త్వరలో ఈ-పాస్‌పోర్ట్‌లు

• విదేశాంగ శాఖ కార్యదర్శి సంజయ్‌ భట్టాచార్య వెల్లడి
• బయోమెట్రిక్‌ చిప్‌తో ‘ఈ-పాస్‌పోర్ట్‌’ భద్రత భేష్‌

న్యూఢిల్లీ, జనవరి 6: భారతీయులకు త్వరలోనే ఈ-పాస్‌పోర్టులను జారీ చేయనున్నట్టు విదేశాంగ శాఖ కార్యదర్శి సంజయ్‌ భట్టాచార్య వెల్లడించారు. బయోమెట్రిక్‌ సమాచారాన్ని నిక్షిప్తం చేసే ఈ ‘ఈ-పాస్‌పోర్టు’లను అత్యంత భద్రతా ప్రమాణాలతో తయారు చేయనున్నట్టు పేర్కొన్నారు. అంతర్జాతీయ వలస విధానాలకు అనుగుణంగా ఇవి ఉండబోతున్నట్టు వివరించారు.

• విశేషాలు
• వ్యక్తి బయోమెట్రిక్‌ డాటాను నిక్షిప్తం చేసుకోవడానికి ఈ-పాస్‌పోర్టులో ఒక చిప్‌ ఉండనున్నట్టు, అందులోనే వ్యక్తి పూర్తి వివరాలు నమోదు చేయనున్నట్టు సమాచారం.
• రేడియో-ఫ్రీక్వెన్సీ ఐడెంటిఫికేషన్‌ (ఆర్‌ఎఫ్‌ఐడీ) ద్వారా కూడా ఈ-పాస్‌పోర్టు నుంచి సమాచారాన్ని తస్కరించడానికి వీలుపడదు. దొంగతనం చేయడానికి కుదరదు. ఫోర్జరీ కూడా చేయలేం.
• ఇంటర్నేషనల్‌ సివిల్‌ ఏవియేషన్‌ ఆర్గనైజేషన్‌ (ఐసీఏవో) ప్రమాణాలకు అనుగుణంగా ఈ-పాస్‌పోర్టులను తయారు చేయనున్నారు. వీటిని నాశనం చేయడం అంత సులువు కాదు.
• వివిధ దేశాల్లో పాస్‌పోర్టును సులభంగా గుర్తించేందుకు చిప్‌ పక్కన ప్రత్యేక లోగోను వేయనున్నారు.
• 20 వేల మంది దౌత్య అధికారులకు తొలుత ఈ-పాస్‌పోర్టులను ప్రయోగాత్మకంగా జారీ చేస్తారు. సమస్యలు తలెత్తకపోతే, అనంతరం అందరికీ ఇస్తారు.
• దేశంలోని 36 పాస్‌పోర్టు కేంద్రాల్లో ఈ-పాస్‌పోర్టులను జారీ చేయనున్నారు.
• ప్రస్తుతం పాస్‌పోర్టు దరఖాస్తు కోసం ఎలాంటి విధానాలను పాటిస్తున్నారో.. అవే నిబంధనలు ఈ-పాస్‌పోర్టుకూ వర్తిస్తాయి. పాస్‌పోర్టు జారీ సమయంలో కూడా తేడా ఉండదు.