మాడు దురద ఇలా పరార్‌

ఆయుర్వేదం ప్రకారం మాడు దురదకు... మనం తినే ఆహారానికి సంబంధం ఉంటుంది. తినకూడని పదార్థాలు శరీరంలో వాత, పిత్త, కఫాల సమతూకాన్ని దెబ్బతీస్తాయి. దీంతో మాడు దురదగా అనిపిస్తుంది. ఇదేకాకుండా చుండ్రు వల్ల, షాంపూ, తలనూనెలు, పేల కారణంగా కూడా మాడు దురద పుడుతుంది. తలలో ఇన్ఫెక్షన్‌ కూడా ఈ సమస్యకు దారితీస్తుంది.

ఆయుర్వేదం ప్రకారం మాడు దురదకు… మనం తినే ఆహారానికి సంబంధం ఉంటుంది. తినకూడని పదార్థాలు శరీరంలో వాత, పిత్త, కఫాల సమతూకాన్ని దెబ్బతీస్తాయి. దీంతో మాడు దురదగా అనిపిస్తుంది. ఇదేకాకుండా చుండ్రు వల్ల, షాంపూ, తలనూనెలు, పేల కారణంగా కూడా మాడు దురద పుడుతుంది. తలలో ఇన్ఫెక్షన్‌ కూడా ఈ సమస్యకు దారితీస్తుంది. సోరియాసిస్‌, ఫంగల్‌ ఇన్ఫెక్షన్లు, పొక్కులు, అటాపిక్‌ డెర్మటైటిస్‌ అనే చర్మ సమస్య మొదలైన వాటి వల్ల కూడా మాడుపై విపరీతమైన దురదగా అనిపిస్తుంది. ఈ సమస్య లక్షణాలు, దీన్నుంచి విముక్తి పొందడానికి ఆయుర్వేద వైద్యులు కొన్ని పరిష్కార మార్గాలను సూచిస్తున్నారు.

లక్షణాలు

• మాడు పొడిబారడం
• చర్మం ఇరిటేషన్‌కు గురవడం
• చర్మం ఎర్రబారడం (కందిపోవడం)
• ఎరుపుతో కూడిన వాపు
• తలపై తెల్లటి పొలుసులు (వైట్‌ క్రస్ట్‌)
• చీముతో కూడిన కురుపులు

పరిష్కార మార్గాలు

• కొబ్బరినూనె: దురద ఉన్నచోట కొబ్బరినూనె రాసుకోవాలి. దీంతో మాడుకు తగినంత తేమ సమకూరుతుంది. చర్మం పొడిబారే సమస్య దూరమైపోతుంది. దురద కూడా మాయమైపోతుంది.
• పెరుగు: చుండ్రు, ఇతర ఇన్ఫెక్షన్ల కారణంగా దురద నుంచి విముక్తి పొందడానికి పెరుగు కూడా ఉపయోగపడుతుంది. షాంపూ పెట్టుకోవడానికి ముందు మాడును పెరుగుతో మసాజ్‌ చేసుకోవాలి. దీంతో దురద పోవడమే కాకుండా జుట్టు కూడా మెరుస్తూ ఉంటుంది. ఇలా వారంలో నాలుగుసార్లు చేస్తే మంచిది.
• ఉల్లి రసం: మాడు దురదకు ఉల్లి రసం మంచి మందు. దీనికోసం ఉల్లి రసాన్ని దూదిలో ముంచి, మాడుపై బాగా పట్టించాలి. ఓ 20 నిమిషాల పాటు అలా వదిలేయాలి. తర్వాత తలను కడిగేసుకోవాలి.
• వేప ఆకులు: జుట్టు, చర్మ ఇన్ఫెక్షన్ల నివారణలో వేప ఆకుల ఉపయోగం తెలిసిన విషయమే. నీళ్లను బాగా మరిగించి.. అందులో వేప, మందార ఆకులు వేయాలి. తర్వాత ఈ నీళ్లతో తలను కడిగేసుకోవాలి. ఇది కూడా తలకు దురద నుంచి ఉపశమనం ఇస్తుంది. జుట్టును బలంగా చేస్తుంది.
• నువ్వుల నూనె: నువ్వుల నూనెతో మాడుకు మర్దనా చేయడం కూడా దురద, పొడిబారే సమస్యల నుంచి విముక్తి ప్రసాదిస్తుంది. పడుకునే ముందు గోరువెచ్చటి నువ్వుల నూనెను మాడుకు పట్టించుకోవాలి. పొద్దునే షాంపూతో తలస్నానం చేయాలి.