Visit:
కొండాపూర్‌, మే 9 : చందానగర్‌లో భారీ అగ్నిప్రమాదం చోటుచేసుకున్నది. ప్రమాదంలో రెండు షాపింగ్‌ భవనాలు పూ ర్తిగా అగ్నికి ఆహుతవ్వగా, పక్కనే ఉన్న హాస్పిటల్‌ పాక్షికంగా దగ్ధమైంది. అగ్ని ప్ర మాదానికి సంబంధించిన వివరాలు ఇలా ఉన్నాయి.. చందానగర్‌ సర్కిల్‌ – 21 పరిధిలోని చందానగర్‌లో ఉన్న సెంట్రో ఫుట్‌వేర్‌ షాపింగ్‌ భవనం నేమ్‌బోర్డులో శుక్రవారం సాయంత్రం తలెత్తిన షార్ట్‌ సర్క్యూట్‌ కారణంగా మంటలు చెలరేగాయి. క్షణా ల వ్యవధిలోనే మంటలు భవనంలోకి చేరడంతో అప్రమత్తమైన సిబ్బంది.. వెంటనే బయటకు పరుగులు తీశారు. అగ్ని ప్రమాదానికి సంబంధించిన సమాచారాన్ని పోలీస్‌, ఫైర్‌ అధికారులకు అందజేశారు. సెంట్రో లో భారీ మొత్తంలో ఫుట్‌వేర్‌ నిల్వలు ఉండడంతో మంటలు పెద్ద ఎత్తున ఎగిసిపడుతూ, పక్కనే ఉన్న ఆర్కే సిల్క్స్‌ షాపింగ్‌ మాల్‌కు సైతం అంటుకున్నాయి. పెద్ద ఎత్తున మంటలు ఎగిసిపడుతూ సెంట్రో, ఆర్కే సిల్క్స్‌ భవనాలు పూర్తిగా అగ్నికి ఆహుతయ్యాయి. మంటలు అంతకంతకు పెరుగుతుండడంతో సెంట్రో భవనానికి మరో పక్కన ఉన్న ఉంబు ఫర్టిలిటీ దవాఖానకు మంటలు అంటుకున్నాయి. అప్పటికే ఘటనా స్థలానికి చేరుకున్న ఫైర్‌ ఇంజన్లతో మంటలను అదుపు చేస్తుండగా.. దవాఖాన బయట వైపు ఉన్న ఏసీలు, ఇతర సామగ్రి పాక్షికంగా దగ్ధమయ్యాయి. హాస్పిటల్‌ యా జమాన్యం అందులో ఉన్న రోగులను, సి బ్బందిని బయటికి తరలించారు. ఎలాంటి ప్రాణ నష్టం సంభవించలేదు.
చందానగర్‌లోని సెంట్రో భవనంలో అగ్ని ప్రమాదం చోటు చేసుకోవడం రెండవసారి. గతంలో 2016లో సైతం భారీ ఎత్తున అగ్నిప్రమాదం చోటు చేసుకోవడంతో భవనం పూర్తిగా దగ్ధమైంది. భవనం స్లాబ్స్‌ తో పాటు పిల్లర్లు సైతం బలహీన పడినట్లు అధికారులు వెల్లడించినట్లు స్థానికులు పేర్కొంటున్నారు. జీహెచ్‌ఎంసీ, టౌన్‌ ప్లానింగ్‌, ఫైర్‌ అధికారులను మేనేజ్‌ చేసి అదే బిల్డింగ్‌ను పునరుద్ధరించి మరోసారి సెంట్రో ఫుట్‌వేర్‌ షాప్‌నే కొనసాగించడంపై స్థానికులు ఆగ్రహం వ్యక్తం చేస్తున్నారు. అధికారుల సైతం చూసి చూడనట్టుగా వ్యవహరించడంతోనే ఈ ప్రమాదం చోటు చేసుకుందని ఆరోపిస్తున్నారు.
హైవేపై ఉన్న షాపింగ్‌మాల్‌లో సైతం ఫైర్‌ సేఫ్టీ లేకపోవడంతో అధికారులు అవాక్కయ్యారు. నామమాత్రంగానే ఫైర్‌ పైపులను బిగించి ఉంచారని, ప్రమాదం జరుగుతుంటే ఫైర్‌ సేఫ్టీ ఆన్‌ కాకపోవడంపై ప్రశ్నించగా నామమాత్రంగానే ఉన్నాయని బదులిచ్చారు. అగ్ని ప్రమాదం జరిగిన అన్ని భవనాల్లో ఫైర్‌ సేఫ్టీ ఉంటే ఇంత మొత్తంలో నష్టం జరిగి ఉండేది కాదని ఫైర్‌ అధికారులతో పాటు స్థానికులు వాపోతున్నారు.
హైవేపై ఉన్న భారీ భవనంలో పెద్ద ఎత్తున మంటలు వ్యాప్తి చెంది, పక్కనే ఉన్న మరో భవనాలకు సైతం అంటుకుంటున్నా ఫైర్‌ ఇంజన్లు మాత్రం ఆలస్యంగా వచ్చాయి. వచ్చిన వాటిలో సరిపడా నీళ్లు లేకపోవడంతో మంటలను అదుపు చేయడంలో ఇబ్బందులు ఎదురయ్యాయి. జీహెచ్‌ఎంసీ ట్యాంకర్ల ద్వారా మంచినీటిని తెప్పించి ఫైర్‌ ఇంజన్ల ద్వారా మంటలను అదుపు చేసేందుకు ప్రయత్నించారు. ఆలస్యంగా చేరుకున్న బాహుబలి ఫైర్‌ ఇంజన్‌ (బ్రాంటో లిఫ్ట్‌), పదుల సంఖ్యలో ఫైర్‌ ఇంజన్లతో మంటలను అదుపు చేశారు. ప్రమాదంలో భారీ ఎత్తున ఆస్తి నష్టం సంభవించినట్లు ఫైర్‌ అధికారులు పేర్కొన్నారు.
చందానగర్‌ ప్రధాన రహదారిపై చోటుచేసుకున్న అగ్ని ప్రమాదంతో రహదారిపై భారీ ఎత్తున ట్రాఫిక్‌ జామ్‌ ఏర్పడింది. కనీసం ఫైరింజన్లు ఘటనా స్థలానికి చేరుకునే వీలు లేకుండా వాహనాలు కిలోమీటర్‌ మేరా నిలిచిపోయాయి. ప్రజలు సైతం పెద్ద సంఖ్యలో గుమిగూడడంతో పోలీసులు లాఠీచార్జి చేసి అక్కడి నుంచి వెళ్లగొట్టారు.
