ఇలా చేస్తే ఇల్లు విశాలం

ఇంట్లో ఎక్కడ ఉండాల్సిన వస్తువు అక్కడ ఉంటే అందంగా, ఆహ్లాదకరంగా ఉంటుంది. ఇల్లు చిన్నగా ఉన్నా అందంగా తీర్చిదిద్దుకోవాలని అందరూ కోరుకుంటారు. సరైన పద్ధతిలో ఇల్లు సర్దుకోకపోతే ఎంత విశాలమైన ఇల్లయినా ఇరుకుగా అనిపిస్తుంది.

ఇంట్లో ఎక్కడ ఉండాల్సిన వస్తువు అక్కడ ఉంటే అందంగా, ఆహ్లాదకరంగా ఉంటుంది. ఇల్లు చిన్నగా ఉన్నా అందంగా తీర్చిదిద్దుకోవాలని అందరూ కోరుకుంటారు. సరైన పద్ధతిలో ఇల్లు సర్దుకోకపోతే ఎంత విశాలమైన ఇల్లయినా ఇరుకుగా అనిపిస్తుంది. ఈ చిన్న టిప్స్‌ ఫాలో అయితే చిన్న ఇంటిని కూడా విశాలంగా మార్చుకోవచ్చు.

• ఇంట్లోకి ప్రవేశించగానే ప్రశాంతంగా అనిపించాలంటే హాల్‌ విశాలంగా ఉండాలి. అవసరం లేని వస్తువులను హాల్‌లో ఉంచకూడదు. సోఫా మాత్రమే హాల్‌లో వేసుకుంటే బాగుంటుంది. ప్రస్తుతం మార్కెట్‌లో మల్టిపర్పస్‌ సోఫాలు అందుబాటులో ఉన్నాయి. వీటిని దివాన్‌ లేదా సోఫా సెట్స్‌గా మలుచుకోవచ్చు. వీటిలో స్టోరేజ్‌ అరలు కూడా ఉంటున్నాయి. సోఫాలు గోడకు పెట్టడం వల్ల హాల్‌ విశాలంగా కనిపిస్తుంది.
• ప్రస్తుతం నిర్మిస్తున్న ఇళ్లలో బెడ్‌రూమ్స్‌ చిన్నగా ఉంటున్నాయి. కొద్దిపాటి స్థలాన్ని కూడా బెడ్‌ ఆక్రమించేస్తుంది. దాంతో వేరే వస్తువులు పెట్టుకోవాలంటే స్పేస్‌ ఉండదు. బెడ్‌షీట్స్‌, ఆల్బమ్స్‌, పుస్తకాలు తదితర వస్తువులను పెట్టుకునేలా స్టోరేజ్‌ అరలు ఉన్న బెడ్‌ తీసుకోవాలి. ఈ వస్తువులన్నీ బెడ్‌ కింద సర్దుకుంటే రూమ్‌ ఖాళీగా కనిపిస్తుంది.
• ఇంటి డెకరేషన్‌ లేదా స్టోరేజ్‌ స్పేస్‌ కోసం ప్లాన్‌ చేసే సమయంలో చాలా మంది గోడల గురించి అస్సలు పట్టించుకోరు. షెల్ఫ్‌లు చేయించుకోవడానికి ఎక్కువ ఆసక్తి చూపిస్తారు. అలాకాకుండా గోడలకు చెక్కతో చేసిన క్యూబ్స్‌ ఏర్పాటు చేసుకోవడం బెస్ట్‌ ఆప్షన్‌. దీంతో గోడలు ఉన్న స్థలం కూడా సద్వినియోగం చేసుకున్నట్టే.
• ప్రతి గదిలో గోడల వెంబడి అల్మారాలు చేయించుకుంటారు. వాటివల్ల గది చిన్నదిగా అనిపిస్తుంది. గది మూలల్లో నిలువుగా అల్మారాలు చేయించుకుంటే ఎక్కువ వస్తువులు స్టోర్‌ చేసుకోవచ్చు. దీంతో గది కూడా విశాలంగా ఉన్నట్టు అనిపిస్తుంది.