సహజీవనం చేస్తున్న మహిళ తిట్టిందని.. నిరుద్యోగి ఆత్మహత్య

భార్య వేధింపులు భరించలేక బెంగళూరులో ఒక టెకీ ఆత్మహత్య చేసుకున్న ఘటన సంచలనం సృష్టించిన క్రమంలో తాను సహ జీవనం చేస్తున్న మహిళ నుంచి వేధింపులు, అవహేళనలు భరించలేక యూపీలోని నోయిడాలో నిరుద్యోగ యువకుడొకరు ఆత్మహత్య చేసుకున్నాడు.

• న్యూఢిల్లీ, డిసెంబర్‌ 14: భార్య వేధింపులు భరించలేక బెంగళూరులో ఒక టెకీ ఆత్మహత్య చేసుకున్న ఘటన సంచలనం సృష్టించిన క్రమంలో తాను సహ జీవనం చేస్తున్న మహిళ నుంచి వేధింపులు, అవహేళనలు భరించలేక యూపీలోని నోయిడాలో నిరుద్యోగ యువకుడొకరు ఆత్మహత్య చేసుకున్నాడు. ‘రోజంతా కూర్చుని ఇంట్లో తింటూ కూర్చోకపోతే ఏదైనా పని చూసుకోవచ్చు కదా’ అని తనతో సహ జీవనం చేస్తున్న మహిళ నిత్యం ఈసడించేదని, దీంతో ఉద్యోగం దొరక్క, భాగస్వామి నుంచి అవహేళనలు, వెక్కిరింపుల వల్ల కలిగే తీవ్ర మానసిక ఒత్తిడి తట్టుకోలేక ఆత్మహత్య చేసుకోవాలని నిర్ణయం తీసుకున్నానని ఆ యువకుడు పేర్కొన్నాడు.

ఈ పరిస్థితికి తాను ఎవరినీ నిందించడం లేదని 27 ఏండ్ల మయాంక్‌ చాందేల్‌ తన ఆత్మహత్య నోట్‌లో పేర్కొన్నాడు. యూపీలోని జలాలబాద్‌కు చెందిన మయాంక్‌ ఒక యువతితో కలిసి చదువుకునే వాడు. తర్వాత వారి పరిచయం ప్రేమగా మారింది. ప్రైవేట్‌ కంపెనీలో పనిచేసే ఆమెతో అతను గత నాలుగేండ్లుగా సహజీవనం చేస్తున్నాడు. ఆ మహిళతో ఉంటున్న ఫ్లాట్‌లోనే ఫ్యాన్‌కు ఉరేసుకుని ఆత్మహత్య చేసుకున్నాడు.