ఎదురులేని సౌందర్యం!

‘ప్రకృతి సిద్ధమైన సౌందర్య సాధనాలను వదిలిపెట్టి, రసాయన ఉత్పత్తులపై మోజు పెంచుకుంటూ శరీరాన్ని రోగాల కుప్పగా మార్చుకుంటున్నారు జనం. వీలైతే ఒక్కసారి వెదురు ఉత్పత్తులు ప్రయత్నించండి’ అంటూ సలహా ఇస్తున్నారు సౌందర్య నిపుణులు.

• వెదురు సహజంగా పెరుగుతుంది. రసాయన ఎరువుల అవసరం ఉండదు. ఈ మొక్కలో 70 శాతం సిలికా ఉంటుంది. వెదురు ఉత్పత్తులు శరీరంలో కొల్లాజిన్‌ పెరుగుదలను ప్రోత్సహిస్తాయి. వృద్ధాప్య లక్షణాలను నివారిస్తాయి.
• వెదురు పదార్థాలు రక్త ప్రసరణను మెరుగుపరుస్తాయి. ముఖంపై ముడతలను తొలగిస్తాయి. నల్లమచ్చలు, మొటిమలను తగ్గించడంలో, మృతకణాలకు జీవం పోయడంలో కీలకంగా పనిచేస్తాయి.
• జుట్టు, చర్మ సంరక్షణకు అద్భుతమైన పోషకం
  వెదురులోని సిలికా. దీనివల్ల ఒంటికి నిగారింపు వస్తుంది.
• యాంటీ ఇన్‌ఫ్లమేటరీ, యాంటీ బ్యాక్టీరియల్‌ లక్షణాలు వెదురులో అపారం. ఫలితంగా రోగ నిరోధక శక్తి పెరుగుతుంది.
• థయామిన్‌, నియాసిన్‌, విటమిన్‌-ఎ, విటమిన్‌-బి6, విటమిన్‌-ఇ తదితరాల సమాహారం వెదురు. ఇవి జుట్టు, చర్మం, గోళ్ల ఆరోగ్యాన్ని కాపాడతాయి.
• పులియబెట్టిన వెదురులో లాక్టోబాసిల్లస్‌ వంటివి పుష్కలంగా తయారవుతాయి. అవి తామర వ్యాధిని, మొటిమలను సమర్థంగా అడ్డు కుంటాయి.