Terror Attacks | 11 ఏండ్లు.. 11 ఉగ్రదాడులు.. మోదీ ప్రభుత్వ పాలనలో కశ్మీరం కల్లోలితమే

Terror Attacks | బీజేపీ ప్రభుత్వ హయాంలో ఉగ్రదాడులు తగ్గాయని, ముష్కర మూకలకు మోదీ ప్రభుత్వం ముకుతాడు వేసిందంటూ ప్రచారం జరుగుతున్నది. తమ హయాంలో ఉగ్రవాదాన్ని అంతమొందించామంటూ అధికార పార్టీ నేతలు ప్రగల్భాలు పలికారు కూడా. అయితే, వాస్తవ పరిస్థితులను విశ్లేషిస్తే ఇదంతా ఉత్త ముచ్చటగానే తెలుస్తున్నది.

• ఉగ్రవాదాన్ని అంతం చేశామన్నది ఉత్తముచ్చటే
• దాడుల్లో 147 మంది సైనికులు, పౌరులు మృతి

Terror Attacks | (స్పెషల్‌ టాస్క్‌ బ్యూరో) హైదరాబాద్‌, ఏప్రిల్‌ 26 (నమస్తే తెలంగాణ): బీజేపీ ప్రభుత్వ హయాంలో ఉగ్రదాడులు తగ్గాయని, ముష్కర మూకలకు మోదీ ప్రభుత్వం ముకుతాడు వేసిందంటూ ప్రచారం జరుగుతున్నది. తమ హయాంలో ఉగ్రవాదాన్ని అంతమొందించామంటూ అధికార పార్టీ నేతలు ప్రగల్భాలు పలికారు కూడా. అయితే, వాస్తవ పరిస్థితులను విశ్లేషిస్తే ఇదంతా ఉత్త ముచ్చటగానే తెలుస్తున్నది. 2014లో మోదీ నేతృత్వంలో బీజేపీ సర్కారు అధికారంలోకి వచ్చినప్పటి నుంచి గత పదకొండేండ్లలో ఒక్క జమ్ముకశ్మీర్‌లోనే 11 ఉగ్రదాడులు జరిగాయి. 103 మంది సైనికులు, 44 మంది పౌరులు మృతి చెందారు. 213 మంది గాయాలపాలయ్యారు.

2014 డిసెంబర్‌-2025 ఏప్రిల్‌ మధ్య కశ్మీర్‌లో జరిగిన ప్రధాన ఉగ్రదాడులు

• దాడి: కశ్మీర్‌ లోయ దాడులు
  ఎప్పుడు: డిసెంబర్‌, 2014, కశ్మీర్‌ లోయ, ఉరి, బారముల్లా జిల్లా.
  ఏమైంది: ఆర్మీ క్యాంప్‌పై దాడి చేసిన ఉగ్రవాదులు
  నష్టం: అమరులైన 17 మంది సైనికులు
• దాడి: పఠాన్‌కోట్‌ దాడులు
  ఎప్పుడు: జనవరి, 2016. పఠాన్‌కోట్‌ ఎయిర్‌ఫోర్స్‌ స్టేషన్‌
  ఏమైంది: ఎయిర్‌బేస్‌ స్టేషన్‌పై దాడికి తెగబడ్డ జైషే మొహమ్మద్‌ ఉగ్రవాదులు
  నష్టం: అమరులైన 8 మంది సైనికులు, ఒక పౌరుడి మరణం.
• దాడి: పాంపోర్‌ దాడులు
  ఎప్పుడు: జూన్‌, 2016, పాంపోర్‌, పుల్వామా జిల్లా
  ఏమైంది: సీఆర్పీఎఫ్‌ కాన్వాయ్‌పై లష్కరే తొయిబా ఉగ్రవాదుల మెరుపు దాడులు
  నష్టం: అమరులైన 8 మంది జవాన్లు
• దాడి: ఉరి ఎటాక్‌
  ఎప్పుడు: సెప్టెంబర్‌, 2016, ఉరి, బెరాముల్లా జిల్లా
  ఏమైంది: ఆర్మీ బ్రిగేడ్‌ హెడ్‌క్వార్టర్స్‌పై దాడి చేసిన జైషే మొహమ్మద్‌ ఉగ్రవాదులు
  నష్టం: అమరులైన 19 మంది జవాన్లు
• దాడి: నాగ్రోటా ఎటాక్‌
  ఎప్పుడు: నవంబర్‌, 2016, నాగ్రోటా, జమ్ము జిల్లా
  ఏమైంది: ఆర్మీ క్యాంప్‌పై దాడులకు తెగబడ్డ ఉగ్రవాదులు
  నష్టం: అమరులైన 7 మంది జవాన్లు
• దాడి: అమర్‌నాథ్‌ యాత్రపై దాడులు
  ఎప్పుడు: జూలై, 2017, అనంత్‌నాగ్‌.
  ఏమైంది: అమర్‌నాథ్‌ యాత్రకు వెళ్తున్న పర్యాటకుల బస్సుపై ఉగ్రదాడులు
  నష్టం: 8 మంది పౌరుల మృతి
• దాడి: పుల్వామా ఎటాక్‌
  ఎప్పుడు: ఫిబ్రవరి, 2019, పుల్వామా
  ఏమైంది: సీఆర్పీఎఫ్‌ కాన్వాయ్‌పై జైషే మొహమ్మద్‌ ఉగ్రవాదుల దాడి
  నష్టం: అమరులైన 40 మంది జవాన్లు,
• దాడి: రియాసీ ఎటాక్‌
  ఎప్పుడు: జూన్‌, 2024, రియాసీ జిల్లా
  ఏమైంది: యాత్రికులు ప్రయాణిస్తున్న బస్సుపై ఉగ్రదాడి
  నష్టం: 9 మంది పౌరుల మృతి
• దాడి: దొడా ఎటాక్‌
  ఎప్పుడు: జూలై, 2024, దొడా జిల్లా
  ఏమైంది: సైనికులపై కాల్పులు
  నష్టం: అమరులైన నలుగురు సైనికులు
• దాడి: పహల్గాం దాడి
  ఎప్పుడు: ఏప్రిల్‌, 2025, పహల్గాం, అనంత్‌నాగ్‌ జిల్లా
  ఏమైంది: పర్యాటకులపై దాడి చేసిన ్థ టీఆర్‌ఎఫ్‌ ఉగ్రవాదులు
  నష్టం: 26 మంది మృతి, 20 మందికి పైగా గాయాలు

అప్పటి బీజేపీ ఏలుబడిలోనూ..

2014 కంటే ముందు కేంద్రంలో బీజేపీ అధికారంలో ఉన్నప్పుడు కూడా దేశంలో పలు ప్రధాన ఉగ్రదాడి ఘటనలు జరిగాయి. అక్షర్‌ధామ్‌ ఆలయంపై దాడి (2002), పార్లమెంట్‌పై దాడి (2001), పహల్గాం-అమర్‌నాథ్‌ యాత్రికులపై దాడి (2000), ఐసీ 814 విమానం హైజాక్‌ (1999), కార్గిల్‌ దాడి-యుద్ధం (1999) ఉన్నాయి.