18+కు వ్యాక్సినేషన్‌ వాయిదా!

• మూడో దశ వ్యాక్సినేషన్‌పై అనిశ్చితి.. నేడు ప్రారంభించలేమన్న పలు రాష్ర్టాలు
• తీవ్రంగా వేధిస్తున్న వ్యాక్సిన్ల కొరత.. 45 ఏండ్లు పైబడినవారికే సరిపడాలేని టీకాలు
• వ్యాక్సిన్‌ కోసం బారులు తీరొద్దన్న కేజ్రీ.. ముంబైలో వ్యాక్సినేషన్‌ 3 రోజులు బంద్‌

న్యూఢిల్లీ, ఏప్రిల్‌ 30: దేశవ్యాప్తంగా రోజుకు 3 లక్షలకు పైగా కరోనా కేసులు నమోదవుతున్న వేళ పలు రాష్ర్టాలు, కేంద్ర పాలిత ప్రాంతాలు కరోనా వ్యాక్సిన్‌కు తీవ్ర కొరతను ఎదుర్కొంటున్నాయి. దీంతో 18-44 ఏండ్ల వయసువారికి వ్యాక్సినేషన్‌ను (మూడో దశను) శనివారం నాడు ప్రారంభించలేమని నిస్సహాయత వ్యక్తం చేశాయి. ఈ గ్రూపు వయస్కులు కేవలం రెండు రోజుల్లోనే కొవిన్‌ పోర్టల్‌లో 2.45 కోట్ల మంది తమ పేర్లు నమోదు చేసుకున్నారు. సరిపడా వ్యాక్సిన్‌ డోసులు లేవని, శనివారం వ్యాక్సినేషన్‌ కేంద్రాల వద్ద బారులు తీరవద్దని ఢిల్లీ ప్రజలకు సీఎం కేజ్రీవాల్‌ విజ్ఞప్తి చేశారు. స్టాకు లేనందున మూడు రోజుల పాటు వ్యాక్సినేషన్‌ను నిలిపివేస్తున్నట్టు బృహన్‌ముంబై మునిసిపల్‌ కార్పొరేషన్‌ (బీఎంసీ) గురువారం ప్రకటించింది. 18-44 గ్రూపునకు వ్యాక్సినేషన్‌ కూడా వాయిదా వేయక తప్పడం లేదని తెలిపింది. వ్యాక్సిన్‌ డోసులు ఎప్పుడొస్తే అప్పుడు 18-44 వయస్కులకు టీకాలు వేస్తామని గోవా సీఎం ప్రమోద్‌ సావంత్‌ పేర్కొన్నారు. మధ్యప్రదేశ్‌లోనూ ఇదే పరిస్థితి. తయారీదారులు సకాలంలో సరిపడా వ్యాక్సిన్‌ను సరఫరా చేయలేదని సీఎం శివరాజ్‌ సింగ్‌ చౌహాన్‌ తెలిపారు. 18-44 గ్రూపునకు వ్యాక్సినేషన్‌ను శనివారం ప్రారంభించడం లేదని తేల్చి చెప్పారు.

• ఆంధ్రప్రదేశ్‌లో మూడోవిడుత వ్యాక్సినేషన్‌ ఇప్పట్లో సాధ్యపడదని సీఎం వైఎస్‌ జగన్‌మోహన్‌రెడ్డి అభిప్రాయపడ్డారు. ప్రస్తుతం కొనసాగుతున్న 45 ఏండ్లు నిండినవారికి ఇంకా వ్యాక్సినేషన్‌కే మరో మూడు నాలుగు నెలల సమయం పడుతుందని అన్నారు.
• ఒడిశాలో రెండో డోసు టీకా కోసమే ప్రజలు వారం పాటు నిరీక్షించాల్సిన పరిస్థితి నెలకొంది.
• బిహార్‌ ప్రభుత్వం కోటి వ్యాక్సిన్‌ వయల్స్‌ కావాలని కోరగా సీరం సంస్థ తిరస్కరించిందని, దీంతో మూడో దశను శనివారం ప్రారంభించలేమని ఆ రాష్ట్ర అధికారులు స్పష్టం చేశారు.
• గుజరాత్‌లోనూ వ్యాక్సిన్‌ డోసులు రావడానికి 15 రోజులు పడుతుందని ఆ రాష్ట్ర సీఎం విజయ్‌ రూపానీ తెలిపారు.
• వ్యాక్సిన్‌ సరఫరాపై కచ్చితమైన సమాచారం లేనందున 18-44 వయసువారికి వ్యాక్సినేషన్‌పై ఇంకా ప్రణాళిక ఖరారు చేయలేదని పంజాబ్‌ తెలిపింది.
• కర్ణాటక, తమిళనాడు, కేరళ, ఉత్తరాఖండ్‌, జమ్ము కశ్మీర్లో కూడా మూడోదశ వ్యాక్సినేషన్‌ను వాయిదా వేశారు.