Crime News | పుట్టబోయే బిడ్డకు డీఎన్‌ఏ పరీక్షలు చేయించాలన్న భర్త.. వేధింపులు భరించలేక గృహిణి ఆత్మహత్య

Crime News | పుట్టబోయే బిడ్డకు డీఎన్ఏ పరీక్షలు చేయించాలంటూ భర్త, అత్తమామలు పెట్టిన శారీరక, మానసిక హింసను భరించలేక ఓ గర్భిణి ఆత్మహత్యకు పాల్పడింది. మెదక్ జిల్లాలో ఈ దారుణ ఘటన జరిగింది. భార్య ఆత్మహత్యకు కారణమైన భర్తను పోలీసులు అరెస్ట్ చేశారు. వివరాల్లోకి వెళ్తే.. మెదక్ జిల్లాకు చెందిన శ్రావణికి, ప్రవీణ్‌కు గత ఏడాది వివాహం జరిగింది.

Crime News : పుట్టబోయే బిడ్డకు డీఎన్ఏ పరీక్షలు చేయించాలంటూ భర్త, అత్తమామలు పెట్టిన శారీరక, మానసిక హింసను భరించలేక ఓ గర్భిణి ఆత్మహత్యకు పాల్పడింది. మెదక్ జిల్లాలో ఈ దారుణ ఘటన జరిగింది. భార్య ఆత్మహత్యకు కారణమైన భర్తను పోలీసులు అరెస్ట్ చేశారు. వివరాల్లోకి వెళ్తే.. మెదక్ జిల్లాకు చెందిన శ్రావణికి, ప్రవీణ్‌కు గత ఏడాది వివాహం జరిగింది. పెళ్లయిన కొన్ని నెలలకే శ్రావణి గర్భం దాల్చింది. అయితే ఆమె కడుపులో పెరుగుతున్న బిడ్డ తనది కాదంటూ భర్త ప్రవీణ్ తీవ్రంగా అనుమానించడం ప్రారంభించాడు.

పుట్టబోయే బిడ్డ తనదేనని నిరూపించడానికి డీఎన్ఏ పరీక్షలు చేయించుకోవాలంటూ శ్రావణిని నిరంతరం వేధించేవాడు. ఈ వేధింపులకు అతడి తల్లిదండ్రులు (అత్తమామలు) కూడా తోడయ్యారు. అనుమానంతో రోజురోజుకూ పెరుగుతున్న భర్త వేధింపులను తట్టుకోలేక, తీవ్ర మనస్తాపానికి గురైన శ్రావణి తన నివాసంలో ఆత్మహత్య చేసుకుని బలవన్మరణానికి పాల్పడింది. సమాచారం అందుకున్న పోలీసులు ఘటన స్థలానికి చేరుకుని మృతదేహాన్ని స్వాధీనం చేసుకున్నారు. కుమార్తె మృతిపై శ్రావణి తండ్రి పోలీసులకు ఫిర్యాదు చేశారు. ప్రవీణ్, అతని తల్లిదండ్రులు కలిసి తన కుమార్తెను పుట్టబోయే బిడ్డ విషయంలో తీవ్రంగా అవమానించారని, డీఎన్ఏ పరీక్షల పేరుతో మానసికంగా వేధించి చంపేశారని ఆయన తన ఫిర్యాదులో పేర్కొన్నారు.

బాధితురాలి తండ్రి ఫిర్యాదు మేరకు గృహ హింస, ఆత్మహత్యకు ప్రేరేపించడం వంటి పలు సెక్షన్ల కింద పోలీసులు కేసు నమోదు చేశారు. ఈ కేసులో ప్రధాన నిందితుడైన భర్త ప్రవీణ్‌ను అరెస్ట్ చేసి రిమాండ్‌కు తరలించగా.. పరారీలో ఉన్న మిగతా నిందితుల కోసం గాలింపు చర్యలు చేపట్టినట్లు పోలీసులు వెల్లడించారు.