Robert Vadra | మనీలాండరింగ్ కేసులో రాబర్ట్ వాద్రాకు ఢిల్లీ కోర్టు నోటీసులు.. కోర్టుకు హాజరుకావాలని ఆదేశం

Robert Vadra : ప్రముఖ వ్యాపారవేత్త, కాంగ్రెస్ నేత ప్రియాంకా గాంధీ భర్త రాబర్ట్ వాద్రాకు ఢిల్లీ కోర్టు షాకిచ్చింది. హరియాణాలోని వివాదాస్పద షిఖోపూర్ ల్యాండ్ డీల్ కేసులో మనీ లాండరింగ్ జరిగిందనే ఆరోపణలపై రాబర్ట్ వాద్రాకు ఢిల్లీ కోర్టు నోటీసులు జారీ చేసింది.

Robert Vadra : ప్రముఖ వ్యాపారవేత్త, కాంగ్రెస్ నేత ప్రియాంకా గాంధీ భర్త రాబర్ట్ వాద్రాకు ఢిల్లీ కోర్టు షాకిచ్చింది. హరియాణాలోని వివాదాస్పద షిఖోపూర్ ల్యాండ్ డీల్ కేసులో మనీ లాండరింగ్ జరిగిందనే ఆరోపణలపై రాబర్ట్ వాద్రాకు ఢిల్లీ కోర్టు నోటీసులు జారీ చేసింది. ఈ కేసును విచారిస్తున్న ఈడీ దాఖలు చేసిన ఛార్జిషీట్ ఆధారంగా స్పెషల్ జడ్జ్ సుశాంత్ చంగోత్రా విచారణ జరిపారు.

మే 16న కోర్టులో హాజరు కావాలని వాద్రాకు ఆదేశాలు జారీ చేశారు. ఈడీ గత ఏడాది జూలైలో ఈ కేసుపై చార్జిషీట్ దాఖలు చేసింది. వాద్రాపై దాఖలైన తొలి ఛార్జిషీటు ఇదే. ఈ అంశంలో గత ఏడాది ఏప్రిల్‌లోనే ఈడీ వాద్రాను విచారించింది.

షిఖోపూర్ ల్యాండ్ డీల్ ఏంటి..?
ఈ కేసు 2008 ఫిబ్రవరికి సంబంధించింది. అప్పట్లో హరియాణాలో భూపిందర్ సింగ్ హుడా ఆధ్వర్యంలో కాంగ్రెస్ ప్రభుత్వం అధికారంలో ఉండేది. ఆ సమయంలో రాబర్ట్ వాద్రా డైరెక్టర్‌గా ఉన్న స్కైలైట్ హాస్పిటాలిటీ ప్రైవేట్ లిమిటెడ్ కంపెనీకి ప్రభుత్వం తక్కువ ధరకే భూమి కట్టబెట్టింది. రూ.7.5 కోట్లకే 3.5 ఎకరాల భూమిని అందించింది. అయితే, ఈ భూమిని ఆ సంస్థ 2012లో డీఎల్ఎఫ్‌ సంస్థకు రూ.58 కోట్లకు అప్పగించింది. తక్కువ ధరకు భూమి దక్కించుకుని, ఎక్కువ ధరకు విక్రయించడంలో ఆర్థిక మోసాలు జరిగాయని, మనీ లాండరింగ్ జరిగిందని ఆరోపిస్తూ ఈడీ కేసు నమోదు చేసింది.

ఈ విషయంలో వాద్రాకు ఉన్న సంబంధాలు, లావాదేవీలపై ఈడీ విచారణ జరుపుతోంది. దీనిలో భాగంగా వాద్రా, అతడి కంపెనీలకు సంబంధించి రూ.37.64 కోట్ల విలువైన 43 ఆస్తుల్ని ఈడీ అటాచ్ చేసింది. అయితే, ఈ కేసు విచారణపై వాద్రా అభ్యంతరం వ్యక్తం చేస్తున్నారు. తనపై రాజకీయ కక్ష సాధింపులో భాగంగానే ఈ కేసు నమోదు చేశారని ఆరోపిస్తున్నారు.