నోట్ల కట్టలతో కాంగ్రెస్‌ ఎమ్మెల్యే

ఛత్తీస్‌గఢ్‌లో అధికార కాంగ్రెస్‌ ఎమ్మెల్యేల అవినీతి బాగోతం ఆధారాలతో సహా బయటపడింది. కోట్ల రూపాయల విలువజేసే రూ.500 నోట్ల కట్టల్ని తన ముందు పరుచుకొని ఛత్తీస్‌గఢ్‌ ఎమ్మెల్యే రామ్‌కుమార్‌ కొంతమందితో రాజకీయ మంతనాలు జరుపుతున్న వీడియో కెమెరాకు చిక్కింది.

• ఛత్తీస్‌గఢ్‌లో రాజకీయంగా కలకలం రేపిన వీడియో

రాయ్‌పూర్‌ : ఛత్తీస్‌గఢ్‌లో అధికార కాంగ్రెస్‌ ఎమ్మెల్యేల అవినీతి బాగోతం ఆధారాలతో సహా బయటపడింది. కోట్ల రూపాయల విలువజేసే రూ.500 నోట్ల కట్టల్ని తన ముందు పరుచుకొని ఛత్తీస్‌గఢ్‌ ఎమ్మెల్యే రామ్‌కుమార్‌ కొంతమందితో రాజకీయ మంతనాలు జరుపుతున్న వీడియో కెమెరాకు చిక్కింది. ఈ వ్యవహారం తాజాగా వెలుగులోకి రావటంతో కాంగ్రెస్‌ ప్రభుత్వంపై సర్వత్రా ఆగ్రహం వ్యక్తమవుతున్నది. ‘ఛత్తీస్‌గఢ్‌ను అవినీతికి డెన్‌’గా మార్చారని ప్రతిపక్షాలు ఆరోపించాయి.

‘ఎమ్మెల్యే రామ్‌కుమార్‌ ఎదుట ఉన్న నోట్ల కట్టలు ఎక్కడివి? అన్నది అధికార కాంగ్రెస్‌ సమాధానం చెప్పాలి. ఈ వ్యవహారంపై సీబీఐ విచారణకు ఆదేశించే దమ్ము ప్రభుత్వానికి ఉందా?’ అంటూ విపక్షాలు ప్రశ్నిస్తున్నాయి. వీడియోలో కనిపించిన నోట్ల కట్టలకు తనకు సంబంధం లేదని తనపై వచ్చిన అవినీతి ఆరోపణల్ని ఎమ్మెల్యే రామ్‌కుమార్‌ ఖండించారు. ఛత్తీస్‌గఢ్‌ అసెంబ్లీకి త్వరలో ఎన్నికలు జరగనున్న వేళ ఈ వీడియో రాజకీయంగా కలకలం రేపింది. గత ఐదేండ్లుగా కాంగ్రెస్‌ పాలనలో బొగ్గు, మద్యం, ఇసుక వ్యాపారంలో అధికార పార్టీ ఎమ్మెల్యేలు దోపిడికి పాల్పడుతున్నారని, మాఫియా రాజ్‌ నడుపుతున్నారన్నది రాష్ట్రంలో చర్చనీయాంశమైంది.