Telangana | వినూత్న తెలంగాణ.. ఇన్నోవేషన్‌లో రాష్ట్రమే టాప్‌

నవకల్పనల్లో నవ రాష్ట్రం తెలంగాణ జెట్‌ వేగంతో దూసుకుపోతున్నది. ఏర్పడి తొమ్మిదేండ్లే అయినా, పరిశ్రమల్లో కొత్త విధానాలు అమలుచేయటంలో నంబర్‌ వన్‌ స్థానంలో దూసుకుపోతున్నది.

• పరిశ్రమల్లో కొత్త విధానాల అమలులో దూకుడు
• ముందు వరుసలో తెలంగాణ, కర్ణాటక, తమిళనాడు
• చివరన నిలిచిన ప్రధాని రాష్ట్రం గుజరాత్‌
• అక్కడ ఇప్పటికీ డొక్కు ఐడియా.. తుక్కు ప్రొడక్టే
• కొత్తదనాన్ని తేలేకపోతున్న దేశీయ పరిశ్రమలు
• ఏకంగా 73 శాతం పరిశ్రమలది ఇదే తీరు
• నిధుల కొరత, నష్టభయం కారణమట
• నేషనల్‌ మాన్యుఫ్యాక్చరింగ్‌ ఇన్నోవేషన్‌ సర్వేలో వెల్లడి

న్యూఢిల్లీ, ఏప్రిల్‌ 30: నవకల్పనల్లో నవ రాష్ట్రం తెలంగాణ జెట్‌ వేగంతో దూసుకుపోతున్నది. ఏర్పడి తొమ్మిదేండ్లే అయినా, పరిశ్రమల్లో కొత్త విధానాలు అమలుచేయటంలో నంబర్‌ వన్‌ స్థానంలో దూసుకుపోతున్నది. దక్షిణాది రాష్ర్టాలైన తెలంగాణ, కర్ణాటక, తమిళనాడులోనే పరిశ్రమల్లో ఉత్పత్తి, మార్కెటింగ్‌, సాంకేతికత వంటి రంగాల్లో కొత్త విధానాలను అమలు చేస్తున్నారని నేషనల్‌ మాన్యుఫ్యాక్చరింగ్‌ ఇన్నోవేషన్‌ సర్వే- 2021-22లో తేలింది. ఈ సర్వే నిర్వహించింది సాక్షాత్తూ కేంద్ర ప్రభుత్వమే. కేంద్రంలోని శాస్త్ర సాంకేతిక విభాగం ఈ సర్వే నిర్వహించింది.

గుజరాత్‌ మాడల్‌ అంటూ ప్రధాని మోదీ, బీజేపీ చేసిన ప్రచారమంతా ఉత్త డొల్లేనని ఈ సర్వేతో మరోసారి స్పష్టమైంది. దేశ పారిశ్రామికరంగానికి ఊపిరి వంటి సూక్ష్మ, చిన్న, మధ్యతరహా (ఎంఎస్‌ఎంఈ) పరిశ్రమల పరిస్థితి ఘోరంగా ఉన్నదని సర్వేలో తేలింది. దేశంలోని ఎంఎస్‌ఎంఈల్లో నవకల్పన (ఇన్నోవేషన్‌) విధానాలపై ఈ సర్వే నిర్వహించారు. 2017-18 నుంచి 2019-20 మధ్య పరిశ్రమల్లో నవకల్పనలు ఏ విధంగా ఉన్నాయో తెలుసుకొనేందుకు నిర్వహించిన ఈ సర్వేల్లో అనేక సంచలన విషయాలు వెలుగులోకి వచ్చాయి. మొత్తం 8,074 కంపెనీలను సర్వే చేయగా, వీటిలో 25.01 శాతం మాత్రమే ఇన్నోవేషన్‌ను ప్రవేశపెడుతున్నట్టు చెప్పాయి. 73.76 శాతం సంస్థలు పాత విధానాలతోనే ఉత్పత్తి, వ్యాపారం నడిపిస్తున్నట్టు పేర్కొన్నాయి.

సర్వే వివరాలు

• 2011 తర్వాత నేషనల్‌ ఇన్నోవేషన్‌ సర్వే నిర్వహించటం ఇదే తొలిసారి.
• ఈ సర్వేలో భాగంగా ఉత్పత్తి, మార్కెటింగ్‌, సాంకేతికత తదితర అంశాల్లో ఇన్నోవేషన్‌ అమలుపై 8,074 కంపెనీల అభిప్రాయాలను సేకరించారు.
• నవకల్పనలు అమలుచేయటంలో తెలంగాణ, కర్ణాటక, తమిళనాడు రాష్ర్టాల్లో టాప్‌లో ఉన్నాయి.
• ఈ రాష్ర్టాల్లో ఇన్నోవేషన్‌ అమలులో తీవ్ర ప్రతిబంధకాలు ఎదురవుతున్నప్పటికీ ఆయా రంగాల్లో కంపెనీలు భారీగా పెట్టుబడి పెడుతున్నాయి. ఉత్తరప్రదేశ్‌, పశ్చిమబెంగాల్‌, ఒడిశా, ఆంధ్రప్రదేశ్‌, ఈశాన్య రాష్ర్టాలు ఇన్నోవేషన్‌లో వెనుకబడి ఉన్నాయని సర్వే తేల్చింది.
• ప్రధానమంత్రి నరేంద్రమోదీ సొంత రాష్ట్రం గుజరాత్‌తోపాటు కేంద్రపాలిత ప్రాంతం దాద్రానగర్‌ హవేలీలోని కంపెనీల్లో అత్యధికంగా పురాతన విధానాలతోనే నెట్టుకొస్తున్నట్టు తేలింది.
• సర్వేలో పాల్గొన్న కంపెనీల్లో 52.24 శాతం సూక్ష్మ, 29.26 శాతం చిన్న, 12,63 శాతం మధ్యతరహా, 5.87 శాతం భారీ పరిశ్రమలు ఉన్నాయి.
• సర్వేలో పాల్గొన్నవాటిలో 73.76 శాతం పరిశ్రమలు తాము ఇన్నోవేషన్‌ను అమలుచేయటంలేదని తెలిపాయి.
• ఇన్నోవేషన్‌కు ప్రధానంగా మూడు ప్రతిబంధకాలు ఉన్నాయని సర్వేలో గుర్తించారు.
• నిధుల కొరత వల్లనే నవకల్పనల జోలికి వెళ్లటం లేదని 45 శాతం కంపెనీలు తెలిపాయి.
• ఇన్నోవేషన్‌ ఖరీదైన వ్యవహారమని 40.30 శాతం, బహిర్గత వనరులు లేకపోవటమే కారణమని 39.52 శాతం పరిశ్రమలు పేర్కొన్నాయి.
• కొత్త తరహా వస్తువులకు మార్కెట్‌లో సరైన డిమాండ్‌ లేదని 71.23 శాతం, సంస్థాగత ఇబ్బందుల వల్లే కొత్తదనాన్ని తేలేకపోతున్నామని 69.28 శాతం, అంతర్గతంగా నిధులు సర్దుబాటు కావటం లేదని 68.57 శాతం, బహిరంగ మార్కెట్‌లో నిధులు లభించటంలేదని 68.38 శాతం కంపెనీల యాజమాన్యాలు వెల్లడించాయి.

పారిశ్రామికీకరణ భారీగా ఉన్నా..
గుజరాత్‌, దాద్రానగర్‌ హవేలీ అత్యధికంగా పారిశ్రామికీకరణ చెందినప్పటికీ ఇన్నోవేషన్‌లో చాలా వెనుకబడి ఉన్నాయి. అక్కడి పరిశ్రమలు ప్రధానంగా కెమికల్స్‌, టెక్స్‌టైల్స్‌, ప్లాస్టిక్స్‌, ఫార్మాస్యూటికల్స్‌, ఎలక్ట్రానిక్స్‌ వంటి వ్యాపారాలపైనే దృష్టిపెట్టాయి. వీటిలో నూతన విధానాల అమలు చాలా ప్రమాదమని యాజమాన్యాలు భావిస్తున్నాయి. అందుకే కొత్త సాంకేతికతను ప్రవేశపెట్టేందుకు ఆసక్తి చూపటంలేదు. చాలా సంప్రదాయబద్ధమైన వ్యవస్థీకృత విధానాలను అవలంబించటం కూడా ఇందుకు ఒక కారణం.
– నేషనల్‌ మాన్యుఫ్యాక్చరింగ్‌ ఇన్నోవేషన్‌ సర్వే-2021-22