సుప్రీం జడ్జిల సంఖ్య 38కి పెంపు

చీఫ్‌ జస్టిస్‌ ఆఫ్‌ ఇండియా(సీజేఐ)తో కలిపి సుప్రీంకోర్టు న్యాయమూర్తుల సంఖ్యను ప్రస్తుతం ఉన్న 34 నుంచి 38కి పెంచే ప్రతిపాదనకు కేంద్ర మంత్రివర్గం మంగళవారం ఆమోదం తెలిపింది.

• పత్తి దిగుబడి పెంపునకు ప్రత్యేక మిషన్‌
• చెరకు మద్దతు ధర 365కు పెంపు
• ఎంఎస్‌ఎంఈలు, విమాన సంస్థలకు అత్యవసర క్రెడిట్‌ లైన్‌ గ్యారెంటీ
• గుజరాత్‌కు మరో రెండు సెమీ కండక్టర్‌ యూనిట్లు
• కేంద్ర క్యాబినెట్‌ కీలక నిర్ణయాలు

న్యూఢిల్లీ: చీఫ్‌ జస్టిస్‌ ఆఫ్‌ ఇండియా(సీజేఐ)తో కలిపి సుప్రీంకోర్టు న్యాయమూర్తుల సంఖ్యను ప్రస్తుతం ఉన్న 34 నుంచి 38కి పెంచే ప్రతిపాదనకు కేంద్ర మంత్రివర్గం మంగళవారం ఆమోదం తెలిపింది. ప్రస్తుతం సుప్రీంకోర్టులో 33 మంది న్యాయమూర్తులు, ఒక సీజేఐ ఉన్నారని కేంద్ర మంత్రి అశ్విని వైష్ణవ్‌ తెలిపారు. ఈ సంఖ్యను మరో నాలుగు పెంచడానికి పార్లమెంటు తదుపరి సమావేశాల్లో బిల్లు ప్రవేశపెట్టనున్నారు. పార్లమెంటు ఆమోదం పొందిన తర్వాత సీజేఐతో కలిపి సుప్రీంకోర్టు న్యాయమూర్తుల సంఖ్య 38కి చేరుతుంది. సుప్రీంకోర్టు(న్యాయమూర్తుల సంఖ్య) చట్టం 1956 ప్రకారం ప్రారంభంలో సీజేఐ మినహా గరిష్టంగా 10 మంది న్యాయమూర్తులు ఉండేవారు. 1960లో ఈ చట్టాన్ని సవరించి న్యాయమూర్తుల సంఖ్యను 13కు పెంచారు. తర్వాత మరొక సవరణ ద్వారా ఈ సంఖ్య 17కు పెరిగింది. 1986లో చట్టాన్ని మరోసారి సవరించి న్యాయమూర్తుల సంఖ్యను 25కు(సీజేఐ కాకుండా) పెంచారు. 2009లో 30కి 2019లో 33కి పెంచారు.

మరిన్ని క్యాబినెట్‌ నిర్ణయాలు..

• దేశంలో పత్తి దిగుబడిని పెంచేందుకు రూ. 5,659.22 కోట్లతో ఐదేండ్ల మిషన్‌ను ప్రభుత్వం మంగళవారం ప్రకటించింది. పత్తి రంగంలోని అడ్డంకులు, క్షీణిస్తున్న వృద్ధి, నాణ్యత సమస్యలను పరిష్కరించడానికి “మిషన్‌ ఫర్‌ కాటన్‌ ప్రొడక్టివిటీ” కింద రూ. 5,659.22 కోట్లను ఆమోదించింది.
• అక్టోబర్‌ నుంచి మొదలయ్యే 202627 సీజన్‌కు గాను షుగర్‌ మిల్లులు రైతులకు చెల్లించాల్సిన కనీస ధరను క్వింటాలుకు రూ. 10 పెంచుతూ ప్రభుత్వం నిర్ణయం తీసుకుంది. దీంతో కొత్త ధర క్వింటాలుకు రూ. 365కు చేరుకుంది.
• పశ్చిమాసియా ఘర్షణల వల్ల ఏర్పడిన సవాళ్లను ఎదుర్కోవడానికి ఎంఎస్‌ఎంఈ(సూక్ష్మ, చిన్న, మధ్యతరహా పరిశ్రమలు), విమానయాన సంస్థలు, ఇతర కంపెనీల వర్కింగ్‌ క్యాపిటల్‌ అవసరాల కోసం రూ. 18,100 కోట్లు కేటాయిస్తూ ప్రభుత్వం అత్యవసర క్రెడిట్‌ లైన్‌ గ్యారెంటీ పథకాన్ని ప్రకటించింది.
• రూ. 3,936 కోట్లకు పైగా ఉమ్మడి పెట్టుబడితో మరో రెండు సెమీకండక్టర్‌ తయారీ యూనిట్లకు కేంద్ర మంత్రివర్గం మంగళవారం ఆమోదం తెలిపింది. ఈ ప్రాజెక్టులను ఇండియా సెమీకండక్టర్‌ మిషన్‌ కింద ఆమోదించినట్లు కేంద్ర మంత్రి అశ్విని వైష్ణవ్‌ చెప్పారు. వీటిలో గాలియం నైట్రైడ్‌ సాంకేతికతపై ఆధారపడిన దేశపు మొట్టమొదటి కమర్షియల్‌ మినీ/మైక్రోఎల్‌ఈడీ డిస్‌ప్లే యూనిట్‌, ఒక సెమీకండక్టర్‌ ప్యాకేజింగ్‌ యూనిట్‌ ఉన్నాయి. ఈ రెండు సెమీకండక్టర్‌ తయారీ కేంద్రాలను గుజరాత్‌లో ఏర్పాటు చేయున్నారు.