Karnataka | క‌ర్నాట‌క ముఖ్య‌మంత్రిని మార్చ‌నున్న అధిష్ఠానం?

క‌ర్నాట‌క ముఖ్య‌మంత్రిని బీజేపీ అధిష్ఠానం మ‌రోసారి మార్చ‌బోతోందా ముఖ్య‌మంత్రిగా ఉన్న బ‌స‌వ రాజ్ బొమ్మై స్థానంలో

క‌ర్నాట‌క ముఖ్య‌మంత్రిని బీజేపీ అధిష్ఠానం మ‌రోసారి మార్చ‌బోతోందా ముఖ్య‌మంత్రిగా ఉన్న బ‌స‌వ రాజ్ బొమ్మై స్థానంలో ఇత‌రుల‌ను కూర్చోబెట్ట‌నుందా ఈ వ్యాఖ్య‌ల‌ను క‌ర్నాట‌క బీజేపీలోని కొంద‌రు నేత‌లు పూర్తిగా స‌మ‌ర్థిస్తున్నారు. ప్ర‌స్తుత ముఖ్య‌మంత్రి బ‌స‌రాజ బొమ్మై మోకాళ్ల నొప్పుల‌తో తీవ్రంగా బాధ‌ప‌డుతున్నార‌ని, చికిత్స నిమిత్త‌మై విదేశాల‌కు వెళ్లనున్నార‌ని బీజేపీలోని కొన్ని వ‌ర్గాలు పేర్కొంటున్నాయి. అయితే అధికారికంగా మాత్రం ఎవ‌రూ, ఎక్క‌డా బ‌య‌ట‌కు వెల్ల‌డించ‌డం లేదు. మ‌రోవైపు త‌న సొంత నియోజ‌క‌వ‌ర్గంలో జ‌రిగిన ఓ స‌భ‌లో ముఖ్య‌మంత్రి బొమ్మై చాలా భావోద్వేగంగా ప్ర‌సంగించారు.

”ఈ సృష్టిలో ఏదీ శాశ్వ‌తం కాదు. ప‌ద‌వి కానీ, హోదా కానీ… ఇవేవీ శాశ్వ‌తం కావు. ఈ జీవిత‌మే శాశ్వ‌తం కాదు. ఎన్నాళ్లు భూమిపై ఉంటామో కూడా ఏ ఒక్క‌రికీ తెలియ‌దు. ప‌ద‌వులు శాశ్వ‌తం కానేకావు. ప్ర‌తి చిన్న విష‌యంలో నేను చాలా బహుప‌రాక్‌తో ఉంటాను. ఈ విష‌యాల‌న్నీ నాకు తెలిసిన‌వే” అంటూ సంచ‌ల‌న వ్యాఖ్య‌లు చేశారు. ఈ వ్యాఖ్య‌ల‌నే కొంద‌రు బీజేపీ నేత‌లు ఉటంకిస్తున్నారు. బ‌స‌వ‌రాజ బొమ్మై స్థానంలో మ‌రో కొత్త వ్య‌క్తి సీఎం బాధ్య‌త‌లు చేప‌ట్టే ఛాన్స్ ఉంద‌ని పేర్కొంటున్నారు. గ‌తంలో తాను అనేక మంత్రి ప‌ద‌వులు నిర్వ‌హించినా, బ‌స‌వ‌రాజ బొమ్మైగానే ప్ర‌జ‌లంద‌రికీ గుర్తుండిపోతాన‌ని పేర్కొన్నారు. ప్ర‌స్తుతం ముఖ్య‌మంత్రి హోదాలో ఇక్క‌డికి వ‌చ్చినా, మీలో ఒక‌డిగానే త‌న‌ను తాను భావించుకుంటాన‌ని, ప‌ద‌వులేవీ శాశ్వ‌తం కావ‌ని ముఖ్య‌మంత్రి బొమ్మై నియోజ‌క‌వ‌ర్గ ప్ర‌జ‌ల‌తో వ్యాఖ్యానించారు.