Srisailam | భూమండలానికి నాభి స్థానంగా పరిగణించే శ్రీశైల మహా క్షేత్రంలో సోమవారం నుండి దసరా శరన్నవరాత్రుల వేడుకలు శాస్త్రోకంగా ప్రారంభం కానున్నాయి. శరన్నవరాత్రుల వేడుకల నేపథ్యంలో శ్రీశైల ఆలయ ప్రాకారాలన్నీ విద్యుత్ దీప కాంతులతో దేదీప్యమానంగా వెలిగిపోతున్నాయి.
ఆలయ కార్యనిర్వాహణాధికారి లవన్న అర్చక వేదపండితులతో కలిసి సోమవారం ఉదయం పసుపు కుంకుమ, పూలు పండ్లతో ప్రధాన గోపురం నుండి ఆలయ ప్రవేశం చేస్తారు.అటుపై గణపతి పూజ, స్వస్తి పుణ్యాహవాచనం, దీక్ష సంకల్పం, కంకణ పూజ, ఋత్వికగ్వరణం, అమ్మవారి యాగశాల ప్రవేశం, అఖండదీపస్థాపన, మండపారాధన తదితర పూజలు నిర్వహిస్తారని దేవస్థానం అధికారులు తెలిపారు.
స్వామివారి ఆలయ యాగశాల ప్రవేశం, శివసంకల్పం, గణపతి పూజ, చండీశ్వర పూజ,వాస్తు పూజ, రుద్రకలశ స్థాపన, స్వామివారికి మహన్యాసపూర్వక రుధ్రాభిషేకం జరగనున్నాయి.
మధ్యాహ్న కాలార్చన, సహస్ర నామార్చన, మహా నివేదన అనంతరం సాయంకాలం జపానుష్టానాలు, అంకురార్పణ, అగ్నిప్రతిష్టాపన, నవవార్చన, కుంకుమార్చన, రుద్రహోమం, చండీహోమం జరుగుతాయని ఆలయ స్థానాచార్యులు పూర్ణానంద ఆరాధ్యులు తెలిపారు.
సాయంత్రం అలంకార మండపంలో ఉత్సవమూర్తులకు ప్రత్యేక అలంకార పూజలు జరిపించి గ్రామోత్సవనంతరం రాత్రి సువాసినీ పూజ, కాళరాత్రిపూజలతో తొలిరోజు నవరాత్రి మహోత్సవం జరుగుతుందని ఈవో లవన్న తెలిపారు.
సోమవారం శ్రీ భ్రమరాంబ మల్లికార్జున స్వామిఅమ్మవార్లు భృంగి వాహనంపై గ్రామోత్సవంలో విహరించనున్నారు. శైలపుత్రిగా దర్శనమిచ్చే భ్రామరి అమ్మవారిని చూసేందుకు గ్రామోత్సవంలో భక్తులు అధిక సంఖ్యలో పాల్గొంటారని ఆలయ అధికారులు భావిస్తున్నారు.
తేదీ ———— అమ్మవారి అలంకరణలు —- వాహనసేవలు
26-09-2022 — శైలపుత్రి ———————- భృంగివాహనం
27-09-2022 — బ్రహ్మచారిణి —————– మయూరవాహనం
28-09-2022 — చంద్రఘంట —————- రావణవాహనం
29-09-2022 — కూష్మాండదుర్గ ————— కైలాస వాహనం
30-09-2022 — స్కందమాత —————— శేష వాహనం
01-10-2022 — కాత్యాయని ——————– హంసవాహనం, పుష్పపల్లకిసేవ
02-10-2022 — కాళరాత్రి ———————- గజవాహనం
03-09-2022 — మహాగౌరి ———————- నందివాహనం
04-09-2022 — సిద్దిదాయిని —————— అశ్వవాహనం
05-09-2022 — భ్రమరాంబదేవి ————— నందివాహనం (ఆలయ ఉత్సవం)
(నిజరూపాలంకరణ)