ బెనర్జీ స్థాయిని మ‌రింత పెంచుతూ నిర్ణ‌యం తీసుకున్నారు. అభిషేక్ బెన‌ర్జీని పార్టీ జాతీయ ప్రధాన కార్యదర్శిగా నియమించడం ద్వారా అతనికి పెద్ద బాధ్యత అప్పగించారు. అసెంబ్లీ ఎన్నిక‌ల్లో ఘన విజయం సాధించిన అనంత‌రం మమతా అధ్యక్షతన టీఎంసీ వర్కింగ్ కమిటీ (కోర్ గ్రూప్) మొదటి సమావేశంలో ఈ నిర్ణయం తీసుకున్నారు. దీంతో, మమతా బెన‌ర్జీ తర్వాత తృణమూల్ పార్టీలో సెకండ్‌ కమాండర్‌గా అభిషేక్ జాతీయ స్థాయిలో చ‌క్రం తిప్ప‌నున్నారు. డైమండ్ హార్బ‌ర్ ఎంపీగా ఉన్న అభిషేక్ బెన‌ర్జీ.. జాతీయ ప్ర‌ధాన కార్య‌ద‌ర్శి ప‌ద‌వి నియామ‌కంతో యువ తృణ‌మూల్ అధ్య‌క్ష ప‌ద‌వి నుంచి త‌ప్పుకోనున్నారు. కాగా, ఇదే స‌మావేశంలో ‘వన్ పర్సన్ వన్ పోస్ట్’ విధానానికి కూడా ఆమోదం ల‌భించింది.

సమావేశంలో తీసుకున్న నిర్ణ‌యాల‌ను పార్టీ ప్రధాన కార్యదర్శి పార్థా ఛటర్జీ మీడియాకు వెల్ల‌డించారు. సినిమాల‌ నుంచి రాజకీయాల్లోకి వచ్చిన నటి సయోని ఘోష్‌కు యూత్ ప్రెసిడెంట్ బాధ్యతను అప్పగించారు. అసెంబ్లీ ఎన్నికల్లో అసన్‌సోల్ నుంచి టీఎంసీ అభ్య‌ర్థిగా నిలిచి బీజేపీకి చెందిన అగ్నిమిత్ర పాల్ చేతిలో ఓడిపోయింది. పార్టీ మహిళా మోర్చా అధ్యక్షురాలుగా ఎంపీ కకోలి ఘోష్ దస్తిదార్‌ను నియమించగా, రాజ్యసభ సభ్యుడు డోలా సేన్‌కు తృణమూల్ కాంగ్రెస్ ట్రేడ్ యూనియన్ జాతీయ అధ్యక్షుడిగా బాధ్యతలు అప్పగించారు. రాజ్యసభ మాజీ సభ్యుడు కునాల్ ఘోష్‌ను పార్టీ రాష్ట్ర ప్రధాన కార్యదర్శిగా నియమించారు. మాజీ మంత్రి పూర్ణేండు బసును టీఎంసీ రైతు విభాగానికి అధ్యక్షునిగా చేశారు. సీపీఐ (ఎం) కు చెందిన రాజ్యసభ మాజీ సభ్యుడు రితుబ్రతా బంధ్యోపాధ్యాయను రాష్ట్ర కార్మిక విభాగానికి అధ్యక్షుడిగా నియమించారు.