e-Paper

Advertisement

E-Paper

Apps

Book Your Copy

Visit Telangana Today

Thursday, January 20, 2022
Home News అగ్రగామి తెలంగాణ

అగ్రగామి తెలంగాణ

  • రాష్ట్ర ప్రగతిని కీర్తించిన ఇండియా టుడే
  • కరోనా విపత్తులోనూ పాజిటివ్‌ వృద్ధి
  • వ్యవసాయరంగంలో అనూహ్య ప్రగతి
  • రాష్ట్ర ఆర్థికవృద్ధికి అదే ప్రధాన చోదకం
  • 12 అభివృద్ధి సూచికల ఆధారంగా సర్వే
  • హర్షం వ్యక్తం చేసిన మంత్రి కేటీఆర్‌

తలసరి ఆదాయంలో నంబర్‌ 1
ఆర్థిక వృద్ధిలో నంబర్‌ 1
పెట్టుబడుల ఆకర్షణలో నంబర్‌ 2
వ్యవసాయరంగ వృద్ధిలో నంబర్‌ 2
పెద్ద రాష్ర్టాల్లో నంబర్‌ 4
రోడ్లు, మౌలిక సదుపాయాల్లో నంబర్‌ 4
విద్యారంగంలో నంబర్‌ 5
గ్రామీణ మహిళా ఆర్థిక సాధికారతలో నంబర్‌ 5
దేశ జీడీపీలో రాష్ట్రం వాటా 5%
కరోనా వేళ సైతం వృద్ధిరేటు 2.4%
వ్యవసాయ రంగంలో వృద్ధి 18.5%

ఇవి కేవలం అంకెలు కావు! అనేక కొలమానాల్లో తెలంగాణ సాధించిన నిరుపమాన అభివృద్ధికి సాక్ష్యాలు!
మొన్నటిదాకా అట్టడుగు స్థానాల్లో పడి ఉన్న తెలంగాణ.. నేడు ఏటికి ఎదురీదుతూ.. ప్రగతిబాటలో ఉవ్వెత్తున ఎగిసిన తీరుకు నిదర్శనాలు! దార్శనికుడి పాలనలో.. కొత్త రాష్ట్రం సాధించిన పురోగతికి నిలువుటద్దాలు!
ఇవి ఇండియా టుడే పత్రిక..
వివిధ రాష్ర్టాల పరిస్థితులను విశ్లేషించి బయటపెట్టిన వాస్తవాలు!!

రాష్ర్టాన్ని చూసి గర్విస్తున్నా: కేటీఆర్‌

- Advertisement -

తెలంగాణ ఆర్థిక ప్రగతికి ఇండియా టుడే సర్వే మరోసారి పట్టం కట్టడంపై మంత్రి కేటీఆర్‌ హర్షం వ్యక్తం చేశారు. రాష్ర్టాన్ని చూసి గర్విస్తున్నానని తెలిపారు.
‘తెలంగాణను, రాష్ట్ర ఆర్థిక ప్రగతిని చూసి గర్విస్తున్నా. ముఖ్యమంత్రి కే చంద్రశేఖర్‌రావు సారథ్యం వల్లే ఇది సాధ్యమైంది. హ్యాట్సాఫ్‌’ అని మంత్రి కేటీఆర్‌ శనివారం ట్వీట్‌ చేశారు. ఇండియా టుడే మ్యాగజైన్‌ లింక్‌ను షేర్‌ చేశారు.

హైదరాబాద్‌, నవంబర్‌ 27 (నమస్తే తెలంగాణ): ఆర్థిక ప్రగతిలో తెలంగాణ జోరుగా ముందుకు సాగుతున్నట్టు మరోసారి రుజువైంది. జాతీయ పత్రిక ‘ఇండియా టుడే’ తాజాగా నిర్వహించిన ‘స్టేట్‌ ఆఫ్‌ ద స్టేట్స్‌’ సర్వేలో మన రాష్ట్రం పలు కీలక విభాగాల్లో అగ్రగామిగా నిలిచింది. ముఖ్యంగా పెద్దరాష్ర్టాల్లో ఆర్థిక వృద్ధి పరంగా తెలంగాణ దేశంలోనే మొదటి స్థానంలో నిలిచినట్టు ప్రకటించింది. తలసరి ఆదాయంలోనూ తెలంగాణదే మొదటి స్థానమని ఆ పత్రిక వెల్లడించింది. మోస్ట్‌ ఇంప్రూవింగ్‌ రాష్ర్టాల జాబితాలో సైతం తెలంగాణ అగ్రస్థానంలో ఉన్నది. ప్రత్యేక రాష్ట్రంగా ఏర్పడిన అనతికాలంలోనే అద్భుత ప్రగతి సాధించిందని ప్రశంసించింది. కరోనా విపత్తులోనూ పాజిటివ్‌ వృద్ధిరేటును నమోదు చేసిందని కీర్తించింది. రాష్ర్టాలు, కేంద్రపాలిత ప్రాంతాల్లో సర్వే నిర్వహించిన ఈ పత్రిక.. భౌగోళిక విస్తీర్ణాన్ని బట్టి 20 రాష్ర్టాలను ‘పెద్ద రాష్ట్రాలు’గా, 10 రాష్ర్టాలను ‘చిన్న రాష్ర్టాలు’గా విభజించింది. మొత్తం 12 కీలక అభివృద్ధి సూచికల ఆధారంగా వీటికి ర్యాకులు ఇచ్చింది.
కరోనా కాలంలోనూ..
ప్రపంచాన్ని కుదిపేసిన కరోనా విపత్తులోనూ తెలంగాణ పాజిటివ్‌ వృద్ధిరేటును నమోదు చేసిందని, రాష్ట్ర ఆర్థిక పటిష్టతకు ఇదే నిలువెత్తు నిదర్శనమని కొనియాడింది. దేశంలో విస్తీర్ణం పరంగా తెలంగాణ 11వ స్థానంలో, జనాభా పరంగా 12వ స్థానంలో ఉన్నా దేశ ఆర్థిక వ్యవస్థకు వెన్నెముకగా నిలిచిందని వెల్లడించింది. దేశ జీడీపీలో తెలంగాణ వాటా 5 శాతమని, దేశంలోని పెద్ద రాష్ర్టాల్లో తెలంగాణ నాలుగో స్థానంలో ఉన్నదని గుర్తుచేసింది. తమిళనాడు, కర్ణాటక, పశ్చిమబెంగాల్‌ మాత్రమే తెలంగాణ కన్నా ముందున్నాయని తెలిపింది.

ఇండియా టుడే సర్వేలోని ముఖ్యాంశాలు

  • కరోనా విపత్తు వల్ల 2020-21 ఆర్థిక సంవత్సరంలో దేశమంతటా ఆర్థిక వృద్ధి మందగించినా తెలంగాణ మాత్రం పాజిటివ్‌ వృద్ధిని నమోదు చేసినట్టు స్పష్టం చేసింది. 2.4% శాతం వృద్ధిరేటుతో జీఎస్డీపీని రూ.9.80 లక్షల కోట్లకు పెంచుకొన్నట్టు వెల్లడించింది. ఇదే సమయంలో జాతీయ సగటు మైనస్‌ 3 శాతంగా నమోదైనట్టు తెలిపింది.
  • తెలంగాణలో ఆర్థికవృద్ధికి వ్యవసాయ రంగమే ప్రధాన చోదకమని తెలిపింది. ఈ రంగం 18.5% వృద్ధితో దూసుకుపోయిందని, ఇదే సమయంలో జాతీయ సగటు 6.6 శాతమేనని వెల్లడించింది. జాతీయ సగటు కన్నా తెలంగాణలో వృద్ధిరేటు దాదాపు మూడు రెట్లు అధికంగా ఉన్నట్టు పేర్కొన్నది.
  • ఆర్థిక వృద్ధి పరంగా 2018లో ఆరోస్థానంలో ఉన్న తెలంగాణ.. కేవలం మూడేండ్లలోనే అగ్రస్థానానికి చేరుకొన్నట్టు వెల్లడించింది. ఈ క్రమంలో గుజరాత్‌, తమిళనాడు, కర్ణాటక, హర్యానా, ఉత్తరాఖండ్‌ లాంటి రాష్ర్టాలను అధిగమించినట్టు తెలిపింది.
  • తెలంగాణ తలసరి ఆదాయం దేశ సగటు కన్నా రూ.లక్షకుపైనే అధికంగా ఉన్నట్టు వెల్లడించింది. 2019-20లో రూ.2,33,325గా ఉన్న రాష్ట్ర తలసరి ఆదాయం గత ఆర్థిక సంవత్సరం (2020-21)లో మరో రూ.4,307 పెరిగినట్టు తెలిపింది. ఇదే సమయంలో జాతీయ సగటు రూ.5,357 (రూ.1,34,186 నుంచి రూ.1,28,829కి) తగ్గినట్టు స్పష్టం చేసింది.
  • పెట్టుబడుల ఆకర్షణలో తెలంగాణ రెండో స్థానంలో, హర్యానా మొదటి స్థానంలో నిలిచినట్టు ఇండియా టుడే వెల్లడించింది. ఈ జాబితాలో గతేడాది ఆరో స్థానంలో నిలిచిన తెలంగాణ ఈసారి తమిళనాడు, కర్ణాటక, హిమాచల్‌ప్రదేశ్‌, ఉత్తరాఖండ్‌ను అధిగమించి నాలుగు స్థానాలు మెరుగుపర్చుకొన్నట్టు తెలిపింది.
  • విద్యారంగంలో వేగంగా వృద్ధి చెందుతున్న (మోస్ట్‌ ఇంప్రూవింగ్‌) రాష్ర్టాల జాబితాలో తెలంగాణ ఐదో స్థానంలో నిలిచినట్టు వెల్లడించింది. 2018 నాటికి విద్యారంగంలో 18వ స్థానంలో నిలిచిన తెలంగాణ.. గత మూడేండ్లలో ఏకంగా 13 రాష్ర్టాలను అధిగమించినట్టు తెలిపింది.
  • వ్యవసాయ రంగ వృద్ధిలో తెలంగాణ రెండో స్థానం, మధ్యప్రదేశ్‌ మొదటి స్థానంలో నిలిచినట్టు సర్వే వెల్లడించింది. ఈ జాబితాలో 2018 నాటికి 21వ స్థానంలో, 2019లో 17వ స్థానంలో, 2020లో 13వ స్థానంలో ఉన్న తెలంగాణ.. కేవలం ఏడాది వ్యవధిలోనే ఏకంగా 11 రాష్ర్టాలను అధిగమించినట్టు తెలిపింది.
  • మౌలిక సదుపాయాల వృద్ధిలో రాష్ర్టానికి నాలుగో స్థానం దక్కింది. గతేడాది ఎనిమిదో స్థానంలో నిలిచిన తెలంగాణ.. ఈ ఏడాదిలోనే నాలుగు రాష్ర్టాలను అధిగమించింది.
  • గ్రామీణ మహిళల ఆర్థిక సాధికారతలో తెలంగాణ ఐదో స్థానంలో, బీహార్‌ అగ్రస్థానంలో నిలిచాయి. 2018 నాటికి ఈ జాబితాలో 14వ స్థానంలో నిలిచిన తెలంగాణ.. గత మూడేండ్లలోనే ఏకంగా 9 రాష్ర్టాలను దాటేయడం విశేషం.
Advertisement

Most Viewed

-Advertisement-

తాజావార్తలు

Advertisement

ట్రెండింగ్‌

Advertisement