వ్యాక్సినేషన్‌ వేగాన్ని పెంచాలి

• విదేశీ టీకాలకు కూడా అనుమతులివ్వాలి
• ప్రధాని మోదీకి మన్మోహన్‌ లేఖ

న్యూఢిల్లీ, ఏప్రిల్‌ 18: కరోనా కట్టడికి వ్యాక్సిన్‌ చాలా కీలకమని, దేశంలో వ్యాక్సినేషన్‌ను వేగవంతం చేయాలని మాజీ ప్రధాని మన్మోహన్‌ సింగ్‌ సూచించారు. కరోనా నియంత్రణకు పలు సూచనలు చేస్తూ ఆయన ఆదివారం ప్రధాని మోదీకి లేఖ రాశారు. ఎంత మందికి టీకా వేశాం అన్నది కాకుండా జనాభాలో ఎంత శాతం మందికి టీకా చేరిందన్నది ముఖ్యమని అన్నారు. దేశంలో జనాభాను బట్టి ప్రస్తుతం చాలా తక్కువ మంది టీకా వేసుకొన్నారని మన్మోహన్‌ అభిప్రాయపడ్డారు. ప్రభుత్వం తన సూచనలను పరిగణనలోకి తీసుకొంటుందన్న ఆశాభావాన్ని వ్యక్తం చేశారు.

వైరస్‌ నియంత్రణకు మన్మోహన్‌ చేసిన సూచనలు

• దేశీయంగా టీకా ఉత్పత్తి, సరఫరా పరిమితంగా ఉన్న కారణంగా విదేశీ టీకాలను అనుమతించాలి. దిగుమతి చేసుకోవాలి.
• ఫ్రంట్‌లైన్‌ వర్కర్లను గుర్తించే విషయంలో రాష్ర్టాలకు స్వేచ్ఛనివ్వాలి. స్థానిక పరిస్థితులను బట్టి కొన్ని రాష్ర్టాలు లాయర్లు, టీచర్లు, డ్రైవర్లకు టీకాలు వేయాలనుకొంటున్నాయి.
• వ్యాక్సిన్‌ తయారీ కంపెనీలకు ప్రోత్సాహకాలు ఇవ్వాలి. టీకా ఉత్పత్తికి అవసరమైన అనుమతులు వేగంగా ఇవ్వాలి. ఫలితంగా ఎక్కువ సంఖ్యలో టీకాల ఉత్పత్తి జరుగుతుంది.
• కరోనా టీకాల కోసం కేంద్రప్రభుత్వం టీకా తయారీ కంపెనీలకు పెట్టిన ఆర్డర్ల వివరాలు ఎప్పటికప్పుడు వెల్లడించాలి. ఆ టీకాలను రాష్ర్టాలకు ఎలా పంచబోతున్నారో చెప్పాలి. రాష్ర్టాలు అందుకు అనుగుణంగా వ్యాక్సినేషన్‌ ప్రణాళికలను రచించుకొంటాయి. అత్యవసర పరిస్థితుల కోసం కేంద్రం 10% టీకాలను తమ వద్దే పెట్టుకోవాలి.