Visit:
India | టీమిండియా మరోసారి ప్రపంచ క్రికెట్లో తన ఆధిపత్యాన్ని చాటుకుంది. 2026 ఐసీసీ పురుషుల టీ20 ప్రపంచకప్ ఫైనల్లో న్యూజిలాండ్పై అద్భుత విజయం సాధించి ట్రోఫీని కైవసం చేసుకుంది. అహ్మదాబాద్లో జరిగిన ఈ ఫైనల్ మ్యాచ్లో భారత జట్టు సమిష్టిగా రాణించి ఏకపక్షంగా మ్యాచ్ను గెలుచుకుంది. ఈ విజయంతో భారత్ వరుసగా రెండోసారి టీ20 ప్రపంచకప్ను గెలుచుకున్న జట్టుగా రికార్డు సృష్టించింది. మొత్తం మీద టీమిండియాకు ఇది మూడో టీ20 ప్రపంచకప్ టైటిల్ కావడం విశేషం. ఈ ఘన విజయంతో దేశవ్యాప్తంగా ఆనందం వెల్లివిరిసింది. అభిమానులతో పాటు సినీ ప్రముఖులు కూడా టీమిండియాపై ప్రశంసల వర్షం కురిపించారు.
మెగాస్టార్ చిరంజీవి సోషల్ మీడియాలో స్పందిస్తూ భారత జట్టుకు హృదయపూర్వక అభినందనలు తెలిపారు. టోర్నమెంట్ మొత్తం జట్టు చూపించిన పట్టుదల, టీమ్వర్క్ అద్భుతమని పేర్కొన్నారు. ఈ విజయం దేశాన్ని గర్వపడేలా చేసిందని చెబుతూ “జై హింద్” అంటూ తన కామెంట్లో రాసుకొచ్చారు. సూపర్ స్టార్ మహేష్ బాబు కూడా టీమిండియా విజయంపై ఆనందం వ్యక్తం చేశారు. ఆటగాళ్లు చూపించిన ఆత్మవిశ్వాసం, ఆధిపత్యం గొప్పదని ప్రశంసించారు. సంజూ శాంసన్, అభిషేక్ శర్మ, ఇషాన్ కిషన్, శివమ్ దూబే, జస్ప్రీత్ బుమ్రా, అక్షర్ పటేల్ వంటి ఆటగాళ్ల ప్రదర్శనను ప్రత్యేకంగా అభినందించారు. ఈ విజయం 140 కోట్ల భారతీయుల హృదయాలను ఆనందంతో నింపిందని తెలిపారు.
ప్రఖ్యాత దర్శకుడు ఎస్.ఎస్. రాజమౌళి కూడా టీమిండియా విజయంపై స్పందించారు. సంజూ శాంసన్, బుమ్రా, దూబే, ఇషాన్ వంటి ఆటగాళ్లు అద్భుతంగా ఆడారని పేర్కొంటూ “మళ్లీ ఛాంపియన్స్” అంటూ జట్టుకు అభినందనలు తెలిపారు. జూనియర్ ఎన్టీఆర్ కూడా భారత జట్టుకు శుభాకాంక్షలు తెలుపుతూ టోర్నమెంట్ మొత్తం జట్టు చూపించిన ఆత్మవిశ్వాసం, సమన్వయం అద్భుతమని అన్నారు. మరోసారి ట్రోఫీని దేశానికి తీసుకువచ్చి చరిత్ర సృష్టించినందుకు జట్టును అభినందించారు.
ఆంధ్రప్రదేశ్ డిప్యూటీ సీఎం పవన్ కళ్యాణ్ కూడా టీమిండియా విజయంపై స్పందించారు. న్యూజిలాండ్పై ఫైనల్ మ్యాచ్లో అద్భుత విజయం సాధించి మూడోసారి ప్రపంచకప్ గెలుచుకున్న టీమిండియాకు హృదయపూర్వక అభినందనలు తెలిపారు. జట్టును అద్భుతంగా నడిపించిన కెప్టెన్ సూర్యకుమార్ యాదవ్కు ప్రత్యేకంగా శుభాకాంక్షలు తెలిపారు. అలాగే టోర్నమెంట్ మొత్తం అద్భుతంగా రాణించిన వికెట్కీపర్ సంజూ శాంసన్కు ప్రత్యేక అభినందనలు తెలియజేశారు. బౌలింగ్ విభాగంలో మెరుపు ప్రదర్శనతో నిలిచిన జస్ప్రీత్ బుమ్రా, వరుణ్ చక్రవర్తిలను కూడా ఆయన ప్రశంసించారు. జట్టును విజయపథంలో నడిపించిన హెడ్ కోచ్ గౌతమ్ గంభీర్తో పాటు సహాయక సిబ్బందికి కూడా అభినందనలు తెలిపారు.
ఫైనల్ మ్యాచ్ విషయానికి వస్తే భారత బ్యాట్స్మెన్ అద్భుతంగా రాణించారు. ముఖ్యంగా సంజూ శాంసన్ కీలక ఇన్నింగ్స్ ఆడి జట్టుకు బలమైన స్కోర్ అందించారు. ఆయన 89 పరుగులు చేసి జట్టును ముందుండి నడిపించారు. అభిషేక్ శర్మ, ఇషాన్ కిషన్ మెరుపు హాఫ్ సెంచరీలతో జట్టు భారీ స్కోర్ సాధించడంలో కీలక పాత్ర పోషించారు. బౌలింగ్ విభాగంలో జస్ప్రీత్ బుమ్రా తన కట్టుదిట్టమైన బౌలింగ్తో న్యూజిలాండ్ బ్యాట్స్మెన్ను కట్టడి చేశారు. ఆయనకు తోడుగా అక్షర్ పటేల్ పదునైన బౌలింగ్తో కివీస్ జట్టును ఒత్తిడిలోకి నెట్టారు. బ్యాటింగ్, బౌలింగ్ రెండు విభాగాల్లోనూ భారత్ సంపూర్ణ ఆధిపత్యం చాటింది.
