గోవాలో విజయం సాధిస్తాం.. విశ్వాసం వ్యక్తం చేసిన మమత

mamata Banerjee | రాబోయే గోవా అసెంబ్లీ ఎన్నికల్లో టీఎంసీ విజయం సాధిస్తుందని బెంగాల్‌ ముఖ్యమంత్రి, ఆ పార్టీ అధినేత్రి మమతా బెనర్జీ విశ్వాసం వ్యక్తం చేశారు. రెండు రోజుల పర్యటనలో గోవాలో పర్యటించనున్నారు. ఈ సందర్భంగా ఆమె

పనాజీ : రాబోయే గోవా అసెంబ్లీ ఎన్నికల్లో టీఎంసీ విజయం సాధిస్తుందని బెంగాల్‌ ముఖ్యమంత్రి, ఆ పార్టీ అధినేత్రి మమతా బెనర్జీ విశ్వాసం వ్యక్తం చేశారు. రెండు రోజుల పర్యటనలో గోవాలో పర్యటించనున్నారు. ఈ సందర్భంగా ఆమె మాట్లాడుతూ రాష్ట్రంలో బీజేపీని ఓడించాలని ఎవరైనా కోరుకుంటే.. అది సాధ్యమేనన్న ఆమె టీఎంసీకి మద్దతివ్వాలన్నారు. గోవా అందమైన, చాలా తెలివైన రాష్ట్రమని, ఇక్కడ తమ పార్టీ ఎన్నికల బరిలోకి దిగిందని, ఎన్నికల్లో ప్రజలకు సహాయం చేయడానికి వారి అనుభవాన్ని ఉపయోగించాలన్నారు.

వచ్చే ఏడాది ప్రారంభంలో జరగనున్న 40 మంది సభ్యుల గోవా అసెంబ్లీకి ఎన్నికల కోసం టీఎంసీ ఇప్పటికే మహారాష్ట్రవాది గోమంతక్ పార్టీ (MGP)తో పొత్తు పెట్టుకుంది. బెంగాల్‌లో మాదిరిగా గోవా కోసం తన వద్ద ప్రత్యేక ప్రణాళిక ఉందని, అధికారంలోకి వచ్చిన ఆరు నెలల్లో రాష్ట్రంలో అమలు చేసి తీరుతామన్నారు. గతంలో తమ పార్టీ గోవాలో పోటీ చేయాలని భావించలేదని, అయితే ఇతర పార్టీలు బీజేపీకి పోటీ ఇవ్వడం లేదని ఆగ్రహించిన తర్వాతే టీఎంసీ ఎన్నికల బరిలోకి దిగాలని నిర్ణయించిందన్నారు. ఇన్నాళ్లు తాము గోవాకు రాలేదని, కానీ ఎవరూ ఏమీ చేయడం లేదని గుర్తించామన్నారు. బీజేపీకి వ్యతిరేకంగా ఎవరూ పోరాడలేదని, అందుకే ఇక్కడికి రావాలనుకున్నామన్నారు.

ఈ సందర్భంగా కాంగ్రెస్‌నుద్దేశించి పలు వ్యాఖ్యలు చేశారు. ‘బెంగాల్‌లో మాకు వ్యతిరేకంగా పోరాడగలిగినప్పుడు.. గోవాలో మేం మీపై ఎందుకు పోరాడలేం.. అయితే మేం (స్వతంత్రంగా) పోరాడతాం. మేం మీ మాట వినం.. బీజేపీతో ‘సగం అవగాహన’ చేసుకోం’ అన్నారు. ఈ సందర్భంగా అధికార బీజేపీని గద్దె దింపేందుకు మమతా ‘ఖేల్‌ జట్లో’ నినాదాన్ని లేవనెత్తారు. పశ్చిమ బెంగాల్‌కు చెందిన పలువురు ఫుట్‌బాల్ దిగ్గజాలు స్థానిక నేతలతో పాటు టీఎంసీకి ప్రచారం చేసేందుకు గోవాకు వస్తున్నారని ఆమె తెలిపారు. కేంద్ర రైల్వే మంత్రిగా ఉన్న సమయంలో గోవాలోని కొంకణ్ రైల్వే కార్పొరేషన్ లిమిటెడ్ ప్రాజెక్టుకు మద్దతు ఇచ్చినట్లు చెప్పారు.