రోబోతో జట్టు కట్టి సరళతరమైన సర్జరీ

వంద మందుగోళీలకు కొరుకుడుపడని రోగం.. ఒక్క శస్త్రచికిత్సకు లొంగుతుంది. ఆ ఆపరేషన్‌ హస్తవాసి గల వైద్యుడు చేస్తే.. ఏ పరేషానూ ఉండదు. అన్ని రంగాల్లోనూ సాంకేతికత కొత్తపుంతలు తొక్కుతున్న ఈ రోజుల్లో రోబోటిక్‌ సర్జరీలు వైద్య విధానంలో విప్లవాత్మకమైన మార్పులకు శ్రీకారం చుట్టాయి.

వంద మందుగోళీలకు కొరుకుడుపడని రోగం.. ఒక్క శస్త్రచికిత్సకు లొంగుతుంది. ఆ ఆపరేషన్‌ హస్తవాసి గల వైద్యుడు చేస్తే.. ఏ పరేషానూ ఉండదు. అన్ని రంగాల్లోనూ సాంకేతికత కొత్తపుంతలు తొక్కుతున్న ఈ రోజుల్లో రోబోటిక్‌ సర్జరీలు వైద్య విధానంలో విప్లవాత్మకమైన మార్పులకు శ్రీకారం చుట్టాయి. అయితే ఈ రోబోటిక్‌ సర్జరీలు ఏయే చికిత్సల్లో చేస్తారు? దీనివల్ల రోగులకు, వైద్యులకు కలిగే లాభాలేంటి? ఓపెన్‌ సర్జరీలు, ల్యాపరోస్కోపిక్‌ పద్ధతిన చేసే సర్జరీలకు రోబోటిక్‌ పద్ధతిలో జరిపే సర్జరీలకు గల తేడా ఏంటి? తదితర అంశాలను నేటి ఊపిరిలో తెలుసుకుందాం.

సాధారణంగా ఏదైన జబ్బు చేసినప్పుడు మొదట ఔషధాలతో చికిత్స అందిస్తారు. కొన్ని రకాల రుగ్మతలకు అంటే క్యాన్సర్‌ లాంటి వ్యాధులకు, శరీరం లోపల ఏర్పడిన గడ్డలు లేదా కణితులకు, కిడ్నీ, కాలేయం, గుండె తదితర సమస్యలున్న రోగులకు చాలా సందర్భాలలో ఆపరేషన్‌లు చేయాల్సి వస్తుంది. గతంలో ఈ ఆపరేషన్‌ల కోసం రోగి శరీరంపై పెద్ద పరిమాణంలో కోత పెట్టి సర్జరీ చేసేవారు. దీనివల్ల రోగికి తీవ్రమైన నొప్పి కలిగేది. అంతేకాదు శస్త్రచికిత్స సమయంలో అధిక రక్తస్రావం అయ్యేది. అందుకని ఆపరేషన్‌ ఉందంటే ముందుగానే బ్లడ్‌ యూనిట్లు అందుబాటులో ఉంచుకోవాలని రోగి కుటుంబ సభ్యులకు సూచించేవారు వైద్యులు. సర్జరీ తరువాత శరీరంపై కోత పెట్టిన ప్రదేశంలో ఏర్పడే మరక జీవితాంతం ఉండిపోయేది. అంతే కాకుండా రోగి కోలుకునేందుకు రోజులు, వారాల సమయం పట్టేది. రోజుల తరబడి రోగి దవాఖానలో ఉండాల్సి వచ్చేది. ఈ కారణంగా రోగితోపాటు వారి కుటుంబ సభ్యులు కూడా పనులు మానుకుని దవాఖాన చుట్టూ తిరగాల్సి వచ్చేది. ఇలా రకరకాల ఇబ్బందులు ఉండేవి. కాలక్రమంలో వైద్య రంగంతోపాటు శస్త్రచికిత్సా పద్ధతుల్లోనూ విప్లవాత్మకమైన మార్పులు చోటు చేసుకుంటున్నాయి. ఈ క్రమంలోనే పది, పదిహేను సంవత్సరాల క్రితం ల్యాపరోస్కోపీ విధానం అందుబాటులోకి వచ్చింది. దీంతో ఆపరేషన్‌ సమయంలో పెద్ద పెద్ద కోతల నుంచి ఉపశమనం లభించింది. కేవలం శరీరంపై చిన్నపాటి రంధ్రాలు చేసి వాటి ద్వారా వైద్య పరికరాలను పంపించి ఆపరేషన్‌లు చేయడం మొదలైంది. అయితే ఈ విధానం అన్ని రకాల చికిత్సలకు, అన్ని సందర్భాలలో సాధ్యం కాదు. ఇదిలా ఉండగా తాజాగా రోబోటిక్‌ సర్జరీలు అందుబాటులోకి వచ్చాయి.

ఈ రోబోటిక్‌ అనేది శస్త్రచికిత్సల్లోనే విప్లవాత్మక మార్పులు తీసుకువచ్చింది. పాతకాలం నాటి ఓపెన్‌ సర్జరీల వల్ల రోగం నయమైనప్పటికీ సర్జరీ వల్ల చేసిన గాయం మానడానికి సమయం పట్టేది. ఇందులో నొప్పి కూడా ఎక్కువగానే ఉంటుంది. ఓపెన్‌ సర్జరీలో ఆపరేషన్‌ తరువాత కుట్లు వేస్తారు. ఆ కుట్లు ఆరడానికి కొంత సమయం పట్టేది. కొంతమందిలో కుట్లు వేసిన ప్రదేశంలో చీము పట్టడం, ఇన్‌ఫెక్షన్లు రావడం వంటి సమస్యలు తలెత్తేవి. అంతేకాకుండా రోగి కట్లు విప్పడానికి మరోసారి దవాఖానకు రావల్సి వచ్చేది. ఈ విధంగా ఓపెన్‌ సర్జరీల్లో రోగి కోలుకునేందుకు కొంత సమయం పట్టేది. అదే ల్యాపరోస్కోపిక్‌ పద్ధతిలో అయితే శరీరంపై పెద్ద పరిమాణంలో కోత పెట్టడం తప్పింది. చిన్నపాటి రంధ్రాలు చేసి వాటి ద్వారానే రోగికి సర్జరీ చేస్తారు. దీని వల్ల రక్తస్రావం సమస్య ఉండదు. ముఖ్యంగా రోగి త్వరగా కోలుకోవడమే కాకుండా నొప్పి కూడా పెద్దగా ఉండదు.

అన్ని కోణాల్లో అసాధ్యం..

ల్యాపరోస్కోపీ పద్ధతిలో సర్జరీలను చేతితో చేసినంత సులభంగా చేయలేం. చేతివేళ్లకు ఉన్న వెసులుబాటు ల్యాపరోస్కోపీ పరికరాలకు ఉండదు. కొన్ని రకాల కోణాల్లో ల్యాపరోస్కోపీ పరికరాలు తిరగవు. ఉదాహరణకు పెల్విక్‌ రీజన్‌ అనేది చాలా ఇరుకుగా ఉంటుంది. ఇందులో ల్యాపరోస్కోపీతో సర్జరీ చేయాలంటే 5నుంచి 6 గంటల సమయం పడుతుంది. అదే కాలేయ మార్పిడి సర్జరీకి దాదాపు 12 గంటల సమయం పడుతుంది. ఈ సర్జరీలు చేసే సమయంలో సర్జన్‌లు గంటల తరబడి నిల్చుని ఆపరేషన్‌లు చేయాల్సి ఉంటుంది.

వైద్యులపై ఒత్తిడి

ల్యాపరోస్కోపీ పద్ధతిలో శస్త్రచికిత్సలు చేసినప్పుడు వైద్యులు గంటల తరబడి నిలబడాల్సి వస్తుంది. దీనివల్ల వైద్యుడి భుజాలు, వెన్ను, మెడపై తీవ్రమైన ఒత్తిడి పడుతుంది. ఫలితంగా జాయింట్‌ పెయిన్‌, భుజాల నొప్పి, కాళ్లల్లో వారికోసిస్‌, సర్వైకల్‌ స్పాండిలోసిస్‌, బ్యాక్‌ పెయిన్‌ వంటి సమస్యలు వైద్యులను పీడిస్తాయి. ఇలాంటి పరిస్థితులను రోబొటిక్‌ పద్ధతుల ద్వారా అధిగమించవచ్చు.

డాక్టర్లకు ఉపశమనం

రోబోటిక్‌ పద్ధతిలో రోబో యంత్రానికి ఆర్మ్స్‌ ఉంటాయి. అది యంత్రం కనుక అలసిపోదు. ఎంతసేపైనా ఏ పొజిషన్‌లో అయినా ఉండగలదు. అదే వైద్యులు గంటల సమయం పాటు ఒకే పొజిషన్‌లో ఉండలేరు. సర్జరీ సమయంలో రోగి శరీరంపై చిన్న చిన్న రంధ్రాలు చేసి రోబో పరికరాలను అమర్చడం జరుగుతుంది. ఆ తరువాత రోబో కంట్రోల్‌ అనేది వైద్యుడి చేతిలో ఉంటుంది. వైద్యుడు కుర్చీలో కూర్చుని సులభంగా రోబోను ఆపరేట్‌ చేస్తూ సర్జరీ నిర్వహిస్తాడు. వైద్యుడు తన చేతితో కంట్రోలర్‌ను ఎలా తిప్పితే రోగి శరీరంలో అమర్చిన రోబో ఆర్మ్స్‌ అలా తిరుగుతాయి. దీనివల్ల వైద్యులు ఎలాంటి శారీరక ఒత్తిడీ లేకుండా సునాయాసంగా శస్త్రచికిత్సను విజయవంతంగా పూర్తిచేయగలుగుతారు.

రోబోటిక్‌ సర్జరీ లాభాలు

• ముఖ్యంగా అధిక సమయం పాటు జరిపే క్లిష్టమైన సర్జరీలలో రోబో ఎంతో ఉపయోగపడుతుంది.
• వైద్యులపై శారీరక ఒత్తిడిని తగ్గించడంలో కీలక పాత్ర పోషిస్తుంది.
• రోబోటిక్‌లో డిగ్రీ ఆఫ్‌ మూవ్‌మెంట్‌ ఎక్కువ. దీనివల్ల చేతి వేళ్లు తిరిగినంత సులభంగా రోబో ఆర్మ్స్‌ని 360 డిగ్రీల్లో తిప్పుతూ సర్జరీని చేయవచ్చు.
• సర్జరీని ఎలాంటి అవరోధాలు లేకుండా కచ్చితత్వంతో చేయవచ్చు.
• ఇతర అవయవాలు లేదా కణాలు దెబ్బతినకుండా వ్యాధినే లక్ష్యంగా చేసుకుని శస్త్రచికిత్స జరుగుతుంది.
• రోబోటిక్‌ పద్ధతిలో రక్తస్రావం చాలావరకు తగ్గుతుంది.
• ఓపెన్‌ సర్జరీ వల్ల శరీరం పైభాగంతో పాటు శరీరం లోపలి భాగంలో కూడా గాయం అవుతుంది. దీనివల్ల రోగి కోలుకునేందుకు సమయం పట్టడం, కుట్ల వద్ద నొప్పి రావడం జరుగుతుంది. కొంత మందిలో హెర్నియా వస్తుంది. రోబోటిక్స్‌ సర్జరీల్లో ఈ సమస్యలు ఉత్పన్నం కావు.
• కొంతమంది వయసు పైబడిన వైద్యుల్లో వణుకు వస్తుంది. అలాంటి సమస్య ఉన్న వైద్యులు సాధారణ పద్ధతుల్లో లేదా ల్యాపరోస్కోపిక్‌ పద్ధతిలో సర్జరీ చేయడం ఇబ్బందికరంగా ఉంటుంది. అదే రోబోతో అయితే వారికి ఎలాంటి సమస్య లేకుండా సునాయసంగా సర్జరీ చేయగలుగుతారు.
• ల్యాపరోస్కోపిక్‌ పద్ధతిలో శరీరంలోని అవయవ భాగాలు స్క్రీన్‌పై టూ డైమెన్షన్‌లోనే కనిపిస్తాయి. అదే రోబో పద్ధతిలో అయితే శరీరంలోని అవయవ భాగాలు త్రీ డైమెన్షన్‌లో కనిపిస్తాయి. అంటే శరీరంలో సర్జరీ చేసే భాగం 3డిలో స్పష్టంగా కనిపిస్తుంది. దీనివల్ల పార్‌లాక్స్‌ ఎర్రర్స్‌ను అధిగమించవచ్చు. అంతేకాకుండా సర్జరీ అనేది అత్యంత మెరుగ్గా జరుగుతుంది.
• కొన్ని సందర్భాలలో ల్యాపరోస్కోపీ ద్వారా జరిపే సర్జరీ ఫలించకపోతే వెంటనే దానిని ఓపెన్‌ సర్జరీగా మార్చాల్సి వస్తుంది. రొబోటిక్‌ పద్ధతిలో ఆ కన్వర్షన్‌ రేట్‌ అంటే సర్జరీ మార్పిడి అవకాశాలు అనేవి తగ్గుతాయి.
• హెర్నియా సర్జరీలో కూడా రోబో అత్యుత్తమ ఫలితాలు ఇస్తుంది. సాధారణంగా హెర్నియా సర్జరీలో కండరాలు బలహీనపడి కుట్లు ఊడిపోకుండా మెష్‌ పెడతారు. ల్యాపరోస్కోపీ పద్ధతిలో అయితే చర్మం కిందగాని లేదా పేగుల పైన అంటే పెరిటోనియం కింద మెష్‌ పెడతారు. దీనివల్ల తీవ్రమైన నొప్పి కలుగుతుంది. అదే రోబో ద్వారా జరిపే ఆపరేషన్‌లో అయితే మెష్‌ను అబ్డోమెన్‌ వాల్‌ పొరల మధ్య పెట్టడం జరుగుతుంది. దీనివల్ల రోగికి నొప్పి అనేది నామమాత్రంగా ఉంటుంది. అంతేకాకుండా హెర్నియా అనేది మళ్లీ పునరావృతం అయ్యే అవకాశాలు తగ్గిపోతాయి.
• సమయం ఆదా అవుతుంది.
• కుట్ల సమస్య ఉండదు. తదనంతర చికాకులూ రావు.
• 5-8 ఎంఎం పరిమాణంలో రంధ్రాలు చేయడం వల్ల రోగి త్వరగా కోలుకుంటాడు.
• దవాఖానలో ఎక్కువ రోజులు ఉండాల్సిన పరిస్థితి రాదు.
• వైద్యుల పర్ఫార్మెన్స్‌ పెరగడం వల్ల రోగికి మంచి ఫలితాలు ఉంటాయి.

ఎప్పుడు చేయొచ్చు?

• కడుపులో ఉండే గడ్డలు, కణితులు, కాలేయంపై ఏర్పడిన క్యాన్సర్లను తొలగించడానికి
• కాలేయంలో ఉండే ట్యూమర్స్‌ను తొలగించేందుకు, ప్యాంక్రియాస్‌ జబ్బులకు
• పెద్ద పేగుకు వచ్చే ట్యూమర్లు, గడ్డలకు
• గైనకాలజికల్‌ శస్త్ర చికిత్సలకు
• కిడ్నీ సర్జరీలకు

…?మహేశ్వర్‌రావు బండారి
డా॥ భరత్‌కుమార్‌
ఎంబీబీఎస్‌, ఎంఎస్‌
ఎంసీహెచ్‌ (ఎస్‌జీఈ),
ఎఫ్‌హెచ్‌పీబీ&ఎల్‌టీ,ఎఫ్‌ఎంబీ
సీనియర్‌ కన్సల్టెంట్‌,
సర్జికల్‌ గ్యాస్ట్రో విభాగాధిపతి, జీఐ అంకాలజి
స్టార్‌ హాస్పిటల్‌, హైదరాబాద్‌