దద్దరిల్లిన ధర్నాచౌక్‌..!

• ఉద్యమ రోజులను తలపించేలా నిరసన
• గ్రేటర్‌ వేదికగా మరోసారి ‘వరి’ పోరుకు కదం తొక్కిన గులాబీ దండు, కర్షకులు
• కొనే దాకా కొట్లాడుదామంటూ ‘ఢిల్లీ’కి సెగ

సిటీబ్యూరో, నవంబర్‌ 18 (నమస్తే తెలంగాణ ): రైతన్నకు దన్నుగా టీఆర్‌ఎస్‌ చేపట్టిన ‘వరి’ పోరు విజయమైంది. కేంద్ర ప్రభుత్వం ధాన్యం కొనుగోలు చేయాలని డిమాండ్‌ చేస్తూ సీఎం కేసీఆర్‌ పిలుపు మేరకు గులాబీ దండు కదం తొక్కగా.. రాష్ట్ర నలుమూలల నుంచి కర్షకులు, గులాబీ సేన నగరంలోని ఇందిరాపార్కు ధర్నా చౌక్‌కు ఉప్పెనలా తరలివచ్చారు. వడ్లు కొనే దాకా కొట్లాడుడే.. అంటూ కేంద్రంలోని బీజేపీ ప్రభుత్వాన్ని హెచ్చరించారు. పంజాబ్‌లో వడ్లు కొంటున్న కేంద్రం.. తెలంగాణలో ఎందుకు కొనదు..? రాష్ట్ర రైతులపై ఎందుకీ కక్ష.. అంటూ ప్రత్యేక ప్ల కార్డుల ప్రదర్శనలతో ఎండగట్టారు. ఉదయం 11 నుంచి మధ్యాహ్నం 2 గంటల వరకు జరిగిన నిరసనకు కేసీఆర్‌ నేతృత్వం వహించగా మంత్రులు, ఎంపీలు, ఎమ్మెల్సీలు, ఎమ్మెల్యేలు, రైతుబంధు సమితి బాధ్యులు, జడ్పీ చైర్మన్లు, మేయర్లు, మున్సిపల్‌ చైర్మన్లు, డీసీసీబీ, డీసీఎంఎస్‌ చైర్మన్లు, కర్షకులు ముక్త కంఠంతో కేంద్రం దిగిరావాలంటూ దద్దరిల్లేలా నినాదాలు చేశారు. ఢిల్లీకి సెగ తగిలేలా నిరసన తెలిపారు.

దారులన్నీ ధర్నా చౌక్‌ వైపే..
గ్రేటర్‌ వేదికగా కేంద్రానికి వడ్ల సెగ తాకింది. వరి ధాన్యం కొనుగోళ్ల విషయంలో కేంద్రం అనుసరిస్తున్న మొండి వైఖరికి నిరసనగా టీఆర్‌ఎస్‌ పార్టీ అధినేత, ముఖ్యమంత్రి కేసీఆర్‌ ఇచ్చిన పిలుపుతో పార్టీ శ్రేణులు, ప్రజాప్రతినిధులు ఇందిరా పార్క్‌కు భారీ ఎత్తున తరలివచ్చారు. దారులన్నీ ధర్నా చౌక్‌ వైపే సాగాయి. బైక్‌ ర్యాలీలు, పాదయాత్రలతో తరలిరావడంతో ధర్నా చౌక్‌ పరిసరాలు జనసంద్రోహంగా మారాయి. ఇందిరాపార్కు నలువైపులా ఇసుకవేస్తే రాలనంత జనం తరలివచ్చారు. దీంతో ఆ ప్రాంతం టీఆర్‌ఎస్‌ కార్యకర్తలు, అభిమానులతో కిక్కిరిసిపోయింది. మొత్తంగా చాన్నాళ్ల తర్వాత ధర్నా చౌక్‌ ఉద్యమ రోజులను తలపించడం గమనార్హం.

రైతు ధర్నా హైలెట్స్‌

• ఉదయం 11 గంటలకు సీఎం కేసీఆర్‌, ఎంపీ కె.కేశవరావు సభా వేదికపైకి వచ్చారు. ముఖ్యమంత్రి కేసీఆర్‌కు మహిళా ప్రతినిధులు పద్మా దేవేందర్‌రెడ్డి, గొంగిడి సునీత, గద్వాల్‌ విజయలక్ష్మి, సత్యవతి రాథోడ్‌ తిలకందిద్ది మంగళ హారతులు పట్టారు.
• రైతు ధర్నాకు సత్తుపల్లి ఎమ్మెల్యే సండ్ర వెంకటవీరయ్య వరిధాన్యం గొలుసుల అలంకరణతో రైతు నాగలితో సభావేదికపై ప్రత్యేక ఆకర్షణగా నిలిచాడు.
• వేదికపై సీఎం కేసీఆర్‌తో పాటు మంత్రులు, ఎంపీలు, ఎమ్మెల్సీలు ఆకుపచ్చ కండువాలు ధరించి ఆకట్టుకున్నారు.
• కళాకారులు రైతుబంధుపై పాడిన పాటకు రాష్ట్ర ఐటీ, పురపాలక శాఖ మంత్రి కె.తారకరామారావుతో పాటు పార్టీ నాయకులు, మహిళా నాయకులు కరతాళధ్వనులు చేశారు.
• వేదికపై ఉంచిన వడ్ల రాసుల కుప్పలు సభికులను ఆకట్టుకున్నాయి.
• మంత్రి కేటీఆర్‌ సభ ప్రారంభం నుంచి పూర్తి అయ్యేంత వరకు వేదికపైకి వెళ్లకుండా సామాన్య కార్యకర్తలతో కూర్చోవడం పట్ల మహిళలు, నాయకులు, కార్యకర్తలు హర్షం వ్యక్తం చేశారు.
• గాయకుడు సాయిచంద్‌ ఎద్దేడిసిన ఎవుసం.. రైతు గోస సమాజానికి హితంకాదంటూ పాడిన పాట గులాబీ శ్రేణుల్లో జోష్‌ నింపింది.
• మానకొండూర్‌ ఎమ్మెల్యే, గాయకుడు రసమయి బాలకిషన్‌ పాడిన వానమ్మ వానమ్మ ఒక్కసారన్న వచ్చిపోయే.. పుడితే ఒక్కటి చస్తే రెండు రాజన్న రాజన్న.. అంటూ పాడిన పాటలు గులాబీ శ్రేణుల్లో జోష్‌ నింపింది.
• ఎమ్మెల్సీలు కల్వకుంట్ల కవిత, వాణిదేవి, మంత్రులు సబితా ఇంద్రారెడ్డి, సత్యవతి ర్యాథోడ్‌, ఇతర మహిళా ప్రజాప్రతినిధులు తెలంగాణ రైతుల పట్ల వివక్షతను ప్రశ్నిస్తూ ప్లకార్డులు ప్రదర్శించారు.
• సభా ప్రాంగణంలో ప్రజలు ఇబ్బందులు పడకుండా భారీ స్క్రీన్లు ఏర్పాటు చేశారు. దీంతో ఎక్కడికక్కడే వీఐపీల ప్రసంగాలను వీక్షించారు.
• టీఆర్‌ఎస్‌ సభా ప్రాంగణ ప్రాంతంలో గులాబీ జెండాలు, ప్లెక్సీలు, కటౌట్లు ఏర్పాటు చేయడంతో ఇందిరాపార్కు అంతా గులాబీ మయమైంది.
• సీఎం కేసీఆర్‌ సరిగ్గా 1.33 గంటలకు తన ప్రసంగం ప్రారంభించి.. 2 గంటలకు ముగించారు. ధర్నాకు హాజరైన పార్టీ శ్రేణులు, ఎమ్మెల్యే, ఎంపీ, ఎమ్మెల్సీలు, రైతులకు ధన్యవాదాలు తెలిపి తన ప్రసంగాన్ని ముగించారు.
• ఓ అభిమాని తన శరీరమంతా గులాబీ రంగు పూసుకున్నాడు దేశ రైతాంగానికి కేసీఆర్‌ దిక్సూచి.. అని రాసుకొని అందరినీ ఆకర్శించాడు.
• ఆకుపచ్చని తలపాగా చుట్టి జై కేసీఆర్‌, జై జెవాన్‌, జై కేటీర్‌ అనే నినాదాలు రాసుకొని ధర్నా ప్రాంగణంలోకి రావడంతో అందరూ కన్నార్పకుండా తిలకించారు.
• మంత్రులు సైతం ప్లకార్డులు ప్రదర్శించి అందరికీ పలు సూచనలు చేశారు.
• గోషామహల్‌కు చెందిన టీఆర్‌ఎస్‌ సీనియర్‌ కార్యకర్త సరస్వతి నెత్తిన వరి మెదతో సభాప్రాంగణానికి రావడంతో రైతులందరినీ ఆలోచింపజేసింది.