పేదల ఇండ్లలోనూ అవినీతే.. కర్ణాటక ప్రభుత్వాన్ని కడిగేసిన కాగ్‌

కర్ణాటకలోని బీజేపీ డబుల్‌ ఇంజిన్‌ సర్కారు పాలనలో అవినీతి బాగోతాలు రోజుకొక్కటిగా బయటకు వస్తున్నాయి. 40% కమీషన్‌ సర్కారుగా ముద్రపడ్డ బొమ్మై ప్రభుత్వం అక్రమాలను తాజాగా కంప్ట్రోలర్‌ అండ్‌ ఆడిటర్‌ జనరల్‌ (కాగ్‌) బయటపెట్టింది.

• లబ్ధిదారుల ఎంపికలో అక్రమాలు
• నిబంధనలకు తిలోదకాలు
• లక్ష్యానికి దూరంగా నిర్మాణాలు

బెంగళూరు, సెప్టెంబర్‌ 22: కర్ణాటకలోని బీజేపీ డబుల్‌ ఇంజిన్‌ సర్కారు పాలనలో అవినీతి బాగోతాలు రోజుకొక్కటిగా బయటకు వస్తున్నాయి. 40% కమీషన్‌ సర్కారుగా ముద్రపడ్డ బొమ్మై ప్రభుత్వం అక్రమాలను తాజాగా కంప్ట్రోలర్‌ అండ్‌ ఆడిటర్‌ జనరల్‌ (కాగ్‌) బయటపెట్టింది. పేదలకు ఇండ్ల నిర్మాణ పథకాల అమలులో పెద్ద ఎత్తున అక్రమాలు చోటుచేసుకున్నట్టు కాగ్‌ నిగ్గుతేల్చింది. లబ్ధిదారుల ఎంపికలో నిబంధనలను తుంగలో తొక్కి, తమకు ఇష్టమున్నవారిని ఎంపికచేసినట్టు వెల్లడించింది. లక్ష్యానికి, పూర్తయిన ఇండ్ల నిర్మాణాలకు అసలు పొంతనే లేదని విమర్శించింది.

కాగ్‌ రిపోర్టులోని కీలకాంశాలు కొన్ని..

• పట్టణ పేదల కోసం 5.17 లక్షల నివాస యూనిట్లు పూర్తి చేయాలని లక్ష్యంగా పెట్టుకున్న కర్ణాటక ప్రభుత్వం 2022 మార్చి 21 నాటికి 88,395 యూనిట్లనే పూర్తి చేసింది. నిర్దేశించుకున్న లక్ష్యంలో కేవలం 17 శాతమే పని పూర్తయ్యింది.
• పేదల కోసం సరసమైన ధరల్లో ఇండ్లు, వ్యక్తిగతంగా ఇండ్ల నిర్మాణం లాంటి ప్రాజెక్టుల కింద 13,71,592 మందికి గృహాలు అందజేయాలని ప్రభుత్వం నిర్ణయించింది. కానీ 2022 మార్చి నాటికి 5,17,531 మాత్రమే కొలిక్కి వచ్చాయి. లక్ష్యంలో సగం కూడా పూర్తికాలేదు.
• పీఎం ఆవాస్‌ యోజన పథకం నిబంధనలను రాష్ట్ర ప్రభుత్వం గాలికొదిలేసింది. కొత్త లబ్ధిదారులను జాబితాలో చేర్చాలంటే కేంద్ర మంజూరు, పర్యవేక్షణ కమిటీ అనుమతి కావాలి. కానీ అనుమతి లేకుండానే లబ్ధిదారులను చేర్చింది.
• 10,188 మంది లబ్ధిదారులకు ఇండ్లను కేటాయిస్తే.. వీరిలో 4,446 మంది జాబితాలో లేనివారే. దీని బట్టి పీఎం ఆవాస్‌ యోజన ఏ స్థాయిలో దుర్వినియోగమవుతున్నదో అర్థమవుతున్నది.
• కర్ణాటకలో ఇండ్లులేని పేదలు ఎంతమంది ఉన్నరు? లబ్ధిదారుల ఎంపిక ఎలా? తదితరాల కోసం రూపొందించిన మార్గదర్శకాలను స్థానిక సంస్థలు పట్టించుకోవడం లేదు. తమకు నచ్చినవారికే ఇండ్లను కట్టబెడుతున్నట్టు తెలుస్తున్నది.

యూనిఫాం పంపిణీలోనూ కమీషన్ల కక్కుర్తి

బెంగళూరు, సెప్టెంబర్‌ 22: కర్ణాటక విద్యాశాఖలో విద్యార్థులకు యూనిఫాం పంపిణీ లోనూ భారీ అవినీతి జరిగిందనే ఆరోపణలు వస్తున్నాయి. తుమకూరు,మండ్య, మైసూర్‌, తదితర జిల్లాల్లో యూనిఫాం నాణ్యతపై భారీగా ఫిర్యాదులు వెల్లువెత్తుతున్నాయి. విద్యాశాఖ మంత్రి బీసీ నాగేశ్‌ సొంత జిల్లా తుమకూరు నుంచి ఎక్కువగా యూనిఫాం నాణ్యతపై ఫిర్యాదులు వస్తున్నాయి.