మెదక్‌ జిల్లాలో చిరుత సంచారం.. లేగ దూడ మృతి

తూప్రాన్‌ మండలం ఇస్లాంపూర్‌ తాండ శివారులో చిరుత సంచారం కలకలం రేపింది. రైతు పొలం వద్ద లేగ దూడపై దాడి చేయడంతో అది మృతి చెందింది.

మెదక్‌ జిల్లా తూప్రాన్‌ మండలం ఇస్లాంపూర్‌ తాండ శివారులో చిరుత పులి సంచారం స్థానికులను భయభ్రాంతులకు గురిచేస్తోంది. మంగళవారం రాత్రి లంబడి రాజు అనే రైతుకు చెందిన వ్యవసాయ పొలం వద్ద ఉన్న లేగ దూడపై చిరుత దాడి చేసింది. ఈ దాడిలో లేగ దూడ మృతి చెందింది.

చిరుత దాడి విషయం తెలియడంతో తాండవాసులు ఆందోళనకు గురయ్యారు. వ్యవసాయ పొలాల వైపు వెళ్లేందుకు రైతులు, కూలీలు భయపడుతున్నారు. చిరుత సంచారాన్ని గుర్తించి తగిన చర్యలు తీసుకోవాలని అటవీశాఖ అధికారులను స్థానికులు కోరుతున్నారు.