అన్నీ బాగుంటే వృద్ధి జోరు

• 2021-22 ఆర్థిక సర్వే
• వచ్చే ఆర్థిక సంవత్సరానికి వృద్ధి అంచనా 8-8.5 శాతం
• ప్రస్తుత ఆర్థిక సంవత్సరంలో వృద్ధి రేటు 9.2 శాతం
• చమురు ధరల అదుపు, సాధారణ రుతుపవనాలతో పాటు మరిన్ని కొవిడ్‌ వేవ్‌లు రాకపోతే వృద్ధి బావుంటుంది
• వ్యవస్థకు మద్దతునిచ్చే ఆర్థిక సత్తా కేంద్ర ప్రభుత్వానికి ఉంది

న్యూఢిల్లీ, జనవరి 31: ఒకవైపు ద్రవ్యోల్బణం కోరలు చాస్తుంటే మరోవైపు ప్రపంచంలో వేగంగా వృద్ధిచెందుతున్న ఆర్థిక వ్యవస్థగా భారత్‌ తన స్థానాన్ని నిలుపుకుంటుందని బడ్జెట్‌ ముందస్తు ఆర్థిక సర్వే వెల్లడించింది. అయితే పలు సానుకూల అంశాలు తొడైతేనే ఇది సాధ్యమని పేర్కొంది. ఏప్రిల్‌ 1 నుంచి మొదలయ్యే 2022-23 ఆర్థిక సంవత్సరంలో స్థూల దేశీయోత్పత్తి (జీడీపీ) 8-8.5 శాతం వృద్ధిచెందుతుందని సర్వే అంచనా వేస్తూ భవిష్యత్తు సవాళ్లను ఎదుర్కొనేందుకు ఆర్థిక వ్యవస్థ సంసిద్ధమై ఉందని తెలిపింది. అలాగే అవసరమైతే ఆర్థిక వ్యవస్థకు మద్దతును ఇచ్చే ఆర్థిక సత్తా ప్రభుత్వానికి ఉందని నొక్కిచెప్పింది. ప్రస్తుత 2021-22 ఆర్థిక సంవత్సరంలో 9.2 శాతం వృద్ధి సాధించి, ప్రపంచంలో వేగవంతమైన ఆర్థిక వ్యవస్థగా స్థానం సంపాదించుకుంటుందని ఆర్థిక సర్వే ప్రకటించింది. వాక్సిన్‌ కవరేజ్‌ విస్త్రతంగా జరగడం, సరఫరా వైపు సంస్కరణలు చేపట్టడం, నియంత్రణల్ని సడలించడం వంటి అంశాలతో వృద్ధి జోరు కొనసాగుతుందన్న ధీమాను వ్యక్తం చేసింది. దేశ ఆర్థిక వ్యవస్థ వార్షిక నివేదిక అయిన ఈ సర్వేను సోమవారం కేంద్ర ఆర్థిక మంత్రి నిర్మలా సీతారామన్‌ పార్లమెంటులో ప్రవేశపెట్టారు. కేంద్ర ముఖ్య ఆర్థిక సలహాదారు సంజీవ్‌ సన్యాల్‌ నేతృత్వంలో ఈ సర్వే రూపొందింది. తాజా సర్వే నేపథ్యంలో మంగళవారం బడ్జెట్‌ ప్రతిపాదనల్ని ఆర్థిక మంత్రి సమర్పించనున్నారు.

2021- 2022 ఆర్థిక సర్వే ప్రధానాంశాలివి

• బ్యారల్‌ ముడి చమురు సగటు ధర ప్రపంచ మార్కెట్లో 70-75 డాలర్ల శ్రేణిలో కదులుతుందని సర్వే అంచనా వేసింది. ప్రస్తుతం ఇది 90 డాలర్ల సమీపంలో ట్రేడవుతున్నది.
• రుతుపవనాల ఆధారిత వర్షపాతం సాధారణస్థాయిలో ఉంటుందన్నది సర్వే అంచనా. ప్రపంచ ప్రధాన కేంద్ర బ్యాంక్‌లు లిక్విడిటీని క్రమానుగతంగా ఉపసంహరిస్తాయని సర్వే భావించింది.
• మరింతగా కొవిడ్‌ సంబంధిత ఆర్థిక అడ్డంకులు ఏర్పడవని అంచనా వేసింది.
• పై మూడు సానుకూల అంచనాల ఆధారంగా ఆర్థిక వ్యవస్థ 8-8.85 శాతం వృద్ధిచెందుతుందని భావిస్తున్నట్లు ఆర్థిక సర్వే వివరించింది.
• ఇక 2021-22 ఆర్థిక సంవత్సరానికి వెల్లడించిన 9.2 శాతం వృద్ధి అంచనా, ఇటీవల గణాంకాల శాఖ ఇటీవల వెల్లడించిన అడ్వాన్స్‌ అంచనాలకు అనుగుణంగానే ఉన్నది.
• వచ్చే ఆర్థిక సంవత్సరంలో మూలధన వ్యయాన్ని పెంచే ద్రవ్య లభ్యత ప్రభుత్వం వద్ద ఉంది.
• గత ఆర్థిక సంవత్సరంలో ద్రవ్యలోటు, ప్రభుత్వ రుణాలు పెరిగిన నేపథ్యంలో 2021-22లో ప్రభుత్వ ఆర్థికం స్థిరపడుతున్నది.
• అంతర్జాతీయంగా పెరుగుతున్న ఇంధన ధరలు, ద్రవ్యోల్బణం పెరుగుదల పట్ల జాగ్రత్తగా ఉండాల్సిన అవసరం ఉంది.
• పన్నుల వసూళ్లు అధికంగా ఉన్నందున, 2021-22 సంవత్సరానికి నిర్దేశించుకున్న 6.8 శాతం ద్రవ్యలోటు లక్ష్యాన్ని సాధిస్తూనే మూలధన వ్యయాన్ని ప్రభుత్వం పెంచగలదు.
• 2021-22లో జీడీపీలో ప్రభుత్వ రుణాల నిష్పత్తి 90 శాతానికి చేరుతున్నందున, ఈ నిష్పత్తిని క్రమేపీ తగ్గించే అంశంపై ఆర్థిక సర్వే ఆందోళన వ్యక్తం చేసింది. వడ్డీ చెల్లింపులు అధికంకావడం..మూలధన వ్యయాల పెంపునకు అవరోధం ఉందన్న అభిప్రాయాన్ని వెల్లడించింది.
• కొవిడ్‌ సంక్షోభంలోనూ వ్యవసాయ రంగం చెక్కు చెదరలేదు. 2020-21లో 3.6 శాతం వృద్ధి సాధించిన ఈ రంగం 2021-22లో 3.9 శాతం పెరుగుతుందని అంచనా.
• పారిశ్రామిక రంగం వృద్ధి 8.2 శాతం (2020-21) నుంచి ప్రస్తుత ఆర్థిక సంవత్సరంలో 11.8 శాతం వృద్ధి చెందుతుందని అంచనా.
• సామాజిక సేవలపై వ్యయాలు 9.8 శాతం పెరుగుదలతో రూ.71.61 లక్షల కోట్లకు చేరుతాయని అంచనా.
• ఎగుమతులు 16.5 శాతం, దిగుమతులు 29.4 శాతం పెరుగుతాయని, వినియోగం 7 శాతం అధికం అవుతుందని సర్వే అంచనా వేసింది.

కొవిడ్‌ మేఘాలు తొలగితే పెట్టుబడులు పెరుగుతాయ్‌

దేశంలో చేపట్టిన వ్యాక్సినేషన్‌తో కొవిడ్‌ పాండమిక్‌ తొలగిపోతే, పెట్టుబడులు పెరుగుతాయి. దీంతో ఉపాధి కల్పన జరుగుతుంది. వినియోగమనేది ఆదాయ వృద్ధి తగ్గడంవల్లే ప్రభావితం కాదు. కరోనా అనిశ్చితి, ఆరోగ్య సమస్యలూ కారణమే. ప్రభుత్వం తీసుకున్న వివిధ చర్యలతో ప్రైవేట్‌ పెట్టుబడులు పెరుగుతాయని, తద్వారా ఆదాయ వృద్ధి, ఉపాధి కల్పన జరుగుతుందని విశ్వసిస్తున్నాం. –అనంత్‌ నాగేశ్వరన్‌, కేంద్ర ప్రభుత్వ ప్రధాన ఆర్థిక సలహాదారు

2020-21లో మైనస్‌ 6.6 శాతం వృద్ధి
గడిచిన ఆర్థిక సంవత్సరానికిగాను దేశ వృద్ధిరేటు మైనస్‌ 6.6 శాతం మాత్రమేనని కేంద్ర గణాంకాల శాఖ సోమవారం తాజాగా వెల్లడించింది. గతంలో మైనస్‌ 7.3 శాతంగా ఉన్నదని అంచనావేసిన గణాంకాల శాఖ..కరోనాతో దేశవ్యాప్త లాక్‌డౌన్‌తో వృద్ధిరేటుపై ప్రభావం పడిందని తెలిపింది. 2011-12 ధరల ప్రకారం 2020-21లో దేశ జీడీపీ విలువ రూ.135.58 లక్షల కోట్లు కాగా, అంతక్రితం ఏడాది 2019-20లో రూ.145.16 లక్షల కోట్లుగా ఉన్నదని పేర్కొంది. అలాగే 2019-20 ఆర్థిక సంవత్సరానికిగాను వృద్ధిని 4 శాతం నుంచి 3.7 శాతానికి కుదించింది.

దేశ ఆర్థిక వ్యవస్థ ముఖచిత్రానికి అద్దం పట్టే ఆర్థిక సర్వే క్రిందటిసారితో పోల్చితే ఈసారి సగానికిపైగా పేజీలను తగ్గించుకున్నది. 1950-51 నుంచి ఆర్థిక సర్వే మొదలవగా, ఆరంభంలో 50 పేజీల కంటే తక్కువగానే ఉండేది. అయితే రికార్డు స్థాయిలో 2020-21కిగాను 877 పేజీలకు పెరిగింది. తాజాగా వచ్చిన 2021-22 సర్వే మాత్రం 413 పేజీలుగా ఉన్నది.