పేదల అభ్యున్నతే లక్ష్యం

• కరోనాపై భారత్‌ పోరు స్ఫూర్తిదాయకం
• ఉభయసభలనుద్దేశించి రాష్ట్రపతి కోవింద్‌
• చైనా ప్రస్తావన లేకపోవడంపై కాంగ్రెస్‌ విమర్శలు

న్యూఢిల్లీ, జనవరి 31: పేదలు, ఎస్సీలు, ఎస్టీలు, వెనుకబడిన వర్గాల అభ్యున్నతే లక్ష్యంగా కేంద్రప్రభుత్వ విధానాల రూపకల్పన, అమలు జరుగుతున్నదని రాష్ట్రపతి రామ్‌నాథ్‌ కోవింద్‌ అన్నారు. కరోనా సంక్షోభంలోనూ వ్యవసాయ రంగంలో గణనీయమైన వృద్ధి నమోదు కావడంపై హర్షం వ్యక్తం చేశారు. ఈ ఘనత చిన్న, సన్నకారు రైతులదే అని పేర్కొన్నారు. కేంద్ర బడ్జెట్‌ సమావేశాల నేపథ్యంలో సోమవారం ఆయన ఉభయ సభలను ఉద్దేశించి 50 నిమిషాలు ప్రసంగించారు. రైతుల కృషితో రికార్డు స్థాయి దిగుబడులు వచ్చాయన్నారు. కేంద్రప్రభుత్వం తీసుకొచ్చిన అనేక పథకాలను వివరించారు.

రాష్ట్రపతి ప్రసంగంలోని ముఖ్యాంశాలు..

• కరోనాపై పోరాటంలో భారత్‌ పోరాటం స్ఫూర్తిదాయకం.కరోనా కట్టడిలో హెల్త్‌కేర్‌ వర్కర్లు, ఫ్రంట్‌లైన్‌ వర్కర్లు, శాస్త్రవేత్తల సేవలు అభినందనీయం.
• దేశంలో వ్యాక్సినేషన్‌ విజయవంతంగా కొనసాగుతున్నది. భారత వ్యాక్సిన్లు కోట్ల మంది ప్రాణాలను నిలిపాయి. దేశంలో అర్హులైన 90 శాతం మందికిపైగా తొలి డోసు తీసుకున్నారు.
• ఏ వ్యక్తీ ఆకలితో అలమటించకూడదనేది ప్రభుత్వ ప్రధాన లక్ష్యం. ఇందుకు ప్రపంచంలోనే అతిపెద్ద ఆహార పంపిణీ పథకాన్ని ప్రభుత్వం నిర్వహిస్తున్నది.
• 23 కోట్ల మంది కార్మికులను ఈశ్రమ్‌ పోర్టల్‌తో అనుసంధానం జరిగింది. 2 కోట్ల మంది పేదలకు ప్రభుత్వం పక్కా ఇళ్లు కట్టించింది.
• ఏడు మెగా టెక్స్‌టైల్‌ పార్కులతో ప్రభుత్వం భారీగా ఉద్యోగవకాశాలు సృష్టించింది.
• మహిళా సాధికారతకు ప్రభుత్వం అధిక ప్రాధాన్యత ఇస్తున్నది. యువతుల కనీస వివాహ వయసును పెంచేందుకు కృషి చేస్తున్నది.
• రక్షణ రంగంలో మేకిన్‌ ఇండియాకు ప్రభుత్వం ప్రాధాన్యమిస్తున్నది. డ్రోన్‌ సాంకేతికతపై ప్రత్యేక దృష్టి సారించింది.
• 2047 నాటికల్లా అభివృద్ధి చెందిన ఇండియాను సాధించుకోవడం కోసం కష్టపడి పనిచేయాలి. 2047తో భారతదేశం స్వాతంత్య్రం సాధించి వందేండ్లు నిండుతాయి. కాగా, రాష్ట్రపతి ప్రసంగంలో చైనా ప్రస్తావన లేకపోవడంపై కాంగ్రెస్‌ విమర్శలు చేసింది.